Uganda 153-56 Rwanda

Rwanda 128-131 Tanzania

Taliki 18-12-2022

Tanzania-Uganda (Gahanga-09h30)

Tanzania-Rwanda (Gahanga-13h45)

Ikipe y’u Rwanda yitwaye neza itsinda Tanzania mu mukino w’umunsi wa kane  w’irushanwa “Tri-Nation T20 Cup 2022″ ririmo kubera mu Rwanda kuva taliki 13 Ukuboza 2022.

Imikino y’umunsi wa kane yabaye kuri uyu wa Gatanu taliki 16 Ukuboza 2022 ahakinwe imikino ibiri yose ibera kuri Sitade Mpuzamahanga ya Gahanga.

Umukino wa mbere wahuje ikipe y’u Rwanda na Uganda urangira Uganda itsinze ku kinyuranyo cy’amanota 97.

Muri uyu mukino,ikipe ya Uganda ni yo yatangiye ikubita agapira ishaka amanota « Batting » maze mu dupira 120 (20 Overs) ikora amanota 153 mu gihe abakinnyi 7 ari bo basohowe mu kibuga (7 Wickets).

Mu gice cya kabiri, ikipe y’u Rwanda yatangiye gukubita agapira ishaka amanota « Batting » aho yasabwaga 154 ngo yegukane intsinzi. Ubwo hari hamaze gukinwa udupira 92 (15.2 Overs), abakinnyi 10 b’u Rwanda basohowe mu kibuga bamaze gukora amanota 56. Ikipe ya Uganda ikaba yahise yegukana intsinzi ku kinyuranyo cy’amanota 97.

Umukinnyi wa Uganda, Henry Ssenyondo ni we watowe nk’uwitwaye neza aho yasohoye mu kibuga abakinnyi 4 b’u Rwanda (4 Wickets).

Mu mukino wa kabiri, ikipe y’u Rwanda yitwaye neza itsinda Tanzania uba ari na wo mukino wa mbere itsinze mu mikino 6 iyi kipe imaze gukina.

Muri uyu mukino, ikipe y’u Rwanda ni yo yatangiye ikubita agapira ishaka amanota “Batting”. Mu dupira 36 (6 Overs), ikipe  y’u Rwanda yari ifite amanota 46,  imvura  iragwa nyuma  kubera amasaha hemezwa ko hakinwa udupira 90 (15 Overs) aho kuba 120 (20 Overs). Umukino wakomeje ikipe y’u Rwanda  ikora amanota 128 mu gihe abakinnyi 7 ari bo basohowe mu kibuga (7 Wickets).

Mu gice cya kabiri, ikipe ya Tanzania yatangiye gukubita agapira ishaka amanota aho yasabwaga amanota 133 mu dupira 90 (15 Overs). Iyi kipe yakoze amanota 131 mu gihe abakinnyi 8 basohowe mu kibuga ( 8 Wickets).

Ikipe y’u Rwanda ikaba yahise yegukana intsinzi ku kinyuranyo cy’inota rimwe (1 run).

Niyitanga Wilson ukinira ikipe y’u Rwanda ni we witwaye neza muri uyu mukino aho yatsinze amanota 55 mu dupira 37.

 Nyuma y’imikino y’umunsi wa 4, Uganda irayoboye n’amanota 9, Tanzania iri ku mwanya wa kabiri n’amanota 5 naho ikipe y’u Rwanda iri ku mwanya wa 3 n’amanota 2.

Gahunda y’imikino y’umunsi wa 5

Kuri uyu wa Gatandatu tliki 17 Ukuboza 2022 ni umunsi w’ikiruhuko, imikino y’umunsi wa 5 biteganyijwe ko izaba ku Cyumweru taliki 18 Ukuboza 2022  aho ikipe ya Tanzania izakina na Uganda i Gahanga (09h30) nyuma iyi kipe ya Tanzania ikine n’u Rwanda i Gahanga (13h45).

Iri rushanwa ririmo kuba mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.

Ba uwa mbere mu kumenya amakuru agezweho!!!