RwandAir yishimiye intsinzi muri Qatar ihemba abafatanyabikorwa bayo
Amakuru

RwandAir yishimiye intsinzi muri Qatar ihemba abafatanyabikorwa bayo

NTAWITONDA JEAN CLAUDE

July 21, 2023

Ijoro ryo kwishimira intsinzi Sosiyete Nyarwanda ikora ubwikorezi bwo mu Kirere (RwandAir) yagezeho muri Qatar ryari iry’umunezero no gutanga ibihembo, nyuma y’aho indege z’icyo kigo zakoze ingendo 156 zihuza Kigali na Doha mu mwaka wa 2022.

Mu ijoro ryo ku wa Gatatu, ni bwo Ubuyobozi bwa RwandAir bwifatanyije n’abafatanyabikorwa mu ngendo bo muri Qatar mu kwishimira iyo ntsinzi yagezweho, abakora ingendo zihuza Kigali na Doha bakaba barabonye servisi zizira amakemwa.

Muri uwo muhango, RwandAir yahembye abafatanyabikorwa 15, bashimiwe inkunga yabo mu rugendo rw’intsinzi iyo Sosiyete Nyarwanda yagezeho muri Qatar.

Mu bafatanyabikorwa bahembwe harimo n’Ambasade y’u Rwanda muri Qatar ikomeje gutanga serivisi zizira amakemwa mu korohereza abakora ingendo zihuza ibihugu byombi.

Mubeen Karbelkar, Umuyobozi w’Ishami rya RwandAir muri Qatar, yavuze ko abafatanyabikorwa mu bucuruzi bagira uruhare rukomeye mu gushyigikira ibikorwa bya RwandAir mu bucuruzi.

Yagize ati: “Abafatanyabikorwa mu bucuruzi ni umusingi w’ubufasha dukenera. Ni bo nkuru y’intsinzi yacu. Dukwiye kurushaho kubashimira tubashishikariza kutadohoka, kandi tukabagira ab’ibanze mu byo dukora. Iki gikorwa ni ingirakamaro cyane.”

RwandAir yatangiye ingendo mu Kigobe cya Qatar mu mwaka wa 2021, ndetse ikaba yarasinyanye amasezerano y’ubufatanye mu gusangira ibyerekezo n’Isosiyete ikora ingendo zo mu kirere ya Qatar Airways.

Mu kwezi k’Ukwakira 2021 ni bwo RwandAir na Qatar Airways byatangaje ko byasinyanye amasezerano yo gusangira ibyerekezo ibyo bigo byombi bigeramo, aho RwandAir izagira ububasha bwo kugera mu byerekezo bishya 65 muri Afurika no mu bindi bice by’Isi.

Mubeen yagize ati: “Qatar Airways yabaye umufatanyabikorwa wacu mu gusangira ibyerekezo, inkuru yacu y’intsinzi ni aho yahereye. Ni inkuru y’uko Qatar Airways yerekeje mu byerekezo birenze Kigali na RwandAir ikagira amahirwe yo kugera aharenze Doha nk’ibyicaro bikuru.”

Uretse ayo masezerano, RwandAir yatangije ingendo zihoraho zihuza Kigali na Doha guhera mu kwezi k’Ukuboza k’uwo mwaka.

Amasezerano yo gusangira ibyerekezo (codeshare agreements) yongereye amahirwe ya RwandAir yo kwigarurira isoko rya Leta Zunze Ubumwe z’Amerika (USA) kandi izakomeza kwagura ingendo mu mijyi inyuranye y’i Burayi nka London, Zurich na Madrid hamwe n’ibice bizwi byo muri Aziya nka Singapore, Kuala Lumpuru na Bangkok. 

RwandAir yinjiye mu mikoranire na Qatar Airways nyuma y’iminsi mike Ikigo gikora Ubushakashatsi ku birebana n’indege n’ibibuga byazo (Skytrax) kiyishyize ku mwanya wa mbere muri Afurika muri Sosiyete zikora ubwikorezi bwo mu kirere zifite abakozi batanga serivisi nziza mu 2021.

Ubuyobozi bwa RwandAir buvuga ko butazatezuka guharanira kwagura serivisi no kuzigeza ku bakiliya mu bice bitandukanye byo ku Isi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA