U Rwanda rushaka gukemura inzitizi mu ikoranabuhanga- Dr Ngirente  
Amakuru

U Rwanda rushaka gukemura inzitizi mu ikoranabuhanga- Dr Ngirente  

NTAWITONDA JEAN CLAUDE

October 10, 2022

“U Rwanda ruzakomeza gufatanya n’ibindi bihugu mu gukomeza kwagura umuyoboro mugari w’ikoranabuhanga (Broadband Connectivity) n’iterambere ry’ibikorwa remezo. U Rwanda rufite ubushake mu gukemura inzitizi zijyanye no guhererekanya amakuru, gukoresha neza ubwenge muntu butari karemano no kongera imikoranire mu guhanga ibishya mu ikoranabuhanga.”

Ayo magambo ari mu butumwa Minisitiri w’Intebe Dr. Ngirente Edouard yagejeje ku bitabiriye Inama Mpuzamahanga ku Ikoranabuhanga (Tallinn Digital Summit/TDS 2022) iteraniye muri Estonia, aho yahagarariye Perezida wa Repubulika y’u Rwanda Paul Kagame.

Iyi nama y’iminsi ibiri iribanda ku ishyirwaho ry’ikoranabuhanga n’ubufatanye byizewe muri iyi Si aho, ubwenge muntu butari karemano n’irindi koranabuhanga rigezweho, byose bisaba ubufatanye mu gucunga umutekano no guharanira ubwisanzure bw’abaturage ku makuru yabo anyura ku ikoranabuhanga.

Dr Ngirente, yatangaje ko u Rwanda kimwe n’ibindi bihugu bitandukanye birangamiye kugeza umuyoboro mugari w’itumanaho ku baturage babyo mu guharanira ko nta n’umwe usigara inyuma y’abandi mu Isi irimo kwihuta vuba mu ikoranabuhanga.

Yagize ati: “Kugira ngo ibyo tubigereho, hakenewe ubufatanye n’ubwuzuzanye bitanga umusaruro. Ni yo mpamvu duteraniye hano.

Minisitiri w’Intebe Dr Edouard Ngirente yavuze ko icyorezo cya COVID-19 cyagaragaje ko hakwiye imikoranire mu guteza imbere ikoranabuhanga. Yagaragarije abitabiriye iyi nama ko u Rwanda ari Igihugu gishyize imbere imikorere n’imikoranire  bishingiye ku ikoranabuhanga.

Yatanze urugero rw’uko ubu serivisi za Leta zitangwa mu buryo bw’ikoranabuhanga ku kigero kiri hejuru ya 90%, ati: “Ikoranabuhanga ririmo guhindura Isi, dushingiye ku bunararibonye twavanye muri COVID-19 twabonye impinduramatwara zigamije kwihutisha ikoranabuhanga.  Ku Rwanda kimwe n’ibindi bihugu byinshi, umuyoboro mugari w’ikoranabuhanga (Broadband) ni ingenzi cyane mu mikorere yacu mu gihe duharanira ko ntawusigara inyuma muri iki gihe Isi irimo kwihuta mu ikoranabuhanga.”

Yakomeje avuga ko ibintu by’ingenzi bizatuma iri koranabuhanga rikomeza kugera hose birimo umutekano w’ikoranabuhanga, amategeko arigenga n’ubumenyi, ikoranabuhanga n’ibikorwa remezo byaryo bigezweho.

Yakomeje agira ati: “ Serivisi nyinshi zitangwa mu buryo bw’ikoranabuhanga uko ni ukuri haba mu nzego za Leta n’urwego rw’abikorera, mu Rwanda hejuru ya 90% bya serivisi za Leta zitangwa hifashishijwe uburyo bw’ikoranabuhanga, kandi dukomeje gushyira imbaraga mu ikoranabuhanga kugira ngo tuzagere ku ntego yo gutanga serivisi zose za Leta ku ikoranabuhanga 100% muri 2024.”

Yavuze ko iterambere ry’ikoranabuhanga rigomba kugendana n’ingamba zikaze mu guhangana n’ibitero by’ikoranabuhanga, aboneraho gushimangira ko zimwe mu mbogamizi zikomeye zishingiye ku byaha by’ikoranabuhanga ari uko bitagira imipaka.

Minisitiri w’Intebe wa Estonia Kaja Kallas we yagaragaje ko igihe cy’ibihugu bidashaka gufatanya n’ibindi mu rugendo rwo kwimakaza ikoranabuhanga mu buzima bwa buri munsi kirimo kurangira, bityo iterambere ry’ikoranabuhanga rikwiye gushingira ku kwizerana hagati y’ibihugu.

Ati: “Tugomba kwigira ku masomo ko guhora twishingikirije ku bandi cyane atari byiza, tugomba gukora ibishoboka byose kugira ngo habeho ubwisanzure, uburumbuke, umutekano na demokarasi. Mureke dufatanyirize hamwe, reka twese tugire intego zimwe zo kubaka ejo hazaza, ku bufatanye n’abavandimwe bo muri Leta Zunze Ubumwe z’Amerika, G7, muri Pasifika, Afurika n’ahandi.”

Yavuze ko inama iteraniye i Tallin ari urubuga rwagutse rugamije gushyigikira imikorere ihuriweho mu guharanira intego zimwe mu iterambere.  Estonia ni kimwe mu bihugu biteye imbere cyane mu ikoranabuhanga kikaba gifite imikoranire n’u Rwanda muri uru rwego rwo guteza imbere ikoranabuhanga.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA