U Rwanda rugiye kongera serivisi za Leta zitangirwa ku ikoranabuhanga
Amakuru

U Rwanda rugiye kongera serivisi za Leta zitangirwa ku ikoranabuhanga

NTAWITONDA JEAN CLAUDE

January 6, 2023

Leta y’u Rwanda yatangaje ko serivisi za Leta zitangirwa ku ikoranabuhanga hifashishijwe ikoranabuhanga zigiye kongerwa nyuma yo kwakira inguzanyo ya miliyoni 37 z’Amayero (miliyari zisaga 41 z’amafaranga y’u Rwanda) n’impano ya miliyoni 1.2 z’Amayero (asaga miliyari 1.3 Frw).

Minisiteri y’Imari n’Igenamigambi yatangaje ko iyo nguzanyo n’impano bizifashishwa mu mushinga ugamije kurushaho kunoza imitangire ya serivisi hifashishijwe ikoranabuhanga no gushyigikira udushya tugira uruhare rukomeye mu iterambere ry’Igihugu.

Byagarutsweho kuri uyu wa Gatanu taliki ya 6 Mutarama 2023, nyuma yo gushyira umukono ku masezerano u Rwanda rwasinyanye n’Ikigo cy’u Bufaransa gishinzwe Iterambere Mpuzamahanga (AFD).

Ni amasezerano yashyizweho umukono na Minisitiri w’Imari n’Igenamigambi Dr. Ndagijimana Uzziel hamwe n’Umuyobozi wa AFD mu Rwanda Arthur Germond washimye umuhate u Rwanda rukomeje gushyira mu kwimakaza ikoranabuhanga.

Mu nzego z’ingenzi zerekejweho umutima cyane muri Gahunda ya Guverinoma y’Imyaka 7 yo Kwihutisha Iterambere (NST 1), u Rwanda rwihaye intego yo kwigaragaza mu ruhando mpuzamahanga nk’igihugu cyubatse ubukungu bushingiye ku bumenyi bujyana no gutanga serivisi zinoze no kwaira neza abaturage mu nzego za Leta n’iz’abikorera.

Serivisi za Leta ziracyagirwaho ingaruka n’imikorere y’ihuzanzira rya mudasobwa rishaje, ndetse haracyari amahirwey’ububiko bwo mu isanzure butarabyazwa umusaruro mu kubika amakuru yo mu gihugu.

Nyuma y’aho Guverinoma y’u Rwanda iboneye umusaruro ukomeye mu ikoreshwa ry’ikoranabuhanga nko mu gukwiza amaraso agenewe indebe ku bigo nderabuzima, ikomeje kugaragaza ubushake bwo kwihutisha umusaruro utanga n’izo ndege nto zitagira abapilote kimwe n’irindi koranabuhanga.

Minisitiri Dr Uzziel Ndagijimana yagize ati: “Iyi nkunga igiye gushyigikira imbaraga Leta y’u Rwanda ishyira mu kubaka ibikorwa remezo by’ihuzanzira rya internet rikoresha mu biro, gutangiza ikigo gishinzwe ububiko bw’amakuru yo mu isanzure ndetse no kubaka Santeri y’Ibikorwa bya Dreone. Umugambi ni uwo kunoza imikorere y’inzego za Leta n’imitangire ya serivisi, guteza imbere urwego rwa drones mu bikorera, gushyigikira itegurwa rya Politiki no kugenzura imikorere y’inzego za Leta. Izanafasha kandi mu gushyigikira ihangwa ry’udushya n’iterambere ry’ubukungu bishingiye ku makuru y’Isanzuren’atangwa na za drones.”

Guverinoma y’u Bufaransa yiyemeje gutera inkunga iyo ntumbero y’u Rwanda n’inguzanyo ya miliyari 41 z’amafaranga y’u Rwanda ndetse n’impano ya miliyari 1.3 Ftw.

Byitezwe ko iyo nkunga igiye gufasha mu kuvugurura ibikorwa remezo by’ihuzanzira rya internet ryifashihswa n’inzego za Leta, by’umwihariko ibifite uburyo bihuza serivisi n’abaturage nko mu Biro by’Uturere, Imirenge, ku Bitaro ndetse no mu bindi bigo bya Leta. Intego yamukuru ni ukurushaho kunoza imitangire ya serivisi za Leta zihabwa abaturage ku gihe.

GeoHub ni kimwe muri ibyo bikorwa remezo cyitezweho kuzifashishwa mu kubika amakuru yose, ubwo bubiko bukaba buzacungwa n’Ikigo cy’Igihugu gishinzwe Isanzure (RSA). Ni ububiko w’amakuru buzafasha kubakira iterambere rirambye ku makuru ashingiye ku bihamya bifatika, gutegura igenamigambi rihamye, ubugenzuzi n’ubushakashatsi kuri Politiki za Leta mu nzego zinyuranye uhereye ku iterambere ry’imijyi, guhangana n’ibiza, ubuzima, ubuhinzi n’ibindi.

Nanone kandi AFD izashyigikira iterambere ry’urwego rw’indege nto zitagira abapilote (drones) aho u Rwanda rumaze kugaragaza itandukaniro rwubaka Igo cy’Icyitegererezo nka Santeri y’ibikorwa bya drones mu Rwanda (Drone Operations Center/DOC) iherereye mu Karere ka Huye.

Biteganyijwe ko iyo santeri izafasha mu kongera amahirwe y’imikoreshereze y’indege nto zitagira abapilote, bikaba biteganyijwe ko iyo santeri izacungwa n’Ikigo cyigenga.

Miliyoni 1.2 y’Amayero u Rwanda rwakiriye nk’impano izifashishwa mu gushyigikira ubunararibonye bw’u Bufaransa muri uyu mushinga wateguwe n’Umuryango w’Ubutwererane b’Umuryango w’Ubumwe bw’u Burayi (D4D Hub) ari na wo wateye inkunga itegurwa ryawo.

Arthur Germond wa AFD Rwanda yagize ati: “Tunejejwe no gushyira umukono kuri uyu mushinga, ni yo nkunga ya mbere AFD iteye u Rwanda mu rwego rw’ikoranabuhanga! Ni ukubera ko izafasha itangwa ryaserivisi za Leta zinoze mu bigo bitandukanye, uyu mushinga uzafasha mu kugabanya icyuho cyari mu  kugera kuri serivisi mu Murwa Mukuru no mu bindi bice by’igihugu.

Yakomeje avuga ko uyu mushinga uzarushaho kurehereza amahanga gusura u Rwanda kandi uzanareme amahirwe mashya y’ubukungu by’umwihariko mu Karere ka Huye aharimo gutezwa imbere urwego rw’indege nto zitagira abapilote.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA