Uganda 107-105 Tanzania

Tanzania 123-118 Rwanda

Taliki 19-12-2022

Tanzania-Uganda (Gahanga-09h30)

Uganda-Rwanda (Gahanga-13h45)

Ikipe ya Uganda ikomeje kwitwara neza mu mikino y’irushanwa “Tri-Nation T20 Cup 2022″ ririmo kubera mu Rwanda  aho kugeza ku munsi wa 5 itaratsindwa umukino n’umwe.

Mu mikino y’umunsi wa 5 yabaye kuri iki cyumweru taliki 18 Ukuboza 2022, ikipe ya Uganda yatsinze Tanzania ku kinyuranyo cy’amanota 2.

Kubera ikirere umukino watinze gutangira kuko ikibuga cyari kigitose maze hemezwa ko hagomba gukinwa udupira 90 (15 Overs) aho kuba 120 (20 Overs).

Ikipe ya Uganda ni yo yabanje gutera agapira ishaka amanota «Batting » maze mu dupira 90 (15 Overs) ikora amanota 107  mu gihe abakinnyi 9 ari bo basohowe mu kibuga (9 Wickets).

Mu gice cya kabiri, ikipe ya Tanzania yatangiye gukubita agapira ishaka amanota «Batting» aho yasabwaga 108 ngo yegukane intsinzi. Mu dupira 90 (15 Overs)  yakoze amanota 105 mu gihe abakinnyi 9 ari bo basohowe mu kibuga ( 9 Wickets).

Ikipe ya Uganda yahise yegukana intsinzi ku kinyuranyo cy’amanota 2. Iyi kipe wari umukino wa 6 ikinnye ikaba yaratsinze 5 undi umwe iranganya ikaba itaratsindwa.

Umukinnyi wa Uganda, Cosmas Kyewuta yahawe igihembo nk’uwitwaye neza muri uyu mukino aho  yasohoye mu kibuga abakinnyi 4 ba Tanzania anakora amanota 5.

Mu mukino wa kabiri, ikipe y’u Rwanda yatsinzwe na Tanzania. Aya makipe yombi akaba yakinaga umukino wa 7.

Muri uyu mukino, ikipe y’u Rwanda ni yo yatangiye ikubita agapira ishaka amanota “Batting” aho mu dupira 120 (20 Overs)  yakoze amanota 118 , abakinnyi 9 bagasohorwa mu kibuga (9 Wickets).

Mu gice cya kabiri, ikipe ya Tanzania yasabwaga amanota 119 yatangiye gukubita agapira ishaka amanota « Batting » maze mu dupira 89 (14.5 Overs)  ikora amanota 123 mu gihe abakinnyi 4 ari bo basohowe mu kibuga (4 Wickets). Iyi kipe ya Tanzania ikaba yahise yegukana intsinzi.

Jumbe Salum Ally ukinira ikipe ya Tanzania ni we mukinnyi witwaye neza muri uyu mukino aho yasohoye mu kibuga abakinnyi 3 anakora amanota 16.

Nyuma y’imikino y’umunsi wa 5, Uganda irayoboye n’amanota 11, Tanzania iri ku mwanya wa kabiri n’amanota 7 naho ikipe y’u Rwanda iri ku mwanya wa 3 n’amanota 2.

Gahunda y’imikino y’umunsi wa 6

Kuri uyu wa Mbere  taliki 19 Ukuboza 2022, irushanwa rirakomeza hakinwa imikino y’umunsi wa 6 aho ikipe ya Tanzania ikina na Uganda (09h30) nyuma Uganda ikine n’u Rwanda (13h45). Imikino yombi irabera kuri Sitade Mpuzamahanga ya Gahanga.

Iri rushanwa ririmo kuba mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.

Ba uwa mbere mu kumenya amakuru agezweho!!!