U Rwanda rurateganya gutumiza ‘smartphones’ zakorewe muri Pakistan
Amakuru

U Rwanda rurateganya gutumiza ‘smartphones’ zakorewe muri Pakistan

Imvaho Nshya

November 2, 2023

Leta y’u Rwanda yagaragaje ubushake bwo gutangira gutumiza telefoni zigezweho (smartphones) zakorewe muri Pakistan nka bumwe mu buryo bwo kurushaho kwimakaza umubano ushingiye ku bucuruzi hagati y’ibihugu byombi.

Igihugu cya Pakistan gikomeje kwigaragaza mu ruhando mpuzamahanga nyuma, y’aho kuva mu mwaka wa 2021 gitangiye gukora telefoni zigezweho zifata umuyoboro unyaruka wa internet (4G).

Cyahise cyohereza telefoni za mbere mu bihugu birimo Leta Zunze Ubumwe z’Abarabu (UAE) n’ibindi bikomeje gahunda yo gukwirakwiza telefoni zigezweho, ziramba kandi zihendukiye buri wese.

Ubushake bw’u Rwanda bwo gutumiza telefoni zakorewe muri Pakistan bwakomojweho na Perezida wa Sena Dr. Kalinda François-Xavier, mu ruzinduko aheruka kugirira i Islamabad muri Pakistan guhera mu ntangiriro z’iki cyumweru.

Ku wa Kabiri, ni bwo Dr. Kalinda n’itsinda ryari rimuherekeje bahuye na Minisitiri w’Ububanyi n’Amahanga w’agateganyo Jalil Abbas Jilani, baganira ku nzego zirimo ubucuruzi, ishoramari no guhererekanya ubunararibonye bushingiye ku muco.

Nanone kandi iryo tsinda ryahuye na Minisitiri w’Ikoranabuhanga n’Itumanaho w’agateganyo Dr. Umar Saif, ari na ho mu ngingo baganiriyeho harimo ijyanye no kuba telefoni zikorerwa muri Pakistan zatangira koherezwa mu Rwanda.

Minisitiri Dr. Umar Saif yavuze ko ubushake bw’u Rwanda bwo gutumiza telefoni zigezweho zakorewe muri Pakistan buzaganirwaho n’inganda  zitandukanye zikora telefoni zigezweho muri icyo gihugu.

Dr. Kalinda n’itsinda bari kumwe bakiriwe na Perezida wa Pakistan Dr Arif Alvi

Yashimangiye ko hakomeje kugaragara ubushake bw’ibihugu by’amahanga byo gushora no kugura ibikorerwa muri Pakistan, aho ibihugu by’Afurika byinshi birimo n’u Rwanda bikomeje kwigaragaza nk’isoko ryagutse rya telefoni zigezweho zikorewe muri Pakistan.

Minisitiri Dr. Umar Saif yongeyeho ko ibiganiro byahise bitangira harebwa uko bashobora guhaza ubusabe bw’u Rwanda, kuri ubu rukomeje gahunda yo kugeza telefoni zigezweho ku  ngo zose zo mu Rwanda, intego igomba kugerwaho bitarenze mu mwaka wa 2026.

Yashimangiye ko u Rwanda rwitezweho kuba isoko ry’ingenzi rya smartphones zikorewe muri Pakistan mu gihe umubano w’ibihugu byombi ukomeje kwiyongera mu nzego zitandukanye, by’umwihariko urw’ubucuruzi.

Hagati aho, ku wa Gatatu Dr. Kalinda yanahuye na Perezida wa Pakistan Dr Arif Alvi, bagirana ibiganiro byibanze ku gushima umubano w’u Rwanda watangiye muri Nyakanga 1962 ukaba ukomeje gutera imbere mu buryo bugaragara.

Dr. Karinda yaboneyeho kumenyesha Perezida wa Pakistan ubutumwa bwa Perezida wa Repubulika y’u Rwanda Paul Kagame, bw’uko u Rwanda ruteganya gufungura Ambasade yarwo i Islamabad, mu Murwa Mukuru w’icyo gihugu.

Ni mu gihe kuri ubu u Rwanda ruhagarariwe n’Ambasade yarwo ibarizwa i Beijing mu Bushinwa, kandi Pakistan yo yaramaze gufungura Ambasade yayo i Kigali kuva muri Werurwe 2021.

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA