U Rwanda rwanenze FARDC yarwibasiye ishingiye ku makuru y’ibinyoma
Amakuru

U Rwanda rwanenze FARDC yarwibasiye ishingiye ku makuru y’ibinyoma

Imvaho Nshya

July 20, 2023

Guverinoma y’u Rwanda yanenze ubuyobozi bw’Ingabo za Repubulika Iharanira Demokarasi ya Congo (FARDC) bwasohoye itangazo ryibasira u Rwanda ari na ko rikongeza ikibatsi cy’umwuka mubi urangwa hagati y’ibihugu byombi, rishingiye ku makuru y’ibinyoma. 

Ku wa 19 Nyakanga ni bwo itangazo ryasinyweho n’Umuvugizi w’Ingabo za FARDC Maj. Gen. Ekengé Bomousa Efomi Sylvain, ryasohotse rishinja Ingabo z’u Rwanda (RDF) gutangaza ko zigiye kwinjira ku butaka bwa RDC. 

Abyemeza nk’uwabihagazego, yamenyesheje Umuryango Mpuzamahanga ko RDF yiteguye kugaba igitero ku butaka bw’i Masisi, Rutshuru na Nyiragongo kugira ngo isibanganye ibimenyetso byo kuba yarigeze kugera ku butaka bwa Congo. 

Yavuze kandi ko “RDC yiteguye gusubiza na yo igaba igitero ku Rwanda ubwo RDF izaba yinjiye muri Congo.”

Birashoboka ko ubuyobozi bwa FARDC bwashingiye ku matangazo y’ibihuha akorwa n’abakoresha imbuga nkoranyambaga bashaka kwireherezaho ababakurikira, cyangwa se byakozwe ku bushake hagamijwe guha igisobanuro umugambi wo guhungabanya umutekano w’u Rwanda. 

Maj. Gen. Ekengé we yavuze ko iryo tangazo ryasohotse ku ya 18 Nyakanga nyamara nta tangazo ubuyobozi bw’Ingabo z’u Rwanda bwasohoye kuri iyo taliki ryerekeye Congo cyangwa gahunda yo kohereza abasirikare muri icyo Gihugu. 

Maj. Gen. Ekengé we avuga ko RDF yatangaje yiteguye ku butaka bwa Congo yitwaje ko izaba igiye kurwanya umutwe w’iterabwoba wa FDLR. 

U Rwanda ruvuga ko rutigeze rutangaza iryo tangazo nk’uko byemejewe n’Umuvugizi wa Guverinoma Yolande Makolo.

Itangazo yashyize hanze riragira riti: “Itangazo ryatangajwe na FARDC rivuga ko risubiza irya Guverinoma y’u Rwanda ritigeze ritangazwa cyangwa ngo ribe rinahari. 

Ibivugwa na FARDC ni ibihimbano bigamije  gutiza umurindi inzangano no gushaka ibisobanuro byo kugaba ibitero ku butaka bw’u Rwanda ari na ko bakomeza gushyigikira, guha intwaro no gufatanya n’abajenosideri ba FDLR.”

Yolande Makolo akomeza avuga ko u Rwanda ruzakomeza kubahiriza ingamba rwashyiriyeho gukumira abahirahira bavogera ikirere n’imipaka byarwo kandi ko rwiteguye guhangana n’ibisasu byaba biturutse mu mirwano yo mu Burasirazuba bwa RDC.

Repubulika iharanira demokarasi ya Congo  RDC, yegeka ibibazo byayo ku Rwanda, igashakisha urwitwazo ko u Rwanda rutera inkunga Umutwe wa M23, mu gihe nta bihamya bihari, ahubwo  u Rwanda rukomeza gusaba ko RDC yakemura ibibazo by’abaturage bayo ntishake kubyegeka ku Rwanda.

Mu bihe bitandukanye RDC yagiye ishotora u Rwanda, ikavogera ikirere cy’u Rwanda, rwo rugakomeza gusaba RDC ko yakemura ibibazo byayo iha uburenganzira abanyekongo bavuga ikinyarwanda kuko ari cyo M23 iharanira.

Yanditswe na NYIRANEZA Judith

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA