Umujyi wa Kigali uzamurika aho ugeze mu kuba umujyi w’ikoranabuhanga
Amakuru

Umujyi wa Kigali uzamurika aho ugeze mu kuba umujyi w’ikoranabuhanga

NTAWITONDA JEAN CLAUDE

August 9, 2023

Hagati y’italiki ya 6 n’iya 8 Nzeri 2023, Umujyi wa Kigali witeguye kwakira Inama yiga ku Ishoramari rikorwa mu kwimakaza Imijyi y’Ikoranabuhanga (Smart Cities) kandi iramba, izahemberwamo imijyi 30 y’Afurika ikomeje kugaragaza impinduka mu gushaka ibisubizo by’ikoranabuhanga bitanga icyizere.

Ubuyobozi bw’Umujyi wa Kigali buvuga ko iyo nama izahuza abarenga 1 000 baturutse mu bihugu binyuranye, izaba amahirwe yo kugaragaza ishoramari rikomeje gushyirwa mu gutanga ibisubizo bishingiye ku ikoranabuhanga.

Byitezwe ko abazayitabira bazareba ku kurushaho kwimakaza ubufatanye bw’abikorera na Leta, kugaragaza ibisubizo byo kubaka imijyi y’ikoranabuhanga, no gushyira ahagaragara amahirwe y’ishoramari ashobora guhanga imijyi y’Afurika iramba kandi ifite umuvuduko uhamye mu iterambere.

Bivugwa ko mu bisubizo bizagaragazwa harimo kubaka uburyo burambye bwo gukwirakwiza ingufu zitangiza ibidukikije, kubaka inzu ziciriritse, ikoranabuhanga mu bwubatsi no gukoresha ibikoresho bigezweho, mu kunoza taransiporo ndetse no kugera kuri serivisi zitangirwa mu mijyi, kugabanya umuvundo w’ibinyabiziga n’ibyanduza ibidukikije n’ibindi.

Mu bindi bisubizo harimo uburyo burambye bw’imicungire y’umutungo kamere, kugabanya imyanda no kunagura ibikoresho byakoreshejwe, imiyoborere ikoresha ikoranabuhanga, uruhare rw’abaturage, serivisi, guhanga udushya n’imirimo y’ahazaza.

Umuyobozi w’Umujyi wa Kigali Pudence Rubingisa, yavuze ko bamaze igihe bashyira mu bikorwa ibisubizo  byimakaza umujyi w’ikoranabuhanga ari na byo bizagaragarizwa abazitabira iyo nama.

Meya Rubingisa yagize ati: “Dufite ibisubizo byimakaza ikoranabuhanga nk’iryifashishwa mu gutanga serivisi za Leta rizwi nka Irembo, ubwiyongere bw’abakoresha internet na telefoni, uburyo bw’ikoranabuhanga bwo gutwara abantu n’ibyabo. Nanone kandi twashyizeho amatara amurikira abantu ku muhanda yoroshya kumenya ahari ikibazo tukaba twagikemura. Hari kandi uburyo bw’ikoranabuhanga bwo gukusanya imyanda, kuyitunganya ndetse no gufatira amazi mu ngo.”

Yakomeje akomoza ku bufatanye bw’inzego za Leta n’iz’abikorera, ashimangira ko bifuza kubona abashoramari biyongera mu mishanga y’ingenzi yatangiye gushyirwa mu bikorwa nk’ikoranabuhanga mu gukusanya imyanda no kuyibyaza umusaruro mu mijyi yunganira Kigali.

Umujyi wa Kigali unagaragaza ko mu byo wishimira ko wagezeho harimo uburyo bwo kwishyura ingendo rusange hifashishijwe ikoranabuhanga ryagabanyije guhererekanya amafaranga.

Nanone kandi mu rwego rwo koroshya gutwara abantu mu buryo bwa rusange, hakomeje umushinga wo kubaka ibikorwa remezo by’imodoka zikoresha amashanyarazi harimo na bisi zitezweho kwiyongera muri Kigali.

Muri iyo nama, Umujyi wa Kigali uzamurika izo bisi, ikoreshwa rya mubazi kuri moto no mu modoka zitwara abagenzi mu buryo bwa taxi.

Umujyi kandi unafite gahunda yo gutangiza umushinga w’inzira yahariwe za bisi (Bus Rapid Transit/BRT) uzagira uruhare rukomeye mu kugabanya umuvundo mu muhanda uva mu Mujyi rwagati ukagera ku Kibuga cy’Indege Mpuzamahanga cya Kigali.

Ibindi bisubizo by’ikoranabuhanga bizamurikwa harimo uwo gukwirakwiza amaraso mu bitaro byo mu Gihugu hifashishijwe indege nto zitagira abapilote (drones), serivisi z’ubuvuzi zitangwa hifashishijwe telefoni, ibyangomba by’ubutaka byifashisha ikoranabuhanga, ikoranabuhanga ryifashishwa mu irangamimerere ndetse n’iryoroshya gutanga ibyangombwa byo kubaka.

Mu bindi bizamurikwa harimo gahunda ya car-free zone aho imodoka zakumiriwe mu bice bitandukanye by’Umujyi wa Kigali, Umushinga wiswe Kigali Innovation City, Ibigo bitandukanye by’ubushakashatsi, ikoranabuhanga ryifashishwa mu bucuruzi, ikoranabuhanga ryifashishwa mu gucunga umutekano, ibyumba by’ikoranabuhanga mu mashuri n’ibindi byinshi.

Umunyamabanga Uhoraho muri Minisiteri y’Ikoranabuhanga no Guhanga Ibishya Yves Iradukunda, yagize ati: “Ubufatanye n’urwego rw’abikorera na sosiyete sivile ni bwo buzaba urufunguzo mu gihe tubyaza umusaruro ikoranabuhanga no guhanga udushya mu kunoza imibereho y’Abanyarwanda bose.”

Yongeyeho ko u Rwanda rwamaze kwemeza Politiki y’Igihugu igenga imikoreshereze y’ikoranabuhanga ry’ubwenge muntu butari karemano (AI). Ni ikoranabuhanga ryitezweho kongera umusaruro mu nzego zose z’ubukungu.

Uko imijyi y’Afurika irushaho gutera imbere, bigahurirana n’ingorane ziterwa n’imihindagurikire y’ibihe, kwifashisha ikoranabuhanga mu gushaka ibisubizo birambye bikenewe kurusha uko byahoze.

Byitezwe ko muri iyo nama hazahembwa imijyi 30 ifite imishinga itanga icyizere mu kubaka imijyi y’ikoranabuhanga irambye, mu gihe Umugabane w’Afurika uteganyirizwa kuzaba utuwe n’abaturage barenga miliyari 2.4 bitarenze mu mwaka wa 2050 aho abasaga miliyoni 800 bazaba batuye mu mijyi bitarenze mu 2030.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA