Uko yakoreshaga imodoka z’abageni mu kwinjiza urumogi mu Rwanda
Aamakuru Agezweho

Uko yakoreshaga imodoka z’abageni mu kwinjiza urumogi mu Rwanda

Imvaho Nshya

October 25, 2023

Abinjiza ibiyobyabwenge birimo urumogi, kanyanga n’ibindi, bakoresha amayeri akomeye yo kwinjiza mu Rwanda ibiyobyabwenge. Ibi Polisi y’Igihugu yagiye ibitangaza mu bihe bitandukanye.

Uwababyeyi Zawadi Georgette usengera mu Itorero ADEPR ahazwi nko kuri Bukane mu Karere ka Musanze mu Ntara y’Amajyaruguru, aherutse kubwiriza mu Itorero Zion Temple Kimironko atanga ubuhamya bw’uko binjizaga ibiyobyabwenge.

Iyi nkuru Uwababyeyi ayibara asobanura uko yakijijwe agahita abatizwa kandi agahanura, ibyo ngo byabereye umunsi umwe.

Avuga ko atirata ibyo yakoze ahubwo yirata ibyo Krisitu yamukuyemo.

Kuri we ngo ni ubuhamya bugenda, mu kuririmba ni ubuhamya, mu kuvuga ubutumwa ni ubuhamya, ariko by’umwihariko ngo abamuzi kera n’abo baziranye bamuzi mu buhamya bw’umukobwa wari Umumeni (ikirara).

Yesu yamufashe ari ku wa Gatandatu ku munsi w’umuganda, amusanga avuye gufora, yari umufozi (Abantu bambutsa ibintu bidasoreye ku mupaka).

Yacuruzaga ibibyobwenge by’umwihariko urumogi, kanyanga n’akantu k’agafu ko kunyuza mu mazuru.

Ati: “Twaforaga dukoresheje imodoka zitwara abageni, ugafata imodoka ugashyiramo ibiyobyabwenge runaka wapanze gutwara, ari nk’imodoka 8 mukazuzuza zose cyangwa 10 mwarangiza mukazidekora.

Tugafata umusore tukamwambika kositime, tugafata umukobwa tukamwambika agatimba, twarangiza tugashaka abambarira umukobwa, sinzi uherutse kubivuga ku mbuga nkoranyambaga aravuga ngo n’ibicucu birakura.

None se urambwira ngo nk’umuntu watuberaga marene (Marraine) cyangwa Pare (Parrain), si umuntu se? Tugashaka Pare wakuze atyo na Marene wakuze atyo, twanyura mu muhanda Polisi zatubona zikagira ngo ni ubukwe kandi dufoye”.

Avuga ko Imana yabwiye umupolisi wasengaga, ngo ejo nujya mu kazi kuri Sitade Umuganda, imodoka zizaza zitwaye abageni uzazihagarike.

Agira ati: “Tuhageze imodoka aba arazihagaritse azitera iburyo abazi i Musanze ubu bahagize Sitation ya Engen, baparitse ahongaho umupolisi aravuga ngo muzane ibyangombwa atangira kubasaka, tuti Afande ubukwe burimo gukererwa ati niba ari ubukwe buramaze.

Bibiliya iravuga ngo umunyabyaha yiruka ntakimwirukankije, urutima rurandya.

Nari maze gufungwa inshuro 70 ndavuga nti nibamfunga ku nshuro ya 71 noneho bose bararambiwe nta n’umwe unkurayo.

Mba nsohotse mu modoka niruka nzamuka nerekeza ahantu bita mu Gashangiro, Polisi ziza zizamuka mba numvise ahantu barimo kuririmbira mba ninazemo aho kugira ngo nicare nk’inyuma cyangwa muri Korali, umwuka aranshorera anjyana aho nzajya nicara.

Ndagenda ndavuga ngo ntawunkura iruhande rwa Pasiteri, aba ariho niyicarira kumbi sinjye wabikoraga ni umwuka wanyitegereje abona n’ubundi izi ntebe ari zo ngomba kujya nicaramo.

Ijisho ry’Imana rirabona nta nahatoya waryihisha. […]  Ndagenda nicaramo n’agakabutura kanjye n’udukweto twanjye, Afande araza arareba ati uriya mwana namara gusenga mumubwire adusange kuri Sitasiyo, byabaye hehe? Niyicariye aho ibyakurikiyeho ntimubimbaze”.

Avuga ko yibutse ko afite utubure, umutima we umubwira kujya ku bwiherero ngo acome agaruke yuzuye.

Akomeza agira ati: “Dufite Abadayimoni batwongorera no mu rusengero ariko hashimwe Imana ko abadayimoni bongorera amatwi ariko umwuka akongorera umutima”.

Yagiye hanze abura abapolisi kandi ngo ibyo yakoze ntibyamwemereraga kubaho adafunze.

Yahise abatizwa hamwe n’abandi kandi atarize igice, ahera ubwo akizwa, ntiyongera gufora (kwambutsa mu buryo bwa magendu) ibiyobyabwenge kugeza magingo aya ahubwo ngo ni umukozi w’Imana.

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA