Rwanda: Amashuri abanza 60% agiye kugezwaho internet
Amakuru

Rwanda: Amashuri abanza 60% agiye kugezwaho internet

Imvaho Nshya

December 28, 2022

Leta y’u Rwanda irateganya kugeza ihuzanzira rya internet nibura kuri 60% b’amashuri abanza bitarenze mu mwaka wa 2024 nk’uko bishimangirwa n’ubuyobozi bw’Ikigo cy’Igihugu gishinzwe Uburezi bw’Ibanze (REB).

Umuyobozi w’Ishami rishinzwe guteza imbere Imfashanyigisho z’Ikoranabuhanga muri REB Diane Sengati, yemereye itangazamakuru ko iyo ntego izagerwaho mu gihe kugeza ubu amashuri abanza agerwaho na internet akiri kuri 20% na ho ayisumbuye akaba ari ku kigero cya 57%.

Mu gihe umuyoboro mugari wa internet wakwijwe mu gihugu hose, imibare igaragaza ko muri rusange abakoresha internet bagera kuri 66%. Gusa ku bufatanye n’abafatanyabikorwa banyuranye, ibyo ngo ntibizatuma amashuri atagezwamo internet mu rwego rwo koroshya imyigire n’imyigishirize.

Mukiganiro yagiranye na The New Times, Diane Sengati yagize ati: “Turimo kugeza ainternet mu mashuri dufatanyije n’abafatanyabikorwa. Ahataragera amashanyarazi na internet, amashuri ntabwo aragezwaho ihuzanzira. 

Yakomeje avuga ko mu gihe amashuri agezwaho ibikoresho by’ikoranabuhanga muri gahunda ya Musadobwa imwe ku Mwana na mudasobwa ku mwarimu, internet ihita igezwa ku bigo by’amashuri byamaze kugerwaho n’ayo mahirwe yitezweho impinduka nyinshi.

Kuri ubu bivugwa ko abarimu bamaze kugezwaho mudasobwa babarirwa ku kigero cya 57%. Sengati ati: “Haracyari imbogamizi ku kiguzi cya internet ku kwezi kikiri hejuru.”

Umuyobozi w’Ikigo the Internet Society Rwanda Chapter Emmanuel Mfitumukiza, yavuze ko ibice byinshi by’icyaro bitaragezwaho internet ariko abafatanyabikorwa bafite uruhare rinini mu kugeza internet kuri ayo mashuri vuba kandi mu buryo burambye.

Yagize ati: “Twebwe tumaze kugeza internet mu mashuri ane yo mu Karere ka Bugesera, ndetse ayo mashuri ubu ashobora gufasha imiryango iyaturiye kongera ubumenyi mu by’ikoranabuhanga.  

Yongeyeho ko kugeza internet mu mashuri abanza n’ayisumbuye bizagira uruhare rikomeye mu ishyirwa mu bikorwa ry’Integanyanyigisho ishingiye ku bushobozi. “Iyo nteganyanyigisho isaba ko abanyeshuri n’abarimu bose bakwiye kuba bafite ibikoresho bya ngombwa by’ikoranabuhanga.”

Umuyobozi w’Ishuri Ribanza rya GS Nyirarukobwa giherereye mu Karere ka Bugesera  Theophile Nkundingabo,yavuze ko bamaze kubona isomero ry’ikoranabuhanga ridasaba kuba ufite internet. Avuga ko ryazanye impinduka zitangaje muri iki kigo gifite abanyeshuri barenga 1000 biga mu mashuri abanza na 210 biga mu yisumbuye.

Yagaragaje uburyo abarimu batari bamenyereye gukoresha za mudasobwa bamaze kuba inzobere. Agaragaza ko amashuri yo mu Rwanda afite internet akwiye kongerwa n’igiciro cya internet kikiri hejuru kikagabanywa kuko amashuri menshi adashobora kucyigondera.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA