U Rwanda mu guhuza imikorere n’abashinzwe ubuziranenge bw’Imiti muri Afurika
Amakuru

U Rwanda mu guhuza imikorere n’abashinzwe ubuziranenge bw’Imiti muri Afurika

Imvaho Nshya

August 24, 2023

Abakora mu Rwego rwo kugenzura ubuziranenge bw’imiti batangaje ko ibihugu by’Afurika bifatanya urugendo rwo kubaka ubudahangarwa mu gukora ndetse no gukoresha imiti y’umwimerere ku mugabane w’Afurika.

Banavuga ko hakenewe guhuza uburyo bw’imikorere mu rwego rwo korohereza abatuye uyu mugabane kubona imiti ku buryo bworoshye kandi buhendutse, bityou Rwanda rwijeje ko rwiteguye gukorana n’izindi nzego z’Afurika mu guharanira ubuziranenge bw’imiti n’ibikoresho by’ubuvuzi muri Afurika.

Byagarutsweho mu nama y’iminsi ibiri irimo kubera mu Mujyi wa Kigali, yahuje abahagarariye ibigo bishinzwe kugenzura ubuziranenge bw’imiti baturutse mu biguhugu 55 bitandukanye byo ku mugabane w’Afurika.

Ni ibiganiro byibanze ku gusuzuma uburyo hanozwa amategeko n’amabwiriza mu kugenzura imiti ndetse hanarebwa uburyo aya mabwiriza yahuzwa mu rwego rwo kunoza imikoreshereze n’imikorere y’imiti muri Afurika.

Dr Boitumelo Semete-Makotlela, Ukuriye akanama gashinzwe imiti no guhuza amategeko abigenga muri Afurika, yagaragaje inyungu zo guhuza imikorere muri uru rwego.

Yagize ati: “Uruhare rwacu rushingiye ko abagenzura ubuziranenge bagira amategeko amwe kugira ngo bitworohereze gukora.

Bivuze ko uburyo dukoramo, ibitugenga ndetse n’amabwiriza muri rusange byose bigomba kuba ari bimwe kugira ngo uwo ari we wese wifuza ko umuti we wemerwa mu gihugu runaka cyo ku mugabane w’Afurika, yaba mu Rwanda cyangwa muri Afurika y’Epfo ndetse n’ibindi, abikora mu buryo butamugoye kuko ibisabwa bigomba kuba ari bimwe hose.

Ibi tubikora mu buryo bwo korohereza abantu kuko ni uburenganzira”.

Muri ibi biganiro, hanatagajwe ku mugaragaro ibigo bine by’icyitegererezo bizajya byifashishwa mu kubaka ubushobozi mu bijyanye no gushyiraho amabwiriza mu gukora inkingo.

Ibyo bigo birimo icyo muri Ghana, Tanzania, Misiri n’icyo muri Afurika y’Epfo. 

Symerre Grey Johnson, Umuyobozi ushinzwe kubaka ubushobozi bw’abakozi n’iterambere ry’urwego mu Kigo cy’Afurika Yunze Ubumwe gishinzwe Iterambere (NEPAD), avuga ko ibihugu by’Afurika bikwiye kuzuzanya kugira ngo habeho imikorere inoze mu kigo gishinzwe kubahiriza amabwiriza y’ubuziranenge bw’imiti.

Ati: “Uruhare rwacu nk’ikigo cy’umuryango w’Afurika yunze ubumwe gishinzwe iterambere, ni ukugira ngo buri wese amenye inshingano ze n’uruhare rwe, tumenye uko twakuzuzanya, uko twakongererana ubushobozi ndetse n’uko twashishikariza ibihugu by’Afurika byose kugira ikigo kireberera inyungu z’Afurika n’Abanyafurika muri rusange”.

Kugeza ubu hashyizweho Ikigo Nyafurika gishinzwe gutsura ubuziranenge bw’imiti ‘African Medicine Agency’ kizaba gifite icyicaro mu Rwanda.

Iki kigo kizaba gifite inshingano zo gushyiraho amategeko ajyanye n’imiti hagamijwe kuzamura ubuziranenge ndetse no koroshya ikwirakwizwa ryayo ku mugabane w’Afurika.

Dr. Emile Bienvenu, Umuyobozi Mukuru w’Ikigo gishinzwe ubugenzuzi bw’ibiribwa n’imiti mu Rwanda (Rwanda FDA), avuga ko guhuza amategeko ajyanye n’imiti bifasha abaturage kubona imiti ku buryo bworoshye kandi buhendutse.

Agira ati: “Ni no kugira ngo isoko ry’Afurika ribe rimwe kandi rihuze imikorere, rikazanatanga umusaruro mwiza no ku giciro cy’imiti kuko ikibazo cyari gihari ni uko ibihugu byakora mu buryo butandukanye. Hariho Politiki y’ubuziranenge n’ibiciro by’imiti aho usanga ko imiti igera ku murwayi igura amafaranga ashobora kuba yabona”.

Ibiganiro bihurije hamwe abahagarariye ibigo biturutse mu bihugu 55 byo ku mugabane w’Afurika, bikaba biteganijwe ko inama izamara iminsi ibiri.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA