Ubukungu bw’u Rwanda buziyongera kurusha ahandi muri Afurika y’Iburasirazuba
Amakuru

Ubukungu bw’u Rwanda buziyongera kurusha ahandi muri Afurika y’Iburasirazuba

NTAWITONDA JEAN CLAUDE

August 7, 2023

Banki Nyafurika Itsura Amajyambere (AfDB) yatangaje raporo ishimangira ko u Rwanda rwitezweho kubona Umusaruro Mbumbe w’Igihugu (GDP) uri hejuru y’uzaboneka mu bihugu byo mu Karere k’Afurika y’Iburasirazuba mu mwaka wa 2024.

Raporo ya AfDB ishishikariza abikorera gutanga umusanzu wabo mu kurwanya ingaruka z’imihindagurikire y’ikirere no guharanira iterambere ry’ubukungu ritangiza ibidukikije. 

Igaragaza ko mu mwaka wa 2024 ubukungu bw’u Rwanda buziyongera ku kigero cya 8%, igihugu cya kabiri mu Karere kikazaba Uganda yitezweho kuzabona ubukungu bwayo bwiyongera ku kigero cya 7% na Kenya kuri 6%.

Bivugwa ko umuvuduko w’ubwiyongere bw’ubukungu bw’u Rwanda uzashingira ku kuba imikorere y’ibigo irushaho kunozwa, bigashyigikirwa na Politiki nziza zigamije kwimakaza ishoramari no kubaka ubudahangarwa mu nzego zinyuranye.

Nubwo hari imbogamizi zitambitse mu myaka ishize, AfDB ivuga ko u Rwanda rwakomeje kugaragara mu bihugu bikora neza muri Afurika, by’umwihariko mu birebana n’ubukungu. 

Imibare igaragaza ko umuvuduko w’ubukungu bw’u Rwanda wagabanyutse ukava ku 10.9% mu 2021 ukagera ku kigero cya 8.2% mu 2022, bitewe n’itumbagira ry’ibiciro ku isoko mpuzamahanga ndetse n’igabanyuka ry’umusaruro w’ubuhinzi n’ubworozi.

Ingaruka z’izo ngorane zatumye izamuka ry’ibiciro rigaragara cyane mu rwego rw’ingufu, urw’ubwikorezi n’ibiribwa. 

Guverinoma y’u Rwanda yagaragaje umwihariko mu guhangana na zo kuko yashyizeho gahunda ya Nkunganire ku bikomoka kuri peteroli, ku ifumbire, imbuto na gahunda yo kugaburira abana ku ishuri.

AfDB ivuga ko muri rusange ubukungu  bw’ibihugu byo mu Karere bwitezweho kuzamuka ku rwego rwo hejuru ugereranyije n’uko uzazamuka mu bindi bihugu byo ku mugbane w’Afurika. 

Ku rwego rw’Akarere, ubukungu buzazamuka ku kigero cya 5.8% mu 2024 buvuye kuri 5.1% muri uyu mwaka wa 2023, aho buzaba bwishingikirije cyane ku iterambere rya Uganda, Ethiopia, Djibouti na Tanzania. 

Gusa iyo raporo inakomoza ku mbogamizi zishingiye kuri politiki n’ihungabana ry’ubukungu ku rwego mpuzamahanga, zishobora gukoma mu nkokora uyu muvuduko.

By’umwihariko, intambara yo muri Sudani ibonwa nk’ikibazo gikomeye ku mutekano w’Akarere ndetse ngo ishobora no gukoma mu nkokora izamuka ry’ubukungu ryitezwe mu mwaka utaha.

Uretse izo mbogamizi, raporo inagaragaza ibibazo bidafite aho bihuriye n’imikorere y’ibihugu bishobora kugira ingaruka ku musaruro witezwe. 

Muri byo harimo izamuka ry’ibiciro ku isoko mpuzamahanga, gusubira inyuma k’ubukungu bw’Isi, intambara n’ubushyamirane bw’u Burusiya na Ukraine, politiki z’ubucuruzi mpuzamahanga, gutakaza agaciro k’ifaranga ndetse no kuba hari ibyago by’uko icyorezo cya COVID-19 cyakongera kugaruka. 

Hagati aho,  mu bihugu harimo ibyuho by’ibikorwa remezo, umutekano muke, ihungabana ry’ubukungu ndetse n’ingaruka zinyuranye z’imihindagurikire y’ibihe na zo zishobora kongera ibyago byo kugabanya umuvuduko w’ubukungu.

Mu guhangana n’ibyo byago byugarije umuvuduko w’izamuka ry’ubukungu, AfDB irasaba Guverinoma zo muri Afurika y’Iburasirazuba n’abafatanyabikorwa bazo mu iterambere guharanira kubaka ubudahangarwa burambye ku bukungu bw’Akarere.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA