U Rwanda rwashimiwe kwemera kwakira Igikombe cy’Isi cy’abakanyujijeho muri ruhago
Amakuru

U Rwanda rwashimiwe kwemera kwakira Igikombe cy’Isi cy’abakanyujijeho muri ruhago

Imvaho Nshya

October 23, 2023

U Rwanda rwemeye kwakira igikombe cy’Isi cy’abakanyujijeho mu mupira w’amagaru inshuro eshatu zikurikiranye uhereye mu mwaka wa 2024 kugeza 2026.

Fred Siewe, Perezida w’Ishyirahamwe ry’Imikino y’abakanyujijeho ku Isi (FIFVE) akaba n’Umuyobozi wa Shampiyona y’ Igikombe cy’Isi cy’Abakanyujijeho muri Ruhago ku Isi (Veteran Clubs World Championship-VCWC), yashimiye Guverinoma y’u Rwanda yemeye kwakira inshuro eshatu z’ayo marushanwa.

Yabikomojeho nyuma y’aho Inama y’Abaminisitiri yateranye mu mpera z’icyumweru gishize yemeje amasezerano y’ubufatanye hagati ya Guverinoma y’u Rwanda na EasyGroup EXP yemerera u Rwanda kwakira irushanwa ry’igikombe cy’Isi cy’abahoze bakina umupira w’amaguru bamamaye cyane, azamara imyaka itatu: 2024, 2025 na 2026.

Siewe yagize ati: “Ndashimira Guverinoma y’u Rwanda iyobowe na Nyakubahwa Perezida Kagame kuba mwemeye kwakira ibyamamare inshuro eshatu za mbere z’Irushanwa ry’igikombe cy’Isi cy’abahoze bakina umupira w’amaguru bakanyujijeho. Reka dusure, duhure kandi dushore imari mu Rwanda.”

Tariki 20 Werurwe 2023, ni bwo Leta y’u Rwanda binyuze mu Rwego rw’Igihugu rw’Iterambere RBD rwasinyanye amasezerano y’ubufatanye n’Ishyirahamwe ry’Imikino y’abakanyujijeho ku Isi (FIFVE) yemerera u Rwanda kwakira icyo gikombe cy’Isi inshuro eshatu zikurikirana.

Aya masezerano yemera ko mu gihe cy’Irushanwa “Visit Rwanda” izagaragara ku kibuga, ku myenda y’abakinnyi no ku matike azacuruzwa.

Irushanwa ry’abahoze bakina ruhago ku Isi VCWC ryashyizweho kugira ngo abakinnyi berekane impano zabo kandi batange umusanzu mu bikorwa byiza bifasha abatuye Isi.

Ku nshuro ya mbere, Igikombe cy’Isi cy’Abakanyujijeho muri ruhago ku Isi [Veteran Clubs World Championship-VCWC] n’ibikorwa bigishamikiyeho bizabera ku butaka bw’u Rwanda ku wa 10-20 Gicurasi 2024.

Ubwo iri rushanwa rizaba rikinwa ku nshuro ya mbere umwaka biteganyijwe ko rizitabirwa n’abakinnyi b’umupira w’amaguru bagera ku 150 baturutse hirya no hino ku Isi n’abarenga miliyoni 100 bazakurikira kuri za televiziyo ku Isi yose.

Siewe kandi yanagaragaje ko banyuzwe no kuba bakomeje kugirana imikoranire myiza n’Amashami y’Umuryango w’Abibumbye mu Rwanda, mu kwimakaza ishyirwa mu bikorwa ry’Intego z’Iterambere Rirambye (SDGs).

SHEMA IVAN

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA