Rusizi: Baratabariza umuhanda ubahuza n’u Burundi ugiye gucikamo kabiri
Amakuru

Rusizi: Baratabariza umuhanda ubahuza n’u Burundi ugiye gucikamo kabiri

Imvaho Nshya

September 25, 2023

Uyu muhanda uherereye mu ibanga ry’umusozi mu Kagari ka Mpinga, Umurenge wa Gikundamvura, Akarere ka Rusizi, ukaba uhuza ako Karere n’igihugu cy’u Burundi uciye ku mugezi wa Ruhwa.

Abaturage baratabaza Leta kubera ko uretse kuba uwo muhanda ubahuza n’abaturanyi, ni na wo wonyine ugera mu murima w’icyitegererezo wa Bize, ufite hegitari zisaga 50, bakaba bafite impungenge z’uburyo bazakurikirana imyaka yabo mu gihe uwo muhanda waba umaze gutandukana.

Ni umuhanda  bavuga ko umaze imyaka 10 ukozwe n’uruganda CIMERWA PPC rutunganya sima nyarwanda kuko rwashakaga kwiyoorohereza ingendo zijya kuhashaka  itaka ryabugenewe rikoreshwa bakora sima.

Bavuga ko ibyo CIMERWA yahashakaga ishobora kuba itarabihabonye irahareka, ariko kuko ari umuhanda mpuzamahanga Abarundi n’Abanyarwanda bacagamo bahahirana wakomeje kuba ingirakamaro.

Ukimara gukorwa bashimiye CIMERWA cyane yari iwukoze bakaboneraho kuko yari isubije icyifuzo cyabo cyo kubona umuhanda rukumbi uboneka mu misozi ihanamye iriho n’amashyamba ku buryo utabona ahandi wamenera.

Uri hagati mu musozi, hejuru yawo hari ishyamba rya Leta rinini ry’inturusu, munsi yawo hari imanga nini cyane ugana mu mibande aho bahinga. Kubera kutitabwaho, amazi y’imvura nyinshi ava muri iryo shyamba yarawangije bikomeye.

Riberakurora Patrice Imvaho Nshya yahasanze yikoreye ubwatsi bw’amatungo abuvanye muri uwo mubande uri guhingwamo ibigori mu muri gahunda yo guhuza ubutaka, yayitangarije ko ari umuhanda w’ingirakamaro cyane.

Ahamya ko iyo umusaruro wagenze neza bezamo toni zirenga 200 z’ibigori n’izirenga 60 za soya cyangwa nk’izo z’ibishyimbo, hakaba n’uturima two ku mpande zaho bahingamo imbuto, imboga, amateke n’ibindi, byose byera neza.

Ati: “Uyu muhanda uduteye impungenge zikomeye kuko numara gucikamo kabiri ibigori duhinga muri iriya mibande ntituzaba tukibibagaye, nta n’ahandi twanyura tujyayo. Tekereza rero toni zirenga 200 zishobora gutikirira hariya hantu bitewe n’uburangare bw’abakadufashije kuwutunganya kuko twe abaturage twakoze imiganda uko dushoboye turananirwa.”

Uretse ubwo buhinzi buhari bavuga ko bukorwa n’ab’Imirenge ya Butare na Gikundamvura, hari na ba mukerarugendo bahanyura basura amashyuza ahari, abaturage bakanahaca bajya kwanika imyaka bejeje kuko nta kinyabiziga cyahanyura.”

Umukuru w’Umudugudu wa Kirume Munyemana Faustin, avuga ko badatabawe vuba imirimo bakorera mu mirima y’ibigori itaba igikozwe

Uwagombaga kubatwarira ibilo 50 ku mafaranga 1000 awubagereza ku muhanda munini Bugarama-Butare, cyangwa nk’igare ryagombaga gutwara imitwaro myinshi kuko ritahagera, uwikomereye ku mutwe abaca amafaranga 3000.

Uwizeyimana Annonciata wahahuriye n’Imvaho Nshya avuye gutera ibigori ati: “Nk’ubu mpetse umwana sinagira icyo nikorera ku mutwe ngo mpace. Nshobora kwibeshya gato nkagwa muri iriya ruhurura n’umwana bikarangira. Neza ibigori birenze toni imwe ariko kubikura ku bwanikiro mbigeza mu rugo ni aha Nyagasani, kuko amafaranga ababyikorera ku mutwe bansha nkareba n’imvune zose nahavunikiye mpinga ngasanga meze nk’ukorera ubusa.”

Mukamageza Antoinette uvuga ko iyo ahageze kubera n’itege nke ashaka kugwamo, avuga ko yumvise ko Umuyobozi w’Akarere ka Rusizi Dr. Kibiriga Anicet yawunyuzemo ajya gutangiza igihembwe cy’ihinga, ku wa 20 Nzeri, aza kumwirebera ngo amubwire akababaro ke.

Ati: “Nzanywe n’uko bambwiye ko Meya awuciyemo nari nje kumwisabira kuwudukorera kuko nkanjye uko mpanyuze nshaka kugwamo. Imvura yaguye bwo sunajya guhinga kandi ni cyo kintunze. Numara gucika se si ukwicwa n’inzara nyine?  Ko ntacyo tutakoze, badufashije koko bakawutunganya neza, tukajya mu mirima nta mpungenge z’uwagwa muri uyu mworera?”

Munyemana Faustin, Umukuru w’Umudugudu wa Kirume uyu muhanda urimo, yemeza ko wacitsemo kabiri  nta handi banyura bajya mu mirima kandi ari ho honyine hahingwa ibigori byinshi.

Ati: “Tuwukora dushyiramo ibitaka gusa mu gihe cy’akazuba. Ahubwo hari impungenge ko kubera ko tuba twakoze ibidakomeye, nk’imodoka yahaca igiye kuzana ibigori umushoferi yibwira ko hakomeye, akagwamo abarimo bose bagatikiriramo. Hakenewe imbaraga zawukora neza ku buryo amazi atongera kuwusenya. Twe nk’abaturage biraturenze.”

Umuyobozi w’Akarere ka Rusizi Dr Kibiriga Anicet, yasabye ubuyobozi bw’Umurenge wa Gikundamvura kureba icyakorwa ngo ukorwe byihuse.

Ati: “Twawubonye koko imvura yawutenguye bikomeye, koko wenda gucikamo kabiri. Twabwiye Umurenge gukoresha umuganda ukawukora neza ukahashyira ikiraro gikomeye ngo abantu babashe gutambuka kandi Umurenge wabitwemereye.”

Yavuze ko hakenewe ikiraro gikomeye amazi aca umuhanda agahurizwa hamwe akabona aho anyura ajya mu mugezi wa Ruhwa adatwaye ubutaka bw’abaturage cyangwa ngo agire uwo ahitana.

Aba bagore baravuga ko bafite impungenge zo kunyura aha hantu bikoreye banahetse abana

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA