U Rwanda nta nyungu rufite mu mutekano muke wa RDC –Amb.Gatete
Amakuru

U Rwanda nta nyungu rufite mu mutekano muke wa RDC –Amb.Gatete

Imvaho Nshya

September 29, 2023

Ambasaderi w’u Rwanda mu Muryango w’Abibumbye Gatete Claver, yagaragaje ko u Rwanda rushyigikiye inzira zatekerejwe ndetse zikemeranywaho n’Akarere mu gukemura ibibazo biri muri Repubulika Iharanira Demokarasi ya Congo (RDC), ashimangira ko nta nyungu rwakura muri uyu mutekano muke w’icyo Gihugu.

Yabigarutse i New York muri Leta Zunze Ubumwe z’Amerika (USA), ku wa Kane taliki ya 28 Nzeri 2023, ubwo yari mu Nama y’Akanama ka Loni Gashinzwe Umutekano ku Isi.

Amb.Gatete yagaragaje ko amahoro n’umutekano by’u Rwanda n’Akarere k’Afurika y’Iburasirazuba, bibangamiwe cyane no kuba RDC ikomeje gutera inkunga y’intwaro n’ubushobozi Umutwe w’Iterabwoba wa FDLR, wiganjemo abasize bakoze Jenoside yakorewe Abatutsi mu 1994.

Amb. Gatete yavuze ko u Rwanda rudafite inyungu na nke mu bibazo by’intambara n’umutekano muke uri mu Burasirazuba bwa Repubulika Iharanira Demokarasi ya Congo.

Ati: “U Rwanda nta nyungu rufite mu mutekano muke wa RDC, bityo rushaka kongera gushimangira ko rushyigikiye byimazeyo ingamba zafashwe ku rwego rw’Akarere.”

Amb. Gatete kandi yavuze ko hari ibihugu byateye imbere bifite inyungu mu bibazo byo mu Karere no mu Burasirazuba bwa Congo by’umwihariko.

Ati: “Abashaka kuririra ku makimbirane ku bw’inyungu zabo bwite muri Politiki, ni bo bakomeje ibikorwa bigamije kuyobya uburari. Kuri ibi hiyongeraho ibikorwa bya bimwe mu bihugu bikomeye bishaka kunezeza Guverinoma ya Repubulika Iharanira Demokarasi ya Congo kugira ngo babone uko bakurikirana inyungu zabo.

Ariko ugasanga bishyirwa ku Rwanda, nyamara ibi ntacyo bifasha uretse kuzambya umutekano muri RDC. Iki ni ikibazo gisaba ko aka kanama, kakirebana ubushishozi.”

Amb. Gatete yatangarije  Akanama ka Loni gashinzwe umutekano ko u Rwanda n’Akarere bihangayikishijwe n’uko Guverinoma ya RDC ikomeje gutera inkunga umutwe wa FDLR n’indi yitwaje intwaro ibarizwa mu mashyamba yo mu Burasirazuba bwayo.

Ati: “U Rwanda rukomeje guhangayikishwa n’uko Guverinoma ya Kinshasa iha intwaro umutwe wasize ukoze Jenoside yakorewe Abatutsi ari wo FDLR ikanafasha indi mitwe y’abenegihugu. Imyitwarire y’iyi mitwe n’ubufatanye bwayo n’Ingabo za Congo (FARDC) bikongeza amakimbirane kandi bibangamiye ibikorwa n’ingamba nziza zigamije amahoro.”

Leta ya Congo iyobowe  na Perezida Félix Antoine Tshisekedi Tshilombo, yakomeje kwinangira yanga gushyira mu bikorwa ibiteganywa n’amasezerano yagiye ashyirwaho umukono mu bihe bitandukanye hagamijwe gushakira umuti ibibazo biri mu gihugu cye.

Muri ayo masezerano harimo asaba Leta ya Congo guhagarika imikoranire n’umutwe w’Iterabwoba wa FDLR wiganjemo abasize bakoze Jenoside yakorewe Abatutsi mu 1994.

Amb. Gatete ati: “Ku bw’ibyo rero, aka kanama gakwiye gusaba Repubulika Iharanira Demokarasi ya Congo gushyira mu bikorwa inshingano zayo zo kwitandukanya na FDLR no kohereza abarwanyi bayo mu gihugu bakomokamo mu maguru mashya, nk’uko biteganywa n’amasezerano y’i Luanda n’ay’i Nairobi.”

Yongeyeho ati: “Nk’uko byavuzwe mu bihe byashize, ubwiyongere bw’imvugo na disikuru zibiba urwango ku baturage b’Abanyekongo bavuga Ikinyarwanda bijyana no kubica ndetse no gusahura no kwigarurira imitungo yabo, biteye ikibazo gikomeye haba ku Rwanda n’Akarere k’Afurika y’Iburasirazuba.”

U Rwanda rwakunze kugaragaza ko nta ruhare na ruto rufite mu bibazo biri muri RDC, ko ahubwo uyu muturanyi warwo aramutse abishyizemo ubushake, yabibonera umuti.

Ambasaderi Gatete yagaragaje ko u Rwanda ruzakomeza kwita no kwakira abaturage b’Abanyekongo bakurwa mu byabo n’intambara bagahungira mu Rwanda dore ko ubu imyaka isaga 20 ishize  bakomeje guhunga kubera intambara za hato hato zikomeje kwiyongera mu burasirazuba bwa Congo.

ZIGAMA THEONESTE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA