Ubumwe ni ubuzima bw’Abanyarwanda- Dr Bizimana
Amakuru

Ubumwe ni ubuzima bw’Abanyarwanda- Dr Bizimana

Imvaho Nshya

October 20, 2023

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascene mu gutangiza ibiganiro  nyunguranabitekerezo ku Bumwe n’Ubudaheranwa bw’Abanyarwanda yavuze ko itangazamakuru rifite uruhare ntagereranywa mu gufasha umuryango nyarwanda, kandi ko ubumwe ari ubuzima bw’Abanyarwanda.

Ni mu biganiro byagenewe abayobozi b’ibitangazamakuru n’abanditsi bakuru b’ibinyamakuru bitandukanye, ku Bumwe n’Ubudaheranwa bw’Abanyarwanda muri gahunda y’Ukwezi k’Ubumwe n’Ubudaheranwa bw’Abanyarwanda iba mu kwezi k’Ukwakira, yatangiye mu 2008.

Yagize ati: “Muri uku kwezi kwa cumi turimo kuganira n’ibyiciro byose by’Abanyarwanda, urubyiruko, abanyamadini, uyu munsi ni umunsi twahariye kuganira n’abanyamakuru kubera yuko abanyamakuru ni ijisho ry’abaturage batanga ubutumwa bugera ku bantu benshi banatanga ibitekerezo ni kimwe mu byo dukeneye kandi ubumwe ni ubuzima bw’Abanyarwanda”.

Yasobanuye impamvu ari ngombwa ko itangazamakuru rigira uruhare mu gutanga ibitekerezo ku nziztizi zikibangamira Ubumwe n’Ubudaheranwa bw’Abanyarwanda, bigafasha kugena no kunoza politiki muri urwo rwego.

Ati: “Dukeneye ko abanyamakuru bafasha Leta kugira ngo tumenye ibitekerezo n’inzitizi ziri mu bikibangamira ubumwe bw’Abanyarwanda kugira ngo izo nzitizi zidufashe mu kugena   ingamba zaba iza politiki, iz’inyigisho n’iz’ubukangurambaga natwe tugeza ku baturage dufatanyije namwe ibyo dushobora guteganya byajya muri politiki y’Igihugu muzi ko ubu Minisiteri y’Ubumwe bw’Igihugu irimo  gusoza politiki yayo, ibi bitekerezo duhabwa n’abanyamakuru biranadufasha kuyinoza turi hafi kuyirangiza”.

Abayobozi b’ibitangazamakuru n’abanditsi bakuru bitabiriye inama nyunguranabitekerezo ku Bumwe n’Ubudaheranwa bw’Abanyarwanda

Minisitiri Dr Bizimana yasobanuye ko inzitizi zikibangamiye Ubumwe n’Ubudaheranwa bw’Abanyarwanda nta cyiciro cyihariye zibonekamo, ahubwo ari Abanyarwanda bose muri rusange.

Ati: “Inzitizi zikibangamiye Ubumwe n’Ubudaheranwa by’Abanyarwanda ntibiri mu cyiciro kimwe gusa, ziri mu Banyarwanda bose binashingiye ku mateka yacu, bishingiye cyane cyane ku nzira twanyuzemo, ku bikomere abantu bafite, baba abanyamadini, abanyamakuru, abanyapolitiki turi mu muryango nyarwanda wakomerekejwe n’amateka ya Jenoside yakorewe Abatutsi mu 1994, ariko turi no mu gihe cyiza, hashize hafi imyaka 30 Jenoside ihagaritswe, hari urugendo runini rumaze gukorwa mu kubaka ubumwe bw’Abanyarwanda”.

Yongeyeho ati: Hashingiwe ku ngamba zagiye zifatwa, ku ngamba z’Igihugu, izo ngamba ni ngombwa ko zikomeza kandi tukazikomeza dufatanyije tunazirikana cyane cyane urubyiruko kuko ni bo benshi 65,3% nk’uko byagaragajwe n’Ibarura rusange ry’abaturage ryakozwe umwaka ushize ari abafite munsi y’imyaka 30.  Abongabo rero binatwereka ko hari ibikomere bagifite bishingiye ku mateka iyo urebye ikibazo cy’ihungabana usanga kizamuka, wareba ikoreshwa ry’ibiyobwabwenge mu rubyiruko, ubusinzi ukabona biriyongera”.

Yakomeje asobanura ko urubyiruko rugaragaraho ibimenyetso byazitira iterambere ryarwo.

Ati: “Ibyo byose ni ibimenyetso biba byerekana ko bya bikomere bikibangamiye kwiyubaka kw’Abanyarwanda kandi urubyiruko rufite ibikomere nk’ibyo kugira ngo rutere imbere, kugira ngo rwibesheho, kugira ngo rukorere Igihugu biragoye.

Ni yo mpamvu gutegura igikorwa nk’iki cyo kongera kuganira ku nzitizi binafasha ngo dushyire mu bikorwa ingamba zo gufasha cyane cyane abatoya”.

 Yagize ati: “Abanyamakuru badafashije Leta mu gukangurira abaturage gukomeza kubaka ubumwe byaba ikibazo, kuko hari itangazamakuru cyane cyane irinyuzwa ku mbuga nkoranyambaga, n’abantu ku giti cyabo bo baza basenya turabafite kuri youtube no ku yindi miyoboro, ni ngombwa rero yuko itangazamakuiru rigaragaza koko inkingi nyazo rikagaragaza indangagaciro zikwiye itangazamakuru”.

Yongeyeho ati: “Ni ngombwa cyane kuko abaturage bararikurikira cyane cyane urubyiruko, ari yo mpamvu iyo mukoze neza akazi kanyu bifasha Leta ko politiki nziza iba yashyizeho igera ku bantu benshi. Icyo ni cyo twifuza yuko itangazamakuru rikomeza gufatanya na Leta muri uru rugendo rwo kubaka Igihugu kandi hakanagaragazwa n’abo bayobya abaturage, abakwiza ibinyoma itangazamakuru na ryo rikabamagana, rigafasha mu kugaragaza ukuri, rigafasha mu kugaragaza ibikenewe no gutanga icyerekezo gikwiye kugira ngo Igihugu gikomeze kwiyubaka kandi Abanyarwanda bakomeze gutera imbere no kubana neza”.

Yagarutse kuri zimwe ku nzitizi zirimo abakigaragaraho ingengabitekerezo ya Jenoside, abapfobya Jenoside, ubumenyi budahagije ku mateka ya Jenoside.  Hari bamwe bifashisha imbuga nkoranyambaga zikaba umuyoboro w’abahakana Jenoside, ibitangazamakuru byo mu mahanga bisakaza ibyabangamira n’ibyasenya Ubumwe bw’Abanyarwanda.

Itangazamakuru ni umuyoboro mwiza w’ibitekerezo byongera gushimangira Ubumwe n’Ubudaheranwa bw’Abanyarwanda kandi bigomba guharanirwa.

Ati: “Ikidashidikanywaho, ubumwe ni inzira imwe idashidikanwaho, ni uguhaguruka tukabiharanira, hubakwa u Rwanda rwunze Ubumwe, rutera imbere noneho tukubaka umuco uturanga”.

Abanyamakuru batanze zimwe mu nzitizi zikigaragara zirimo kuba umwuga w’itangazamakuru witiranwa n’abandi banyuza amakuru n’ibitekerezo byabo ku mbuga nkoranyambaga zitandukanye (channels) bikitirirwa abanyamakuru.

Basabye kandi ko hakongerwa ubukangurambaga mu bigo by’amashuri urubyiruko rukarushaho gusobanukirwa neza amateka, guhugura Inzego z’ibanze cyane ko zegereye abaturage kugira ngo nazo zijye zitanga amakuru nyayo, gukomeza gusobanura gahunda ya Ndi Umunyarwanda, ikigishwa bihagije bigatuma batinyuka kugaragaza ahakiri inzitizi.

Abanyamakuru bagaragaje ko hari imvugo ziba zisa n’izoroheje zikoreshwa nko mu bukwe ariko zishobora kubangamira Ubumwe n’Ubudaheranwa bw’Abanyarwanda, n’izindi.

Umuyobozi Nshingwabikorwa ushinzwe Ubumwe n’Ubudaheranwa bw’Abanyarwanda Uwacu Julienne asoza inama nyunguranabitekerezo yabaye uyu munsi ku ruhare rw’itangazamakuru mu guteza imbere ubumwe n’ubudaheranwa bw’Abanyarwanda yibukije ko kubaka Ubumwe n’Ubudahangarwa by’Abanyarwanda atari inshingano ya Minisiteri gusa.

Ati: “Ubumwe n’Ubudaheranwa bw’Abanyarwanda si inshingano ya Minisiteri gusa, twese nk’Abanyarwanda tugomba kugira uruhare, nta bikina byototera Ubumwe bw’Abanyarwanda kandi ubumwe bwacu ni zo mbaraga”.

NYIRANEZA JUDITH

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA