U Rwanda rwakiriye inama itegura iy’Abaminisitiri yiga ku butumwa bw’amahoro
Amakuru

U Rwanda rwakiriye inama itegura iy’Abaminisitiri yiga ku butumwa bw’amahoro

Imvaho Nshya

October 23, 2023

Kuri uyu Mbere tariki 23 Ukwakira 2023, u Rwanda rwakiriye inama y’iminsi ibiri itegura Inama y’Umuryango w’Abibumbye yo ku rwego rwa ba Minisitiri yiga ku butumwa bw’Umuryango w’Abibumbye yitezwe kubera i Accra muri Ghana ku ya 5 n’iya 6 Ukuboza 2023.

Minisitiri w’Ingabo Marizamunda Juvenal, ni we wayoboye iyo nama yateraniye i Kigali hagamijwe gutegura ibizaganirwaho n’Abaminisitiri mu birebana no gucunga umutekano w’abasivili ndetse n’ibijyanye n’itumanaho rinoze.

Ni inama u Rwanda rwakiriye rufatanyije n’Igihugu cya Indonesia, u Buholandi n’Ubwami bw’u Bwongereza (UK).

Minisitiri w’Ingabo Marizamunda Juvenal yavuze ko iyo nama ije mu gihe ibikorwa by’ubutumwa bwo kubungabunga amahoro ku Isi bihanganye n’imbogamizi zikomeye aho bikorera.

Minisitiri Marizamunda yagize ati: “Izo mbogamizi zirakomeye cyane by’umwihariko ku birebana n’inshingano z’ingenzi zo kurinda abasivili aho ibihuha, guhimba amakuru n’imvugo z’urwango bikomeje gukwirakwizwa cyane kurusha uko byahoze binyuze mu mbuga nkoranyambaga.”

Yakomeje avuga ko ibindi bibazo bigaragara cyane mu butumwa bwo kubungabunga amahoro bw’Umuryango w’Abibumbye ari ubwiyongere bw’imitwe yitwaje intwaro, intambara zishingiye ku bukungu, ihohotera rishingiye ku gitsina, ibyaha byateguwe, gucuruza ibiyobyabwenge n’ibindi byinshi.

Minisitiri Marizamunda ati: “Nta butumwa bw’amahoro na bumwe ku Isi butabangamiwe n’izo ngorane.”

Yakomeje ashimangira ko no kubahiriza ibintu byose abaturage baba biteze ku boherejwe mu butumwa bw’amahoro na yo ari imbogamizi ikora ku butumwa bw’amahoro bwose aho buva bukagera.

Yavuze ko ari ah’Umuryango Mpuzamahanga kwimakaza ikoranabuhanga rigezweho mu rwego rwo korohereza abari mu butumwa bw’amahoro kuzuza inshingano, banyomoza amakuru y’ibihuha ndetse no gusenya isura mbi yubakwa ku butumwa bw’Umuryango w’Abibumbye ku rwego mpuzamahanga.

Minisiteri y’Ingabo mu Rwanda ivuga ko Inama yiga ku Butumwa bw’amahoro y’Umuryango w’Abibumbye yo ku rwego rwa ba Minisitiri ari ingenzi  ku bihugu bihuriye mu Muryango hagamijwe guhuza imbaraga zo kurushaho kunoza ibikorwa by’ubutumwa bw’Umuryango w’Abibumbye n’umusaruro bitanga ku baturage bigenewe.

Ni inama yo ku rwego rwo hejuru iba buri nyuma y’imyaka ibiri, ikaba yitabirwa na ba Minisitiri b’Ububanyi n’Amahanga ndetse na ba Minisitiri b’Ingabo.

Mu mwaka wa 2014 ni bwo izo nama zatangiye guterana ariko zikaba zinajyana n’iz’Abakuru b’Ibihugu, izaherukaga zikaba zarabereye i Seoul muri Korea y’Epfo.   

NTAWITONDA JEAN CLAUDE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA