Saudi Arabia igiye gufasha u Rwanda kunoza ikoranabuhanga
Amakuru

Saudi Arabia igiye gufasha u Rwanda kunoza ikoranabuhanga

NTAWITONDA JEAN CLAUDE

November 20, 2022

Igihugu cya Saudi Arabia (Arabia Saudite) cyiteguye gukorana n’u Rwanda mu kwimakaza iterambere ry’ikoranabuhanga no guhanga ugushya nyuma y’ibiganiro byahuje abahagarariye Guverinoma z’ibihugu byombi muri iki cyumweru.

Abayobobozi bagiranye ibiganiro byibanze kuri ubwo bufatanye ni Minisitiri w’Ikoranabuhanga no Guhanga Udushya mu Rwanda Paula Ingabire Musoni, na Minisitiri Wungirije w’Itumanaho n’Ikoranabuhanga, Haitham bin Abdurrahman Al-Ohali.

Bagarutse ku ngingo zishimangira uburyo u Rwanda n’Arabia Saudite bikomeje kwagura umubano n’ubutwererane mu nzego zitandukanye ndetse n’amahirwe anyuranye aboneka mu bufatanye mu kwimakaza urwego rw’ikoranabuhanga no guhanga udushya.

Urwego rw’Igihugu rw’Itangazamakuru rw’Arabia Saudite rwemeza ko baayobozi bombi banunguranye ibitekerezo ku buryo bwizewe bwo kurushaho kunoza umubano no gutangiza ubufatanye bushya hagati y’ibihugu byombi, cyane cyane mu kubaka ubukungu bushingiye ku ikoranabuhanga rigezweho (digital economy).

Ibyo biganiro byibanze kuri ubwo bufatanye bugamije kuzamura ubukungu bujyanye n’icyerekezo cy’Isi, cyane ko u Rwanda ari kimwe mu bihugu bihuriye mu Muryango w’Ubutwererane mu by’Ikoranabuhanga (DCO) kigaragaza umuhate udasanzwe mu kwimakaza ikoranabuhanga mu nzego zose.

Ni muri urwo rwego ibyo biganiro byanitabiriwe na Deemah Al-Yahya, Umunyamabanga Mukuru wa DCO, Umuryango Mpuzamahanga ufite icyicaro gikuru muri Saudi Arabia.

Al-Yahya yavuze ko kugira icyicaro Gikuru i Riyadh ari gihamya y’uko Saudi Arabia ari bwo bwami bufite ubushobozi buhagije bwo kuba ihuriro rya gahunda yo guhuza Afurika, Asia n’u Burayi hifashishijwe ikoranabuhanga, kikaba ari na kimwe mu bihugu bihuriye mu Muryango w’Ibihugu bikize ku Isi (G20) byihuta mu iterambere, by’umwihariko mu kwimakaza ikoranabuhanga rigezweho mu nzego zose.

Ibiganiro by’abo ba Minisitiri byabaye muri iki cyumweru cyabayemo Inama yahuje Ibihugu bihuriye mu Muryango G20, bikaba bije bikurikira amasezerano y’ubufatanye yashyizweho umukono n’abahagarariye ibihugu byombi mu kwezi kwa Kamena 2021.

Ayo masezerano yari agamije kurushaho kunoza umubano n’ubutwererane hagati y’u Rwanda na Saudi Arabia mu nzego zirimo uburezi, umuco, itangazamakuru, ubukerarugendo, gushyigikira urubyiruko ndetse na Siporo.  

Ayo masezerano ni yo yafunguye amahirwe menshi yo kwagura umubano w’ibihugu byombi n’ubufatanye bugamije iterambere mu nyungu z’abaturage babyo.

Guverinoma ya Saudi Arabia ifite icyerekezo cyuzuzanya n’icy’u Rwanda, aho ibihugu byombi birangamiye guteza imbere ibikorwa remezo by’ikoranabuhanga mu Cyerekezo 2030 kigamije kugera ku Ntego z’iterambere Rirambye (SDGs).

Saudi Arabia iherutse kugirwa iya mbere mu Burasirazuba bwo Hagati n’iya gatatu ku Isi, muri raporo ya Banki y’Isi igaragaza impinduka za Guverinoma zitandukanye mu bijyanye no kwihaza mu ikoranabuhanga (GovTech Maturity Index for 2022/GTMI).

Ni raporo yashingiye ku bushobozi bwa buri gihugu mu bijyanye no guharanira iterambere rishingiye ku ikoranabuhanga, Saudi Arabia ikaba yarashyizwe mu bihugu byateye imbere cyane mu ikoranabuhanga rishyigikira imikorere ya Guverinoma, kwihutisha imitangire ya serivisi, guha abaturage urwaho mu kurikoresha ndetse no kwimakaza gahunda z’ikoranabuhanga zorohereza abaturage kubona serivisi z’inzego za Leta n’iz’abikorera.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA