U Rwanda na Seychelles byasinyanye amasezerano arimo n’aya gisirikare 
Amakuru

U Rwanda na Seychelles byasinyanye amasezerano arimo n’aya gisirikare 

NTAWITONDA JEAN CLAUDE

June 28, 2023

Kuri uyu wa Gatatu taliki ya 28 Kamena 2023, Perezida wa Repubulika y’u Rwanda Paul Kagame yagiranye ibiganiro byabereye mu muhezo na Perezida wa Seychelles Wavel Ramkalawan, bikurikirwa n’umuhango wo gushyira umukono ku masezerano y’ubufatanye atandukanye. 

Isinywa ry’amasezerano ni kimwe mu bikorwa by’ingenzi bikubiye mu ruzinduko rw’akazi rw’iminsi ibiri Perezida Kagame na Madamu Jeannette Kagame barimo i Victoria mu Birwa bya Seychelles.

Amasezerano y’ubutwererane hagati y’u Rwanda na Seychelles yashyizweho umukono arimo ayo mu rwego rw’ubuzima, igisirikare n’umutekano, iyubahirizwa ry’amategeko, ubuhinzi, ubukerarugendo n’ibirebana na Visa.

Perezida Paul Kagame yavuze ko u Rwanda na Seychelles ari ibihugu by’inshuti kandi bisangiye icyerekezo cy’iterambere ry’imibereho myiza n’ubuzima bw’abaturage, no kubakira ku bukerarugendo mu iterambere ry’ubukungu.

Perezida Kagame yashimangiye ko ibihugu byombi bisangiye byinshi birimo n’icyerekezo cy’iterambere, ati “Njye na Perezida Ramkalawan twagiranye ibiganiro by’ingirakamaro. Seychelles n’u Rwanda dushyize imbere kandi dusangiye icyerekezo cy’iterambere ry’imibereho myiza n’ubuzima bw’abaturage bacu bose dufatanyije n’abafatanyabikorwa bo mu karere n’ahandi.”

Perezida Kagame yashimye umubano urangwa hagati y’u Rwanda na Seychelles

Yakomeje agira ati: “Twubakiye ku mubano mwiza n’ubushuti, turifuza gushimangira kurushaho ubutwererane bwacu mu nzego z’ingirakamaro dufitemo inyungu twembi zirimo ubuzima, igisirakere n’umutekano, ubukerarugendo, ubuhinzi n’ibindi. Kuri Seychelles no ku Rwanda, ubukerarugendo ni urufunguzo rw’iterambere ry’ubukungu.”

Perezida Kagame yavuze ko ubufatanye bwageza ibihugu byombi kuri byinshi, by’umwihariko mu rwego rw’ubukerarugendo no kubaka ubudahangarwa bw’ubukungu. 

Yakomeje agira ati. “Ubukerarugendo butanga amahirwe atabarika ku ngendo zo mu ndege n’ubucuruzi, abikorera ku mpande zombi bakarushaho gukorera hamwe. Ibihugu byacu byombi bihuriye mu Miryango ya Commonwealth na Francophonie. Binyuze muri iyi miryango dufite uburyo bwo guharanira guhuza inyungu zacu n’uko tubona ibintu.” 

Biteganyijwe ko Perezida Kagame azageza ijambo ku Nteko Ishinga Amategeko ya Seychelles izwi nka Ile Du Port.

Ni ku nshuro ya Kabiri Perezida Kagame asuye igihugu cya Seychelles,  mu gihe kandi Perezida Ramkalawan na we yasuye u Rwanda mu kwezi kwa Kamena 2022 ubwo yari yitabiriye inama y’Abakuru b’Ibihugu na Guverinoma bihuriye muri Commonwealth (CHOGM).

Muri uru ruzinduko, Perezida Kagame na Madamu Jeannette Kagame ni abashyitsi b’icyubahiro mu birori byo kwizihiza Isabukuru y’imyaka 47 Ibirwa bya Seychelles bimaze bibonye ubwigenge.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA