U Rwanda n’u Butaliyani mu bufatanye mu by’umutekano n’ubuhinzi
Amakuru

U Rwanda n’u Butaliyani mu bufatanye mu by’umutekano n’ubuhinzi

Imvaho Nshya

September 22, 2023

Ku wa Kane tariki ya 21 Nzeri 2023, Perezida wa Repubulika Paul Kagame yahuye na Minisitiri w’Intebe w’u Butaliyani Giorigia Meloni, baganira ku ngingo zitandukanye zo kwimakaza ubutwererane no gusangira  inyungu ku bihugu byombi.”

Abo bayobozi bahuriye mu nama ya 78 y’Inteko Rusange y’Umuryango w’Abibumbye iteraniye i New York muri Leta Zunze Ubumwe z’Amerika kuva tariki ya 20 ikazageza ku ya 26 Nzeri 2023.

Ibiro by’Umukuru w’Igihugu byatangaje ko baganiriye ku buryo bakomeza gushimangira ubufatanye hagati y’ibihugu by’u Rwanda n’u Butaliyani hagamijwe gusangira inyungu mu by’umutekano, ubuhinzi, ubuzima, ikoranabuhanga n’ibindi.”

Kugiza ubu u Rwanda n’u Butaliyani byishimira umubano mwiza bifitanye, aho mu ntangiriro za 2023 Ibiro by’Uhagarariye icyo gihugu mu Rwanda byafunguye icyicaro mu Mujyi wa Kigali.

Muri Mata uyu mwaka Minisitiri w’Intebe w’u Butaliyani yatangaje ko ashyigikiye umushinga w’u Bwongereza wo kohereza abimukira  mu Rwanda, avuga ko kubakira ari ukubabonera aho gutura hatekanye bitandukanye n’abanengaga uyu mushinga bavuga ko u Bwongereza burimo gushaka kwirukana aba bimukira.

Ubwo yari i London  mu Bwongereza Minisitiri w’Intebe Giorigia, yagize ati: “Ndatekereza ko kuvuga ko ari ukwirukana aba bimukira cyangwa se ngo byaturutse ku busabe bw’u Rwanda atari byo kandi ababivuga ntibashaka kumva ukuri ndetse ababivuga gutya ni abokamwe n’irondaruhu.”

Muri Kamena uyu mwaka Umuyobozi Mukuru wa Polisi y’u Rwanda IGP Felix Namuhoranye, yagiriye uruzinduko rw’iminsi 3 mu Butaliyani ku butumire bwa mugenzi Umuyobozi Mukuru wa Polisi y’icyo gihugu Lt. Gen Teo Luzi.

Abo bayobozi baganiriye ku guteza imbere umubano w’ibihugu byombi mu nzego z’umutekano.

Mu rwego rw’Ingufu, igihugu cy’u Butaliyani gifasha u Rwanda kuzamura iterambere ry’ubwikorezi bw’abantu n’ibintu.

Mu mwaka wa 2018 u Rwanda n’u Butaliyani byasinye amaserezano mu gukora ingendo z’ubucuruzi zo mu kirere, amaserazo yo koroherezanya mu ngendo z’indege zigana cyangwa ziva muri ibi ihugu.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA