Ikigo cy’Igihugu gishinzwe Ibarurishamibare (NISR) kigaragaza ko mu gihembwe cya mbere cya 2026, u Rwanda rwacuruje miliyoni 1 892,91 z’amadolari ya Amerika (2 765 541 510 000 Frw), mu rwego rw’ubucuruzi mpuzamahanga, bingana n’igabanyuka rya 5,1% ugereranyije n’igihembwe cya mbere cya 2025 ndetse n’igabanyuka rya 11,6% ugereranyije n’igihembwe cya 4 cya 2025.

Mu bihembwe bya mbere, ubucuruzi mpuzamahanga bw’u Rwanda mu madolari ya Amerika mu 2023 bwari miliyoni 1 995,26; mu 2024 bwari kuri miliyoni 2 015,30 naho mu 2025 zari miliyoni 1 995,26 mu gihe mu gihembwe cya mbere cya 2026 hacurujwe miliyoni 1 892.91.  

Ibyoherezwa mu mahanga

Imibare yatangajwe na NSIR igaragaza ko mu gihembwe cya mbere cya 2026, ibicuruzwa byoherejwe mu mahanga byari bifite agaciro ka miliyoni 366,85 z’amadolari y’Amerika (14 943 785 Frw), bingana na 19.3% by’agaciro k’ubucuruzi mpuzamahanga bw’u Rwanda. Agaciro k’ibyoherezwa mu mahanga kagabanyutseho 23,7% ugereranyije n’agaciro k’ibyoherejwe mu mahanga mu gihembwe cya mbere cya 2025; ndetse kagabanyukaho 2,3% ugereranyije n’igihembwe cya kane cya 2025.

Agaciro k’ibyoherejwe mu mahanga mu gihembwe cya mbere mu mwaka 2023 kari miliyoni 402,14 z’amadolari ya Amerka; mu 2024 yabaye miliyoni 431,61; mu 2025 ibyoherejwe byinjije miliyoni 480, 82 naho mu 2026 byari bifite agaciro ka miliyoni 366,85z’amadolari ya Amerika.

Mu gihembwe cya mbere cya 2026, 67,28% by’agaciro k’ibicuruzwa byose u Rwanda rwohereje mu mahanga byagiye mu bihugu bitanu ari byo u Bushinwa, Repubulika Iharanira Demokarasi ya Congo, Leta zunze Ubumwe z’Abarabu, Leta Zunze ubumwe z’Amerika n’u Buhinde.

Ibitumizwa mu mahanga

Mu gihembwe cya mbere cya 2026, agaciro k’ibitumizwa mu mahanga kari miliyoni 1 332,21 z’amadolari ya Amerika bingana na 70.38% by’agaciro k’ubucuruzi mpuzamahanga bw’u Rwanda. Agaciro k’ibitumizwa mu mahanga kagabanyutseho 3,4% ugereranyije n’agaciro k’ibyatumijwe mu mahanga mu gihembwe cya mbere cya 2025; ndetse na 13,6% ugereranyije n’igihembwe cya kane cya 2025.

Mu gihembwe cya mbere cya 2026, 60.6% by’agaciro k’ibicuruzwa byose u Rwanda rwatumije mu mahanga byavuye mu bihugu bitanu ari byo u Bushinwa, u Buhinde, Tanzaniya, Kenya na Uganda.

Ba uwa mbere mu kumenya amakuru agezweho!!!