Rusizi: Babangamiwe n’insinga z’amashanyarazi n’amapoto ashaje byabateza akaga
Amakuru

Rusizi: Babangamiwe n’insinga z’amashanyarazi n’amapoto ashaje byabateza akaga

Imvaho Nshya

October 19, 2023

Abacururiza muri santere y’ubucuruzi ya Nyakabuye, mu Murenge wa Nyakabuye, Akarere ka Rusizi n’abayituriye batewe impungenge n’insinga z’amashanyarazi zimaze imyaka yafi 40 zihashyizwe zishishuye kuko ari zo mbere bashyiragamo, ku mapoto y’ibiti bishaje byatangiye kugwa, bavuga ko zishobora kubateza impanuka.

Batangarije Imvaho Nshya ko iyi santere y’ubucuruzi ihamaze imyaka irenga 60, mu myaka ya za 1985 ari bwo hagejejwe amashanyarazi mu gihe ibice byinshi by’igihugu byari mu icuraburindi, icyo gihe ngo hashyirwagaho insinga zishishuye ku mapoto y’ibiti.

Ubu ayo mapoto yatangiye kugwa kubera gusaza cyane, n’izo nsinga ngo iyo imvura iguye ari nyinshi irimo n’umuyaga mwinshi haza ibishashi byinshi by’umuriro, ukanabura bikaba ngombwa kwitabaza REG.

Ngendahimana Felix ati: “Aya mashanyarazi amaze imyaka myinshi hano, kuko mbere hariya hari Umurenge hakoreraga Superefegitura ya Bugumya, byatumye amashanyarazi ahagera mbere, n’iyi santere y’ubucuruzi iboneraho.

Kubera ko amapoto yari ay’ibiti, yatangiye gusaza akanagenda agwa, imvura yaba nyinshi cyangwa irimo umuyaga mwinshi byakubita muri za nsinga nyuma y’umwanya muto haje ibishashi by’umuriro, ugahita ubura tukajya mu icuraburindi, bigasaba ko abatekinisiye ba REG baza kubikemura”.

Avuga ko baterwa impungenge zikomeye n’ibyo bishashi by’umuriro biza ari byinshi, bishobora guteza impanuka umwanya uwo ari wo wose, agasaba ko REG yakemura iki kibazo byihuse bitarateza izindi ngorane.

Uhagarariye iyi santere y’ubucuruzi akaba na Perezida w’Urugaga rw’abikorera muri uyu Murenge Ngendahayo Emmanuel, avuga ko  iki kibazo bakigaragaje igihe kirekire bakabwirwa ko kizakemuka bagategereza bagaheba,  bifuza ko cyakemuka kuko bakora imitima itari hamwe, cyane cyane muri ibi bihe by’imvura.

Ati: “Turahangayitse cyane kuko uburyo izi nsinga zishaje cyane zinashihuye, n’amapoto y’ibiti yaraboze hafi ya yose ahengamye hafi yo kugwa, hari n’ayatangiye kugwa. Iyo haguye imvura nyinshi ivanze n’umuyaga insiga zigatangira gukoranaho zirekura ibishashi by’umuriro, tugira impungenge ko inyubako zose z’ubucuruzi hari igihe zashya zigakongoka ntitugire na kimwe turamura, n’abantu bakahasiga ubuzima.’’

Avuga ko impungenge bafite ari uko izo nsinga zica hejuru y’inyubako zabo, ko nk’igihe igiti cyazagwa kinariho insinga nyinshi zigateza umuriro nta nzu n’imwe izasigara ihagaze, n’abarimo,cyane cyane ari nk’umunsi w’isoko, hakaba haba ibibazo bikomeye kandi ntako batagize batakambira ubuyobozi bw’Akarere na REG, bikaba iby’ubusa.

Umuyobozi w’urugaga rw’abikorera( PSF) mu Murenge wa Nyakabuye, Ngendahayo Emmanuel avuga ko bahangayitse kuko nta gihe batatatse ariko ntibikemuke

Umuyobozi wa REG mu Karere ka Rusizi, Kiiza Francis, yabahaye iminsi itarenga 3 akaba agikemuye, anabamara impungenge ko ibyo bishashi by’umuriro ntacyo byatwara kuko bitamara amasogonda 5 umuriro ugahita ugenda nk’uko babyivugira ko bahita bawubura.

Ati: “Icyo kibazo ndakizi rwose ndabizeza ko bitarenze ku wa 5 w’iki cyumweru tariki 20 Ukwakira, kizaba cyakemutse. Si metero nyinshi ni nka 300, insinga zahajya ndazifite nzazihakoresha, n’icy’amapoto ashaje ndagikemura, kuko hafi y’Umurenge wa Gitambi mpafite 14, ninsanga hari ashaje cyane nzayakuramo mpashyire ayo. Rwose bagire icyizere”.

Avuga ko ari ibisanzwe ko iyo amapoto ashaje insinga zikweduka, kuko iyo zireze cyane amapoto ashaje zishobora gucika kuko na zo ziba zikurura, mu gihe cy’imvura n’imbeho iyo umuyaga ubaye mwinshi, urazizunguza zigakoranaho, umuriro ugahita ubura.

Ibibazo by’amashanyarazi muri aka Karere biragenda bigaragara henshi cyane cyane muri santere z’ubucuruzi zo mu byaro, haba hari n’abakeneye umuriro uhagije ngo bakore ibibateza  imbere bikure mu bukene, cyane cyane urubyiruko ruba rushishikajwe no guteza imbere aho ruvuka, abaturage bagasaba REG n’Akarere kumanuka bakabegera bakabibakemurira.

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA