U Rwanda n’u Burusiya byizihije isabukuru y’imyaka 60 y’ubutwererane
Amakuru

U Rwanda n’u Burusiya byizihije isabukuru y’imyaka 60 y’ubutwererane

Imvaho Nshya

October 17, 2023

Kuri uyu wa 17 Ukwakira 2023, u Rwanda n’u Burusiya byizihije isabukuru y’imyaka 60 bimaze bifitanye umubano uzira amakemwa, Guverinoma y’u Rwanda ikaba yishimira ko uwo mubano ushingiye ku bwubahane n’ubworoherane.

Minisiteri y’Ububanyi n’Amahanga n’Ubutwererane (MINAFFET), mu butumwa yanyujije ku mbuga nkoranyambaga, yagize iti: “Uyu munsi ni isabukuru y’imyaka 60 y’umubano w’u Rwanda n’u Burusiya mu bya Dipolomasi. U Rwanda rurashima umubano mwiza rufitanye n’u Burusiya ushingiye ku bwubahane n’ubwumvikane.”

Minisiteri y’Ububanyi n’amahanga y’u Burusiya, na yo yagize iti: “Mwishyuke nshuti zacu z’Abanyarwanda kuri iyi sabukuru duhuriyeho! Tuzakomeza gukorana namwe mu nyungu z’ibihugu byombi n’abaturage babyo.”

Umubano w’u Rwanda n’u Burusiya watangiye ku wa 17 Ukwakira 1963 nyuma y’aho ku wa 30 Kamena 1962 icyo gihugu cyari muri Leta Zunze Ubumwe z’Abasoviyeti (Soviet Union) cyohereje ubutumwa bwa telegram i Kigali, cyemeza u Rwanda nk’igihugu cyigenga bunemeza ko bwiteguye gutangiza umubano mu bya dipolomasi.

Muri Mutarama 1992, u Rwanda na rwo rwemeje u Burusia nk’Igihugu cyigenga nyuma y’uko Umuryango  Soviet Union wasenyukaga.

Biitewe n’ibibazo by’ubukungu nyuma ya Jenoside yakorewe Abatutsi mu 1994, u Rwanda rwafunze by’agateganyo Ambasade yarwo i Moscow mu mpera z’umwaka wa 1995, maze ibikorwa byayo byimurirwa muri Ambasade y’u Rwanda i Berlin mu Budage kugeza muri Werurwe 2013.

Muri uwo mwaka wa 2013 ni bwo Leta y’u Rwanda yatangaje Ambasaderi w’u Rwanda mu Burusiya ufite icyicaro i Moscow. Uyu munsi Ambasaderi Lt. Gen. Mushyo Kamanzi ni we uhagarariye inyungu z’u Rwanda mu Burusiya nyuma yo guhabwa izo nshingano mu Gushyingo 2019.

Ni mu gihe Ambasaderi w’u Burusiya mu Rwanda ari Karen Chalyan wahawe izo nshingano na Perezida w’icyo gihugu Vladmir Putin muri Werurwe 2018.

Ibihugu bifatanya mu nzego zitandukanye zirimo iz’ubukungu. Ikoranabuhanga n’izindi. Mu kwezi k’Ukwakira 2019, u Rwanda n’u Burusiya byasinyanye amasezerano y’ubufatanye mu kwimakaza ikoreshwa ry’ingufu z’Atomike mu buryo butekanye bugamije iterambere.

Ayo masezerano anajyanye n’urugendo u Rwanda rwatangiye rwo kubaka Ikigo kigezweho cyimakaza ubumenyi n’ikoranabuhanga mu kubyaza umusaruro Ingufu z’Atomike, aho n’abazakora muri urwo rwego bemerewe kwihugurira ku ikoranabuhanga rigezweho mu Burusiya.

U Burusiya bukomeje kwimakaza ubutwererane buzira amakemwa n’u Rwanda kimwe n’ibindi bihugu by’Afurika.

Mu kwezi kwa Mata, ubwo Perezida Kagame yari mu ruzinduko mu bihugu byo mu Burengerazuba bw’Afurika, yavuze ko u Burusiya bufite uburenganzira busesuye bwo kwagura umubano aho ari ho hose ku Mugabane w’Afurika nk’uko bimeze no ku bindi bihugu.  

Ni mu gihe ibihugu byo mu Burengerazuba bw’Isi bigerageza gukururira Afurika mu bibazo bya Politiki bifitanye n’u Burusiya cyanfgwa ibishamikiye ku ntambara icyo gihugu gifitanye na Ukraine.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA