U Rwanda na Congo-Brazzaville bishaka kubona Isoko Rusange ry’Afurika rikora
Amakuru

U Rwanda na Congo-Brazzaville bishaka kubona Isoko Rusange ry’Afurika rikora

NTAWITONDA JEAN CLAUDE

July 22, 2023

Perezida wa Repubulika Paul Kagame yavuze ko u Rwanda na Congo-Brazzaville byatangiye urugendo rw’ubufatanye mu kwimakaza no kubyaza umusaruro Isoko Rusange ry’Afurika (AfCFTA), kuko ibihugu byombi binyotewe no kubona rikora rigahindura ubuzima bw’Abanyafurika. 

Perezida Kagame yabigarutseho kuri uyu wa Gatandatu mu kiganiro yagiranye n’abanyamakuru afatanyije na Perezida wa Congo Brazzaville Denis Sassou Nguesso uri mu ruzinduko rw’iminsi itatu mu Rwanda. 

Icyo kiganiro cyakurikiye umuhango wo gushyira umukono ku masezerano yo kurushaho kwihutisha ubutwererane bw’ubucuruzi n’ubukungu binyuze muri iryo Soko Rusange ry’Afurika rinini ku Isi rihuriyemo abasaga miliyari 1.3. 

Perezida Kagame na Sassou Nguesso ni bo bayoboye uwo muhango, ubwo amasezerano yasinywaga na Minisitiri w’Ubucuruzi n’Inganda Dr. Jean Chrysostome Ngabitsinze afatanyije na  Minisitiri w’Ububanyi n’Amahanga wa Congo-Brazzaville Denis Christel Sassou Nguesso.

Perezida Kagame yagize ati: “Turashaka kubona ubufatanye bushya bukomeza kuvuka hagati y’ibihugu byacu byombi, turashaka kubona ibihugu byombi bitera imbere kandi bikarushaho gukorana n’abaturage bose b’umugabane wacu.”

Yakomeje agira ati: “Hari intambwe imaze guterwa mu rwego rw’Isoko Rusange ry’Afurika. Turashaka guharanira ko rikora. Turashaka ko u Rwanda na Congo biba ku ruhembe rw’imbere mu guharanira ko iri terambere rikora mu nyungu z’umugabane wacu.”

U Rwanda na Congo byasinyanye amasezerano yo kwimakaza ubutwererane mu Isoko Rusange ry’Afurika

Ku mugoroba wo ku wa Gatanu, Perezida Kagame yakira ku meza Denis Sassou Nguesso n’itsinda ryamuherekeje muri uru ruzinduko, yavuze ko nk’abayobozi bafite inshingano zo gukora ibishoboka byose bafatanyije kugira ngo Abanyafurika bagere ku ntsinzi. 

Minisitiri w’Ububanyi n’Amahanga n’Ubutwererane Dr. Biruta Vincent, yavuze ko uruzinduko rwa Perezida wa Congo-Brazzaville rwabaye amahirwe yo gusuzuma intambwe imaze guterwa no kureba inzego zigomba kwitabwaho kurusha izindi. 

Yongeyeho ko isinywa ry’amasezerano y’ubucuruzi mu kwimakaza ubutwererane bw’ubukungu binyuze muri AfCFTA, ryashingiye ku bufatanye mu nzego z’ingenzi zirimo imishinga ishyigikira icyerekezo ibihugu byombi bihuriyeho cyo kwimakaza iterambere rirambye, imicungire y’umutungo kamere n’indi myinshi. 

Yagize ati: “Twishimiye kubona imishinga y’ubukungu itandukanye ishyirwa mu bikorwa hagati y’ibihugu byacu byombi mu nzego zinyuranye harimo urw’inganda, ubuhinzi ndetse n’ubucukuzi bw’amabuye y’agaciro.

Iyo mishinga igeze ku ngero zitandukanye ishyirwa mu bikorwa kandi twizera ko ari gahunda zizatanga inyungu nyinshi ku baturage b’ibihugu byacu.“

Ibiganiro byahuje abayobozi bo ku mpande zombi byasoje hasinywa amasezerano 33 y’ubutwererane n’ubufatanye, yose agamije kunoza imikoranire ya Kigali na Brazzaville mu guharanira iterambere ry’ibihugu byombi n’iry’Afurika muri rusange.

Muri uru  ruzinduko rwatangiye ku wa Gatanu taliki ya 21 Nyakanga, Perezida Sassou Nguesso yasuye  Urwibutso rwa Jenoside rwa Kigali, yaganirije abagize Inteko Ishinga Amategeko y’u Rwanda, ndetse uyu munsi yasuye Ishuri Rikuru ry’Ubuhinzi n’Ubworozi butangiza ibidukikije (RICA) riherereye mu Karere ka Bugesera.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA