Shampiyona y’u Bwongereza Premier League’ yatangaje abakinnyi umunani bazavamo uwitwaye neza mu mwaka w’imikino wa 2025/26. kuri uyu wa Kane, tariki ya 14 Gicurasi 2026, ni bwo iyi Shampiyona yatangaje abo bakinnyi bitwaye neza kurenza abandi mu gihe imikino ibiri kuri buri kipe, umwaka w’imikino ukarangira.

Muri abo bakinnyi harimo batatu ba Arsenal iyoboye urutonde rwa Shampiyona n’amanota 79, igakurikirwa na Manchester City ifite 77. Abo ni David Raya, Gabriel Magalhães na Declan Rice.

Ubwugarizi bwa Arsenal bugizwe na  Gabriel Magalhães bwinjijwe ibitego 26 mu gihe habura imikino ibiri David Raya amaze gukina imikino 18 atinjijweho igitego. Declan Rice yakinnye iminota irenga 300 muri uyu mwaka, ayifasha mu kibuga hagati, aho yaremye uburyo bwo gushaka ibitego bugera kuri 63.

Manchester City ifite Antoine Semenyo wayigezemo muri Mutarama uyu mwaka muri Bournemouth, aho amaze gutsinda ibitego 16 muri uyu mwaka birimo 10 yatsindiye AFC Bournemouth n’ibindi batandatu yatsindiye iyi kipe y’i Manchester.

Hari kandi Erling Haaland uri guhatanira iki gihembo ku nshuro ya gatatu, akaba ari gushaka n’igihembo cy’uwinjije ibitego byinshi (26), na cyo yaba yegukanye ku nshuro ya gatatu.

Bruno Fernandes wa Manchester United yatanze imipira 19 yavuyemo ibitego, aba umukinnyi wa gatatu watanze imipira myinshi mu mateka y’iyi Shampiyona, inyuma ya Thierry Henry watanze 20 mu 2002/03 na Kevin De Bruyne na we watanze 20 mu 2019/20.

Mu bakinnyi bazahembwa harimo n’abakiri bato, abo ni Kobbie Mainoo wa Manchester United, Mateus Fernandes wa West Ham, Lewis Hall wa Newcastle na Michael Kayode wa Brentford na Rayan Cherki wa Manchester City.

Abatoza bahataniye igihembo cy’umwaka, ni Kieth Andrews wa Brentford, Arteta wa Arsenal, Michael Carrick wa Manchester United FC, Le Bris wa Sunderland, Pep Guardiola wa Manchester City na Andoni Iraola wa AFC Bournemouth.

Ba uwa mbere mu kumenya amakuru agezweho!!!