U Rwanda rwibukije abikorera ko Isoko Rusange ry’Afurika ari iryabo
Amakuru

U Rwanda rwibukije abikorera ko Isoko Rusange ry’Afurika ari iryabo

Imvaho Nshya

August 16, 2023

Leta y’u Rwanda yongeye kwibutsa abikorera bo mu Rwanda n’abaturutse mu bihugu bitandukanye by’Afurika ko Isoko Rusange ry’Afurika (AfCFTA) ari iryabo, bityo bakwiye kuribyaza umusaruro nk’umusanzu wabo mu kwihutisha iterambere ry’Umugabane.

Byakomojweho na Minisitiri w’Ubucuruzi n’Inganda Ngabitsinze Jean Chrysostome kuri uyu wa Kabiri tariki 16 Kanama, mu Nama Mpuzamahanga y’Ihuriro y’Ubucuruzi (GBF) yari ahagarariyemo Perezida wa Repubulika y’u Rwanda Paul Kagame.

Iyo nama ibaye ku nshuro ya kabiri iteraniye i Kigali iribanda ku iterambere ry’ubukungu bw’Afurika, aho rifite intego yo kuba umusemburo w’iterambere ry’ubucuruzi muri Afurika ubwayo no hagati y’Afurika n’indi migabane.

Ngabitsinze yavuze ko iyi nama ari amahirwe ahuza abikorera ngo bamenye aho bashora imari, byorohereze Afurika gutera imbere, by’umwihariko binyuze mu gushora imari binyuze mu mahirwe atangwa mu Isoko Rusange ry’Afurika.

Mu izina rya Perezida Paul Kagame, Minisitiri Ngabitsinze ni we wafunguye ku mugaragaro inama y’Ihuriro rya kabiri ya GBF yateguwe ku nsanganyamatsiko igira iti ‘Kurema Ubutunzi bw’Afurika binyuze mu Isoko Rusange ry’Afurika (AfCFTA)’.

Yagize ati: “Iyi nama ni amahirwe ahuza abikorera ngo bamenye aho bashora imari. Gushyiraho isoko rimwe ryo ku mugabane ku bicuruzwa na serivisi, bituma n’abashoramari bakorera hamwe bakagenda ku buntu, bityo bigatanga inzira yo kwihutisha ishyirwaho ry’Urugaga rwa Gasutamo ku rwego rw’umugabane”.

Yongeyeho ati: “Ntabwo ari umurimo woroshye. Bisaba urwego rwimbitse rwo guhuriza hamwe ibice byose bireba, ubushake bwa Politiki bukomeye no kwiyemeza gutera imbere hatitawe ku byaba intambamyi bitandukanye”.

Minisitiri Ngabitsinze yavuze kugeza ubu, muri AfCFTA buri mushoramari afite isoko ry’abakiliya miliyari 1.3, akomeza agira ati: “Turi hano uyu munsi kugira ngo tuganire ku mahirwe no guteza imbere uburyo bwiza bwo gukoresha ayo mahirwe akabyazwa umusaruro.”

Yavuze kandi ko kugira ngo umugabane w’Afurika utere imbere, bisaba ko abantu bakoresha ayo mahirwe bagateza imbere umugabane.

Ati: “Mbere na mbere, reka twese twemere ko AfCFTA ari iy’abikorera. Kugira ngo duteze imbere umugabane mu gukoresha ayo mahirwe, dukeneye ibiganiro nk’ibi bishimangira uruhare n’inshingano by’abikorera”.

Minisitiri Ngabitsinze yavuze ko icyizere ari ukubona ishoramari ryambukiranya imipaka ritera imbere, bigaragaza ibidasanzwe by’Afurika n’umurage ndangamuco birinzwe kandi bigatezwa imbere ku mipaka, mu gihe dukomeza kugira uruhare runini ku bucuruzi.

Isoko Rusange ry’Afurika ryitezweho kuba isoko rya mbere rigari ku Isi kubera abakabakaba miliyari 1.3 barihuriramo. 

Biteganyijwe ko hejuru ya 90% by’ibiciro bya gasutamo bizakurwaho by’umwihariko ku bicuruzwa byasonewe mu 2021, kandi hari gahunda iteganya kuzakomeza kugabanya ibiciro mu gihe cy’imyaka 10 iri imbere.

Bivugwa kandi ko 7% ry’ibicuruzwa ryasonewe imisoro mu gihe cy’imyaka 15 mu gihe 3% ari byo bitigeze bikurirwaho imisoro.  Nanone kandi, u Rwanda rwamaze kuzuza ibisabwa ari na yo mpamvu rwemejwe n’ubunyamabanga bwa AfCFTA nka kimwe mu bihugu birindwi byatangirijwemo iyo gahunda.

Yanditswe na NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA