Uko Leta yunganira umuturage ku mashyiga avuguruye kugera kuri 90%
Amakuru

Uko Leta yunganira umuturage ku mashyiga avuguruye kugera kuri 90%

Imvaho Nshya

June 8, 2023

Guverinoma y’u Rwanda binyuze mu Kigo gishinzwe Ingufu (EDCL ku bufatanye na Banki y’u Rwanda y’Amajyambere (BRD) byatangiye gahunda ya Nkunganire ku mashyiga n’ibicanwa mu rwego rwo gufasha abaturage kugira ubuzima bwiza barwanya ihumana ry’ikirere no kwangiza ibidukikije.

Iyi gahunda yatangiye kuva mu mpera za 2021 byari biteganyijwe ko icyiciro cya mbere kizarangira mu mwaka wa 2024 igeze kuri 42% igakomeza mu mwaka wa 2026 igeze ku ngo 500.000. 

Ni gahunda izanakomeza muri gahunda Igihugu cyihaye yo guhangana n’ingaruka z’imihindagurikire y’ibihe  ifitanye isano n’iyangirika ry’ibidukikije. 

Mu kumenya byinshi kuri iyi gahunda n’uburyo umuturage yunganirwa kugera kuri 90%  Imvaho Nshya yaganiriye n’Ubuyobozi bwa EDCL/REG.

Niyonsaba Oreste, Umuyobozi ushinzwe ibicanwa muri  EDCL/REG, avuga ko Leta yashyizeho nkunganire igera no ku kwishyurira umuturage ku kigero cya 90% cy’igiciro kiri ku isoko ku mbabura, ishyiga cyangwa gaze yahisemo gukoresha.

Agira ati: “Iyi gahunda ya nkunganire ku mashyiga atangiza ikirere mu gihugu hose igamije kugeza ku Banyarwanda ibikoresho bifashisha mu guteka (imbabura zikoresha inkwi, izikoresha pareti, amashyiga ya gazi, amashyiga akoresha amashanyarazi n’ubundi buryo bwose bw’ikoranabuhanga bugenda buvumburwa n’abafatanyabikorwa bwemejwe nyuma yo gusuzuma niba buri ku rwego twifuza).”

Yakomeje avuga ko ku ngo 500,000 kugeza kuri uyu munsi bamaze kugera ku ngo zisaga 90,000.  Ati: “Leta y’u Rwanda yunganira abaguzi ku giciro ibikoresho bisanzwe bigura kugera ku kigeraro cya 90%.”

Niyonsaba Oreste avuga ko niba ishyiga rihendutse rigura amafaranga urugero ibihumbi icumi, umuturage uri mu cyahoze ari ikiciro cya mbere cy’ubudehe yishyura rwiyemezamirimo amafaranga igihumbi gusa noneho rwiyemezamirimo akazajya kwishyuza EDCL amafaranga ibihumbi icyenda(9000) binyuze muri BRD.

Avuga ko ku baturage bahoze babarirwa mu cyiciro cya kabiri bo basonerwa cyangwa bakunganirwa ku kigero cya 70%. 

Ni ukuvuga kuri rya shyiga cyangwa imbabura rishobora kugura amafaranga 10,000 yishyurirwa agera ku bihumbi 7,000, we akayifata ari uko amaze gutanga amafaranga ibihumbi bitatu (3000).

Naho umuturage wishoboye wari warashyizwe mu cyiciro cya gatatu we agobokwa na Leta ku kigero cya 45%.

Amafaranga Leta itarenga muri Nkunganire ku Mashyiga cyangwa imbabura

Niyonsaba Oreste avuga ko hari amafaranga bihaye batagomba kurenga mu kunganira abaturage bitewe n’urwego rw’igikoresho akeneye cyane iyo bageze ku cyiciro cy’ikoranabuhanga.

Agira ati: “Tugiye kuri tekinoloji tugira ibiciro tutarenza nko ku ishyiga rya gazi rigura ibihumbi ijana; urugero ntabwo twunganira umuturage uri mu cyiciro cya gatatu arenze 43,000 na we akiyishyurira asigaye.

Ku muturage uri mu cyiciro cya kabiri kugeza ku cya mbere Leta imwunganiraho 86,000 noneho akishyura ibirenzeho byose.

Zimwe mu mbogamizi zabanje mu mushinga zimaze kuvugutirwa umuti

Niyonsaba Oreste avuga ko mbere batangiye abashoramari bose bakorera i Kigali, ariko kuri ubu basabwe kugira amashami mu Ntara no mu bice bitandukanye by’Igihugu.

Hari kandi imbogamizi zo kubona amashyiga yujuje ubuziranenge, ubushobozi bw’abaturage aho usanga  n’uruhare rwe bitamworoheye kurwishyura aho kuri ubu bari kumvikana na rwiyemezamirimo kubafasha kwishyura mu byiciro, indi mbogamizi bagira ni imyumvire yo kwanga kureka uburyo bari basanzwe batekamo.

Indi mbogamizi ni uko ba rwiyemezamirimo bakiri bake gusa ngo ubukangurambaga burakomeje ngo bitabire ari benshi, ndetse ariko bazanye agashya ku isoko ndetse hashyizweho ikigega gitanga inkunga igera kuri 50%.

Inama Niyonsaba atanga harimo gusaba ba rwiyemezamirimo kubahiriza amasezerano basinyanye harimo kudahindura ikoranabuhanga, abasaba kugerageza kugera ku baturage benshi mu gihe gito gishoboka.

Asaba abaturage kubyaza umusaruro amahirwe bahawe na Leta bagafata neza amashyiga bahawe no kuva mu cyiciro cyo gufashwa bizigamira bakazagera ku rwego rwo kwigurira amashyiga.

Mutuyimana Janvière umwe mu baturage batuye mu Karere ka Musanze wahawe imbabura irondereza ibicanwa ashima iyi gahunda kuko ngo yatumye atagikoresha ibicanwa byinshi kandi yarishyuye mafaranga make.

Agira ati: “Ndashima Nyakubahwa Perezida wa Repubulika washyizeho ubu buryo bwo kuduha imbabura za cana rumwe; nayiguze amafaranga make cyane ikindi ntabwo nkigorwa no kubona inkwi. Rumwe gusa ruhisha ibiryo mu gihe mbere byashyaga nshizemo inkwi nyinshi byantwaye amafaranga menshi ariko ubu byarahindutse.”

Kugeza ubu mu Rwanda habarurwa ingo zigera kuri miliyoni enye, EDCL yemeza ko kugira ngo ikoranabuhanga ry’uburyo bwo gucana ryemerwe bisaba kuba rifite ubushobozi bwo kugabanya ibicanwa ku kigero kirenga 50%.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA