U Rwanda rwiteguye kwakira inama yiga ku iterambere ry’ingufu
Amakuru

U Rwanda rwiteguye kwakira inama yiga ku iterambere ry’ingufu

Imvaho Nshya

October 11, 2023

Kuva tariki 20 kugeza 22 Gashyantare 2024, u Rwanda ruzakira imurikagurisha Nyafurika ry’Ingufu (Africa Energy Expo) rizahuriza hamwe abasaga 6,000 baturutse mu bihugu bisaga 25.

Biteganyijwe ko Sosiyete zibarirwa hagati ya 100 na 120 ziturutse hirya no hino ku Isi, ari zo zizitabira imurikagurisha.

Byagarutsweho mu kiganiro cyahuje abategura imurikagurisha n’abanyamakuru, ku wa Kabiri tariki 10 Ukwakira 2023 mu Mujyi wa Kigali.

Murangwa Frank ushinzwe kwamamaza aho inama zibera mu Rwanda mu  Ikigo cy’Igihugu gishinzwe guteza imbere Ubukerarugendo bushingiye ku Nama (RCB), ashimangira ko imurikagurisha rizatanga akazi ku Banyarwanda.

Yagize ati: “Ingamba za Leta mu gukomeza guteza imbere ubukerarugendo bushingiye ku nama n’imurikagurisha, ni ukugira ngo tubone amadovize yinjira mu gihugu, icyo ni ikintu dutegereje muri iri murikagurisha”.

Asobanura ko iyo haje imurikagurisha rikomeye ryo ku rwego mpuzamahanga, ibigo bikomeye bitegura inama ndetse n’imurikagurisha bibonamo akazi keza.

Serge Wilson Muhizi, Umuyobozi mu rugaga rwa ba rwiyemezamirimo bacuruza umuriro w’amashanyarazi (EPD: Energy Private Developpers), yavuze ko imurikagurisha ry’umwaka utaha baribonamo amahirwe.

Ati: “Imurikagurisha turaribona nk’amahirwe meza cyane kuri rwiyemezamirimo kuko bazatuzanira ikoranabuhanga ryinshi.

Ikoranabuhanga ryinshi rizasigara hano mu Rwanda kubera ko hazabaho iryo hererekanya ry’ubumenyi, turabibonamo inyungu zagutse nk’Abikorera”.

Gen B. Cesar, Umuyobozi muri Minisiteri y’Ibikorwa Remezo (MININFRA) ushinzwe iby’ingufu yavuze ko imurikagurisha rizasigira Abanyarwanda ubumenyi mu gutunganya no gukwirakwiza amashanyarazi aturuka ku ngufu zisubira.

Yagize ati: “U Rwanda rwishimiye kuzakira imurikagurisha ‘Africa Energy Expo’, tuzi neza ibibazo by’ubuke bw’imbaraga zitanga amashanyarazi uyu mugabane ufite. 43% by’abatuye Afurika nta mashyanyarazi na mba bafite kandi abagera kuri miliyoni 970 nta bicanwa bifatika bagira.”

Imurikagurisha rizitabirwa n’abashoramari mu bijyanye n’ingufu, impuguke mu bijyanye n’ibikorwa remezo by’amashanyarazi, abacuruzi b’ibikoresho by’amashanyarazi akomoka ku zuba byifashisha ikoranabuhanga n’abandi.

Minisiteri y’Ibikorwa Remezo yagaragaje ko bizanafasha kongera umubare w’abagerwaho n’amashanyarazi muri rusange.

Mu kiganiro n’abanyamakuru inzego zitandukanye zagaragaje ko iri Murikagurisha Nyafurika ry’Ingufu ari umwanya mwiza ku gihugu mu kwakira ubukerarugendo bushingiye ku nama.

Hari abazabona akazi, abashoramari bazagira umwanya wo kureba aho bashora imari no guhanahana ubumenyi mu bijyanye n’ingufu.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA