Siporo ihuza abakire n’abakene muri Afurika-Perezida Kagame
Amakuru

Siporo ihuza abakire n’abakene muri Afurika-Perezida Kagame

NTAWITONDA JEAN CLAUDE

August 14, 2023

Perezida wa Repubulika y’u Rwanda Paul Kagame, yakomoje ku buryo siporo ari ikintu gikomeye cyane ku Mugabane w’Afurika kuko ihuza abantu bo mu ngeri zitandukanye, kandi kuri ubu ikaba ari n’isoko y’iterambere ry’ubukungu ku Rwanda n’ibindi bihugu byatangiye kureba ibirenze ibiboneshwa amaso.

Yakomoje ku kamaro ka siporo nyuma y’umuhango wo gushyira ibuye ry’ifatizo ahagiye kubakwa ibikorwa remezo bya siporo mu mushinga wiswe Zaria Court urimo n’uruhererekane rw’ibindi bikorwa remezo byitezweho kwihutisha urugendo rwo kugira u Rwanda igicumbi cy’imikino n’imyidagaduro muri Afurika.

Perezida Kagame yagize ati: “Hari byinshi bishobora gutezwa imbere hano ku mugabane wacu, kandi ibyo bihura n’ibindi bintu byinshi mu zindi nzego kandi muzi, si ibanga uko muri Afurika siporo ari ikintu gikomeye. Abakene n’abakire, buri wese afite uko agirana isano na yo buri munsi. Kandi ibyo bifasha ubushake bwo kuzamuka no mu zindi nzego z’iterambere. Siporo ifasha guteza imbere ibikorwa remezo, guteza imbere ubukungu, igira uruhare mu bukerarugendo, ikora ibintu byinshi.”

Yakomeje avuga ko siporo itarebana no kwicara abantu bagashimishwa n’imyiyereko ibaruhura, ko ahubwo ko ari ikintu kigari kiruta cyane  ibyo abantu babonesha amaso.

Umushinga wa Zaria Court Kigali watangijwe nka kimwe mu bikorwa byo kubaka Kigali nk’umujyi wa Siporo, kandi ni umushinga witezweho guhanga imirimo isaga 500 mu rwego rw’amahoteli n’ubukerarugendo.

Ni wo mushinga wa mbere ku mugabane w’Afurika ugiye kubakwa mu gace k’i Remera ya Kigali gasanzwe kamenyerewe mu bikorwa by’ubukerarugendo no kwakira abantu, hagiye guhindurwa ahahoze icyicaro cy’Ikigo cy’Igihugu cy’Ubuzima (RBC).

Biteganyijwe ko hoteli izubakwa nka kimwe mu bikorwa remezo biharangwa izaba ifite ibyumba 80 byakira abantu, resitora, aho kuganirira hejuru y’igisenge cy’inyubako, aho kuruhukira no gufatira amafunguro, ahagenewe gufatira amajwi n’amashusho n’ibindi bice bitandukanye.

Hagati muri site yatangiye gutegurwa, biteganyijwe ko hazubakwa ikibuga cyakira imikino itandukanye, ahazajya hakirirwa ibikorwa by’imikino inyuranye, amaserukiramuco, ibirori n’ibitaramo, amamurikagurisha n’ibindi birori.

Uyu mushinga kandi uzaba ugizwe n’ahantu h’ubucuruzi hitezweho gufasha abaturiye muri kariya gace n’abagasura kujya babona aho bahahira bitabagoye.

Biteganyijwe ko hari za kontineri zizahashyirwa zigahindurwa mu buryo bwa butike ku buryo hazaba hagaragara nk’isoko rirambye kandi rifatwa nk’irerero ry’ubucuruzi bakizamuka, by’umwihariko ubw’abagore cyangwa ba rwiyemezamirimo b’urubyiruko.

Biteganyijwe ko ibikorwa byo kubaka ibyo bikorwa remezo byose bizasoza mu kwezi k’Ugushyingo 2024 ku buryo ibihakorerwa bizatangira kugenda guhera muri Gashyantare 2025.

BK Arena ni uko yavutse, ibikorwa bikomeje kwaguka

Perezida Kagame yashimiye Masai Ujiri ukomeje gushora imari mu Rwanda, akomoza no ku buryo BK Arena yavutse, na bwo biturutse kuri uyu mushoramari bahuriye bwa mbere i Toronto muri Leta Zunze Ubumwe z’Amerika, ubwo yari yamutumiye ngo bajyanye kureba umukino wa All Stars.

Icyo gihe ngo byarangiye hubatswe BK Arena, ndetse abayobozi benshi b’Afurika baje kuyisura batahana umuhigo wo kubaka inyubako zimeze nkayo cyangwa nini cyane kuyirenza.

Yavuze ko icyo gikorwa remezo cyubatswe mu Rwanda cyabereye isomo n’ibindi bihugu, aboneraho gushimangira ko na Zaria Court Kigali izatangira gutyo ariko igakwirakwira n’ahandi muri Afurika.

Ati: “Ntibirangirira ahangaha, biragenda bigakwirakwira mu Rwanda hose, Akarere, no ku Mugabane wacu… Bihera ku kintu kimwe kigakomeza gukwirakwira…”

Yakomeje yizeza buri wese ko u Rwanda ruzakomeza gukora ibishoboka byose mu guteza imbere ibikorwa remezo birimo n’ibya siporo, ati: “Nk’igihugu twizeza ko tuzakora uko dushoboye. Uko dushoboye gushobora kuba kudahagije ariko tuzakomeza kugerageza, ariko kugira inshuti n’abafatanyabikorwa ntekereza ko bizakomeza gutanga umusaruro kandi bizagera ku rugero tubyifuzaho.”

Masai Ujiri yavuze ko icyerekezo cy’u Rwanda ku ishoramari ari cyo cyamuteye gushora imari ye mu mishanga ikomeye nka Zaria Court Kigali, ashima ko siporo ikomeje guhabwa agaciro kayo karenze gufasha abantu kuruhuka gusa.

Ati: “Tugomba guhagarika kubona siporo nk’ikintu cyo kudufasha kuruhuka gusa, tugomba kuyibona nk’amarushanwa ndetse n’amahirwe y’ishoramari n’ubucuruzi.”

Yavuze ko ibikorwa remezo bya siporo bikomeje gutera imbere mu Rwanda abibonamo kwiyongera kw’ishoramari, ihererekanwa ry’amafaranga n’amahirwe mashya y’imirimo ku rubyiruko, abacuruzi n’abandi benshi batanga umusanzu mu iterambere ry’Igihugu.

Amafoto: Village Urugwiro

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA