Umuganura2023: Inteko y’Umuco yagaragaje ko kuganura bijyana n’ubumwe
Amakuru

Umuganura2023: Inteko y’Umuco yagaragaje ko kuganura bijyana n’ubumwe

Imvaho Nshya

July 24, 2023

Inteko y’Umuco itangaza ko kuganura bikwiye kujyana n’ubumwe ndetse n’ubudaheranwa. Yatangaje ibi mu gihe habura iminsi igera ku icumi ngo Abanyarwanda bizihize umunsi mukuru w’Umuganura w’uyu mwaka wa 2023.

Mu muco nyarwanda, Abanyarwanda basangira akabisi n’agahiye, ufite icyo arusha mugenzi we ntamucure, uwejeje akaganuza uwarumbije, uwahuye n’amage akagobokwa na mugenzi we.

Mu nyandiko nsobanurampamvu y’Inteko y’Umuco, Imvaho Nshya ifitiye kopi, igira iti: “Ni umwanya mwiza wo kuganuza abatarahiriwe n’ibihe by’umwihariko abagizweho ingaruka n’ibiza no kuganuza muri rusange nk’uko byahoze mu muco nyarwanda”.

Inteko y’Umuco itangaza ko icyerekezo cyo kwizihiza Umuganura 2023, ari umwanya wo kurushaho kunga ubumwe no kudaheranwa n’amage kuko ngo ari yo nzira yo kwikura mu bizazane.

Ibirori by’umuganura 2023 ku rwego rw’Igihugu bizizihirizwa mu Ntara y’Iburengerazuba mu Karere ka Rutsiro tariki 04 Kanama uyu mwaka.

Intara y’Iburengerazuba yibasiwe n’ibiza by’imvura idasanzwe muri uyu mwaka, ni muri urwo rwego hazizihirizwa Umuganura mu rwego rwo kuganuza abagizweho ingaruka n’ibiza.

Insanganyamatsiko y’uyu mwaka igira iti ‘Umuganura, isôoko y’ubumwe n’ishingiro ryo kudaheranwa’.

Inteko y’Umuco ikomeza igira iti: “Ingingo ikwiye kwibandwaho muri iyi nsanganyamatsiko, ni ukuganura turangwa n’ubumwe bugaragarira mu bufatanye, gutabarana no gusangira”.

Icyumweru cyahariwe umuganura kizatangira tariki 29 Nyakanga kikazatangirira mu Muganda usoza uku kwezi.

Muri iki cyumweru hazakorwa ibikorwa bitandukanye birimo ibiganiro muri za Kaminuza n’amashuri makuru, ubukangurambaga bunyuze mu bikorwa by’umuganda, ibiganiro kuri Radiyo na Televiziyo by’u Rwanda.

Hazasurwa ahantu nyaburanga hatandukanye, Umuganura w’abana mu Karere ka Huye, habe n’igitaramo cy’Umuganura ‘Nyanza Twataramye!’.

Hateganyijwe kandi inama nyunguranabitekerezo ku muco n’indangagaciro, hazanizihizwa umuganura ku Banyarwanda batuye mu mahanga.

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA