Uburinganire buhabwa agaciro mu ngengo y’Imari y’u Rwanda
Amakuru

Uburinganire buhabwa agaciro mu ngengo y’Imari y’u Rwanda

NTAWITONDA JEAN CLAUDE

July 18, 2023

Mu gihe u Rwanda rubaye Igihugu cya mbere cy’Afurika cyakiriye Inama Mpuzamahanga yiga ku iterambere ry’abagore (Women Deliver 2023), Perezida wa Repubulika y’u Rwanda Paul Kagame yagaragaje uburyo guteza imbere uburinganire byitabwaho mu ngengo y’imari ya Leta.

Yabigarutseho ku gicamunsi cyo ku wa Mbere ubwo yatangizaga iyo nama ihurije abasaga 6000 mu Mujyi wa Kigali harebwa intambwe imaze guterwa mu kwimakaza uburenganzira bw’abagore n’icyakorwa kugira ngo bugerweho ku Isi yose.

Uretse abitabiriye imbonankubone, iyi nama izamara iminsi ine irimo gukurikiranwa n’abasaga 200,000 bifashishije ikoranabuhanga baherereye mu bice bitandukanye ku Isi.

Perezida Kagame yagaragaje uburyo ubushakashatsi bwerekanye ko bishobora gutwara ikinyejana kirenga kugira ngo uburinganire busesuye hagati y’abagore n’abagabo bugerweho hagendewe ku muvuduko bikorwaho ubu.

Yavuze ko hakiri icyuho kinini mu buringanire mu gihe abagore n’abagabo basangiye umutwaro w’ibibazo by’ubuzima, imihindagurikire y’ikirere, ibibazo by’ubukungu n’ibindi Isi yahuye na byo mu myaka mike ishize.

Yavuze ko hakiri byinshi byo gukora mu kuziba icyuho gishingiye ku myumvire usanga yarinjiye mu nzego za Politiki, iza sosiyete ndetse n’iz’ubukungu.

Yagize ati: “Twese dusangiye inshingano zo kugira uruhare rufatika mu guhindura iyi myumvire idahwitse.”

Yavuze ko mu Rwanda, ubuyobozi bwahanze ikirere cyorohereza abagore kwisanga mu myanya y’ubuyobozi, kuva ku nzego za Politiki ukagera mu nzego zose.

Uburinganire buhabwa agaciro mu nzego zose, by’umwihariko mu kudaheza mu rwego rw’imari, no gukomeza guhindura imyumvire yahindutse akamenyero ibangamira uburenganzira bw’abagore.

Aho ni ho yahereye avuga ko buri ngengo y’imari y’Igihugu iherekezwa n’inyandiko isobanura uko ibikorwa byose bizakorwa n’uburyo bizatanga umusaruro ku bagore n’abagabo.

Ati: “Igikoresho cy’ingenzi twifashisha mu Rwanda ni inyandiko igaragaza ikiguzi cyo kuziba icyuho cy’uburinganire mu igenamigambi rya buri mwaka, mu kugenzura ko ibyemezo bifatwa ku mikoreshereze y’ingengo y’imari bitanga umusaruro ku bagore n’abagabo mu buryo butandukanye.”

Yakomeje ashimangira ko Guverinoma y’u Rwanda ishyira imbaraga mu guharanira ko n’abagabo babigira ibyabo uhereye mu muryango, by’umwihariko basangira n’abagore babo inshingano zo kurera abana no gukumira ihohoterwa mu miryango.

Mu gihe Isi ikomeje umuvuduko mu iterambere, yasabye buri wese guhuza imbaraga n’abandi mu guharanira ko ikoranabuhanga rikora mu nyungu z’abaturage bose, aho kuryifashisha ku kurushaho kongera ubusumbane.

Yakomeje agira ati: “Ni muri urwo rwego nshimira abafatanyabikorwa bashyigikira Umuryango Women Deliver, abashyigikira uburinganire hano mu Rwanda n’ahandi. Impinduka zirakomera kandi ntiziboneka mu ijoro rimwe. Ariko dufatanyije mu mbaraga zidacogora, dushobora kugaragaza itandukaniro twihitiyemo.”

Yagaragaje ko ukwiyemeza ubwabyo ntacyo byatanga mu gihe kudaherekejwe n’ibikorwa bigamije kuzuza amasezerano yo guharanira ahazaza huje uburumbuke.

Yashimiye abayobozi batandukanye bitabiriye, Umuyobozi Mukuru wa Women Deliver Phumzile Mlambo-Ngcuka hamwe n’Abakuru b’Ibihugu bitabiriye.

Yagaragaje ko we na Perezida wa Senegal Macky Sall bemeranyije gufatanya mu guharanira ko abagore n’abakobwa babona ibikoresho by’isuku byabagenewe (cotex).

Yashimiye Katalin Novák wa Hongiriya bagiranye amasezerano yo kurushaho kunoza umubano w’u Rwanda n’icyo Gihugu, yongera kwemeza ko mu bihe biri imbere azasura Budapest.

Yashimiye kandi Perezida wa Ethiopia Sahle-Work Zewde, ukomeje kuza ku ruhembe rw’imbere mu guharanira uburinganire hagati y’abagore n’abagabo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA