Igitaramo cya Iwacu Muzika Festival 2026 kimaze iminsi kizenguruka mu Turere twa Huye, Ngoma, Muhanga ndetse na Karongi kuri uyu wa 18 Nyakanga 2026, cyabereye mu Karere ka Nyagatare kuri Stade y’aka Karere aho cyitabiriwe ku bwinshi, n’abiganjemo urubyiruko baje kwihera ijisho abahanzi umunani bihebeye.

Iki gitaramo cyatunguranye kuko abatuye aka Karere n’abaturutse mu nkengero z’ako nka Gatsibo, batari bitezweho kwitabira nkuko byagenze uyu munsi.

Uko Igitaramo cyagenze akantu ku kandi

Saa munani z’amanywa, umuhanzi Gonzage Kwizera uzwi nka Gonze ni we wabanje ku rubyiniro nka gahunda yo kuzamura impano z’abatuye mu Karere ibi bitaramo bigiye kuberamo aho yaririmbye indirimbo ye yitwa “Bizaza” n’izindi zitandukanye.

Umuhanzi akaba n’umucuranzi wa Piano, ufite ubumuga bwo kutabona, Tuyisenge Roger Bruno uzwi nka Bruno Master yahawe urubuga rwo kugaragaza Impano ye, maze asusurutsa abitabiriye mu ndirimbo ze zirimo “Celebration” na “Forever Love”.

Amalon wari wambaye ikoti rya Kositimu y’ubururu bwijimye, ishati y’umweru, ipantaro y’ikoboyi y’ubururu, n’inkweto zizwi nka congo, yabimburiye abandi ku rubyiniro saa cyenda n’iminota 47, atangira abaza ati: “Twaba dufite impunzi mu nyubako?”

Yatangiye aririmba indirimbo ye yise Impunzi, abatuye Nyagatare bitabiriye ibi bitaramo bamufasha kuyiririmba. Yakurikijeho Impanga, Single yakoranye na Weasel wo muri Uganda, Derila, Byakubaho na Nyirabasare

Nk’umwana uri iwabo Umuhanzi Ross Kana ni we wakurikiyeho ku rubyiniro aho yasusurukije abitabiriye iki gitaramo mu ndirimbo zirimo, Molela, Fou De Toi, n’izindi. Bidatinze gato umuriro watunguranye uba uramutengushye, nyuma y’iminota nk’ibiri umuriro wahise ugaruka maze abashyushyarugamba MC Buryohe na Bianca bagarutse ku rubyiniro abakunzi b’umuziki basakuriza icyarimwe ngo Ross Kana agaruke, bakomeje guhamagara uyu muhanzi wari wavuye ku rubyiniro umuriro ukigenda, barahamagara amaso ahera mu kirere.

Abashyushyarugamba babwiye abitabiriye bati” Ross Kana yagiye ariko tugiye kubazanira undi muhanzi na we muramukunda baba bahamagaye Marina, mu ikamba  yaje yambaye yasusurukije abitabiriye mu ndirimbo zirimo ‘Paje’ yakoze mu mezi 7 ashize, ‘Do Me’ yakoranye na Queen Cha mu 2025,

Saa kumi n’imwe, Marina yari akiri ku rubyiniro abaza abitabiriye ati: “Abakunzi ba Jay Polly muri he?” ni ko guhita aririmba ‘Too Much’ bahuriyemo, akomereza kuri ‘Bimpame’ yakoranye na Phil Peter, yakomereje ku “Agafoto” yakoranye na Phil Peter, Fireman, Aime Bluestone n’abandi asoreza kuri “Marina”

Saa kumi n’imwe n’iminota 12, abashyushyarugamba MC Buryohe na Bianca bagarutse ku rubyiniro bibutsa abitabiriye ko inyuma hakiri abahanzi bakomeye barimo Davis D, Chriss Eazy, Kenny Sol, Bushali, ndetse na Tom Close nk’umuhanzi mukuru watwaye PGGSS bwa mbere mu mwaka wa 2011.

Kivumbi King, ukomeje kugaragaza ko yigaruriye igikundiro cy’abakunzi b’umuziki aho yeretswe urukundo n’abatuye Nyagatare bitabiriye igitaramo cya Iwacu Muzika Festival yaririmbiye izirimo ‘Wait’ yakoranye na Axon, ‘Ituze’ n’izindi

Saa kumi n’imwe na 50, Bushali yari ageze ku rubyiniro aherekejwe na Cancadem wakomeje kumuherekeza muri ibi bitaramo,  mu ndirimbo ‘Nituebwe’ abitabiriye igitaramo bahindura imiririmbire, uko babonaga igitaramo bisa nkibihundutse mu maso yabo, bazamura amaboko bamwereka ko bari bamutegerezanyije ubwuzu.

Yakomereje ku zindi zirimo, ‘ZEZEZE’, ’Umwirabura’, ‘Kamwe’, yahuriyemo n’abarimo Social Mula, Kenny Sol, Davis D, Bull Dogg, B-Threy, Khalfan, Confy, Alyn Sano, Li john na Papa Cyangwe.

Yahise ajya kuri Meterese yakoranye na ‘Yampano’, ayirangije abaha umwanya agira ati: “Reka twakire umuhungu wanjye, yitwa Kankadem, vuba aha araza kubatungura”. Kankadem yaririmbye indirimbo ye yakoranye na Bushali yise ‘Buguma’.

Bushali yahise akomereza ku ndirimbo yise ‘Ku gasima’ yasohoye mu myaka 7 ishize, abakunzi be bakomeza kumwereka ko itari yava mu mitwe yabo.

Saa kumi n’ebyiri na 12 Kenny Sol yahise ahamagarwa ku rubyiniro azamukira mu ndirimbo ‘Haso’.

Yakomereje ku ‘Ikinyafu’ yakoranye na Bruce Melody, ‘Igitangaza’, ‘Jolie’, ‘Umurego’, ‘Phenomena’, Molomita yakoranye na Nel Ngabo na Gad.

Kenny sol yabwiye abakunzi be ati: “Tugiye kuririmba indirimbo ya mbere mu gihugu, nimvuga Nyagatare munsubize ngo haje gushya” maze na bo si ukubikora. Yabasabye kuzamura amatoroshi ngo batwike Satani kuko yatsinzwe.

Saa kumi n’ebyiri na 40, ni bwo Kenny Sol yaririmbye ‘Haje Gushya’ indirimbo utareka kuvuga ko ahantu hose ibi bitaramo byanyuze yazamuye mu kirere abakunzi b’umuziki.

Nkuko byakunze kugenda mu bitaramo byabanje, Kenny Sol yasabye abakunzi be ko basubiranamo iyo ndirimbo ‘ Haje Gushya’ abakunzi be babisamira hejuru barongera bayisubiranamo nk’ikimenyetso cy’uko yishimiwe cyane.

Saa kumi n’ebyiri na 45, Umushyushyarugamba Mc Buryohe na Mc Bianca, bagarutse ku rubyiniro babwira abitabiriye ko batagomba gucikwa kuko inyuma hakiri abandi bahanzi ndetse bakomeye.

Saa moya, Tom Close watwaye Primus Guma Guma Super Star (PGGSS) bwa mbere mu 2011 yari ageze ku rubyiniro nka gahunda yo kugarura umuhanzi wayitwaye kuri buri Karere kagezemo ibi bitaramo.

Yinjiriye mu ndirimbo “Igikomere” yakoranye na Bull dog mu myaka 8 ishize, abakunzi be bamwereka ko bari bamukumbuye ariko ageze kuri “Ndacyagukunda” yakoze mu myaka 16 ishize abakunzi be bakomeza kuyiririmba bamwereka ko bakimukunda.

Tom Close yahise abwira urubyiruko rwitabiriye ati: “Mvuka muri aka Karere, Nyagatare ni ho murugo, niba hari ikintu Tom Close yagezeho ukumva ko kidashoboka nawe wava i Nyagatare ukakigeraho”.

Yakomereje kuri “Sinzigera Nkureka” na yo imaze imyaka 16 isohotse abakunzi be bakomeza kuririmbana na we, bati, ni yo wambwira ngo ngende sinzigera nkureka.”

Byabaye ibindi bindi ubwo Tom Close yageraga ku ndirimbo “Thank You” yakoranye na The Ben mu myaka 8 ishize, abakunzi be barasimbuka bishimiye cyane kuba uyu muhanzi yagarutse.

Mbere yo kuva ku rubyiniro yagize ati: “Hari abantu batatu nshaka ngo dushimire uyu munsi, uwa mbere, dukomere amashyi menshi kuri Polisi y’u Rwanda, kera habaga ibitaramo hakabura umutekano bakabihagarika ariko ubu turataramye bakuru bacu bahagaze hano biri kugenda neza. Uwa kabiri dushimire abaterankunga b’iki gikorwa. Dushimire kandi umuterankunga wanatumye nanjye ngaruka ari we Primus.

Yongeraho ati: “Ariko kandi mwibuke ko Umusaza (Perezida Kagame) yavuze  ngo Vibe zigomba guhagarara ku buzima buzima.”

Saa moya na 30, Davis D Shine Boy yari ageze ku rubyiniro mu mupira w’umwambaro w’Ikipe y’Igihugu ya Brazil, ikabutura y’amabara ya gisirikare, inkweto zizwi nka “Timberland”, yazamukiye mu ndirimbo “Biryogo” akomereza ku “Ifarasi” imaze imyaka 5 abakunzi be barasimbuka bamwereka ko bamwishimiye.

Yahise ajya kuri “Micro”, “Dede” maze Bushali na Kankadem bamusanze ku rubyiniro baza kumushyigikira mu ndirimbo bakoranye “Bermuda”.

Umuyobozi wungirije w’Akarere ka Nyagatare ushinzwe Iterambere ry’Ubukungu Matsiko Gonzague yakiriwe ku rubyiniro ngo agire ubutumwa aha abitabiriye iki gitaramo ashimira inzego z’umutekano ndetse n’abafatanyabikorwa bagize uruhare mu itegurwa ryacyo, yashishikarije kandi urubyiruko kubahiriza gahunda za Leta zirimo ubwisungane mu kwivuza ndetse no kurwanya inzoga z’inkorano.

Saa mbiri na 15 ni bwo abashyushyarugamba bahamagaye Chriss Eazy waje gushyira akadomo ku gitaramo cya Iwacu Muzika Festival.

Yinjiriye mu ndirimbo Sambolera akomereza kuri Bana, Jugumila, Sambolela, Chocolate, ageze hagati yakiriye ku rubyiniro Utta Nice baririmbanye “My Mind” n’abakunzi b’umuziki bafatanya na bo kuyiririmba.

Ku isaha ya saa tatu z’Ijoro ni bwo Chriss Eazy wari umuhanzi wa nyuma yasoje indirimbo ze maze igitaramo kirangira gityo.

Ba uwa mbere mu kumenya amakuru agezweho!!!