RwandAir yishimiye gukomeza gutwara abitabira BAL
Amakuru

RwandAir yishimiye gukomeza gutwara abitabira BAL

NTAWITONDA JEAN CLAUDE

June 19, 2023

Sosiyete Nyarwanda ikora ubwikorezi bwo mu kirere (RwandAir) yishimiye gukomeza kuba umufatanyabikorwa w’Imena wa  Shampiyona y’Umukino wa Basketball muri Afurika (BAL) nyuma yo kongera amasezerano rifitanye n’u Rwanda mu gihe cy’imyaka itanu.

Ubutumwa Ubuyobozi bwa RwandAir bwanyujije ku mbuga nkoranyambaga buragira buti: “Dufatanyije, dukomeje kuzamura umukino, guhuza abafana n’abakinnyi tubaha serivisi zo ku rwego ruhanitse.”

Kuri uyu wa Mbere taliki ya 19 Kamena, ni bwo Ubuyobozi bwa BAL n’ubw’Urwego rw’Igihugu rw’Iterambere (RDB) bwatangaje ko ayo masezerano yongereweho imyaka itanu, bikazatuma imikino nyafurika ikomeza gukinirwa muri  BK Arena muri sizeni zirimo imikino yo muri kimwe cya kabiri n’iya nyuma yo mu 2024, 2027 na 2028. 

Biteganyijwe ko BAL na RDB bizakomeza gukorana mu birebana no guteza imbere impano z’urubyiruko mu bijyanye na gahunda zihindura imibereho yarwo.

Ayo masezerano kandi azatuma gahunda ya Visit Rwanda igamije kumenyekanisha u Rwanda ikomeza kuba umufatanyabikorwa w’ingenzi no kugera ku ntego zayo.

Byitezwe ko ijambo “Visit Rwanda” rizakomeza kugaragara ku myambaro y’amakipe ahuriye muri Shampiyona ya BAL.

Ku birebana na RwandAir, iyo Sosiyete izakomeza koroshya ingendo zihuza Kigali n’ibyerekezo amakipe yatoranyirijwe kwitabira iyo mikino, hamwe n’abakozi b’iyo Shampiyona. 

 Perezida wa The BAL Amadou Gallo Fall, yagize ati: “Urwego rw’Igihugu rushinzwe Iterambere (RDB) nk’umufatanyabikorwa w’ibanze, rwatanze umusanzu ukomeye mu gutangiza no guteza imbere Shampiyona y’Umukino wa Basketball muri Afurika, mu byiciro bitatu bishize.

Nyuma yo kwigaragaza muri sizeni zabanje zidasanzwe kandi zishimishije, tunejejwe no kongera ubufatanye bwacu na RDB buzatuma Imikino ya BAL, gahunda z’iterambere ry’urubyiruko no guhindura imibereho y’abaturage bikomeza gukorwa mu myaka iri imbere.”

Umuyobozi Mukuru wa RDB Clare Akamanzi , na we yagize ati: “Twishimiye kongera ubufatanye dufitanye na BAL. Twabonye intsinzi zikomeye ndetse n’inyungu mu myaka itatu ishize, kandi twiteguye kurushaho gukorana byinshi dufatanyije.”

Yakomeje ashimangira ko The BAL yerekanye ko ari umuhuza mwiza kandi ko batazatezuka ku kugaragaza ibyiza by’u Rwanda mu bukerarugendo, amahirwe y’ishoramari, guteza imbere impano, ibikorerwa mu Rwanda n’ibindi byose. 

Yakomeje agira ati: “Ku bufatanye na BAL n’indi mikino ikomeye, u Rwanda ubu rwabaye icyicaro cya Siporo muri Afurika.”

Umuyobozi Mukuru wa RwandAir Yvonne Manzi Makolo, yagize ati: “RwandAir itewe ishema no gukomeza kuba umufatanyabikorwa wa Shampiyona Nyafurika y’Umukino wa Basketball, ndetse twishimiye kubona RDB ikomeza kuzana imikino igezweho ku Isi mu Rwanda.”

Yakomeje agira ati: “Turabizi ko siporo ishobora guhuza imiryango aho amakipe ahiganirwa gutsinda maze agashimishwa n’imikoranire no kumenya ko ubufatanye buzakomeza gushyigikira umubano wabo.”

Yavuze ko RwandAir izakomeza kwibanda ku gutanga serivisi zigezweho ku Isi ihuriza hamwe abantu baturutse mu byerekezo bitandukanye, kandi yiteguye gutwara abafana n’abakinnyi bazitabira mu myaka iri imbere.

Mu bandi bafatanyabokorwa ba BAL harimo NIKE, Jordan Brand na Wilson and New Fortress Energy (NFE) n’abo mu iyamamazabikorwa barimo Attorney General Alliance (AGA-Africa), Envol City, Hennessy, SERTEM na Société Pétroliere (SP).

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA