U Rwanda na Latvia byemeje ubufatanye mu bya Politiki
Amakuru

U Rwanda na Latvia byemeje ubufatanye mu bya Politiki

NTAWITONDA JEAN CLAUDE

June 1, 2023

Mu gitondo cyo kuri uyu wa Kane taliki ya 1 Kamena, Guverinoma y’u Rwanda n’iya Latvia byasinyanye amasezerano y’ubufatanye mu bya Politiki. 

Ni amasezerano yashyizweho umukono na   Minisitiri w’Ububanyi n’Amahanga n’Ubutwererane Dr. Biruta Vincent n’Umunyamabanga wungirije wa Leta akaba n’Umuyobozi wa Politiki muri Minisiteri y’Ububanyi n’Amahanga ya Latvia, Andžejs Viļumsons. 

U Rwanda na Latvia ni ibihugu byatangiye umubano weruye mu bya dipolomasi guhera taliki 10 Mata 2007, kuva icyo gihe kugeza uyu munsi ubutwererane bwabyo bukaba bukomeje kwaguka uko bukeye n’uko bwije.

Ambasaderi w’u Rwanda mu Buholandi  Olivier Jean Patrick Nduhungirehe, ni na we uhagarariye inyungu z’Igihugu cye muri Latvia, nk’igihugu cyo ku mugabane w’u Burayi gikora ku nyanja ya Baltic kibarizwa hagati ya Lithuania na Estonia. 

Guverinoma ya Latvia igaragaza ubushake bwo gukorana n’u Rwanda mu kubyaza umusaruro amahirwe y’iterambere ari mu bihugu byombi yanagira uruhare mu kurushaho kwimakaza umubano wa byo. 

Ubwo Amb. Nduhungirehe aheruka kugirana ikiganiro n’Umunyabanga wa Leta Andris Pelšs mu ntangiriro za 2022, hagaragajwe ko hakenewe kongererwa imbaraga ibiganiro bya Politiki hagati y’ibihugu byombi, kimwe n’ubutwererane mu by’ubukungu ndetse no kwagura uburyo bw’amategeko bworoshya imikoranire. 

Amb. Nduhungirehe yagaragaje ko yifuza kurushaho kwigira ku bunararibonye bwa Latvia mu rwego rw’ikoranabuhanga mu isakazamakuru n’itumanaho, aboneraho guha ikaze abashoramari bo muri icyo gihugu bagaragaje ubushake bwo gushora imari yabo mu Rwanda. 

Ibihugu byamaze no kuganira ku butwererane bwabyo mu Muryango w’Abibumbye ndetse no mu yindi Miryango Mpuzamahanga.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA