“Umuyobozi ntabereyeho guhana, abereyeho gushaka umukozi mwiza”
Amakuru

“Umuyobozi ntabereyeho guhana, abereyeho gushaka umukozi mwiza”

NTAWITONDA JEAN CLAUDE

June 26, 2023

Komisiyo y’Igihugu ishinzwe Abakozi ba Leta (NPSC) itangaza ko Umuyobozi atabereyeho guhana umukozi ahubwo ko akwiye gushaka umukozi mwiza.

Aherutse kubigarukaho mu nama yo ku rwego rw’Igihugu yo guteza imbere imyitwarire mbonezamurimo mu nzego za Leta, yabaye mu cyumweru gishize.

Angelina Muganza, Umunyamabanga Nshingwabikorwa wa Komisiyo y’Igihugu ishinzwe abakozi ba Leta, agaragaza ko hari umukozi ushobora gukora amakosa agahanwa ariko inzira zo guhana zitubahirijwe.

Ni mu gihe hari inzego usanga abakozi baracitsemo ibice bamwe bari ku ruhande rw’umuyobozi runaka abandi bari ku rundi ruhande, ibyo ngo bigatuma umusaruro wifuzwa mu kigo utagerwaho.

NPSC itangaza ko n’abayobozi bafata ibyemezo birimo kwirukana umukozi mu buryo bunyuranije n’amategeko akarega ikigo kandi akagitsinda.

Muganza agira ati: “Icyo umuyobozi abereyeho si uguhana umukozi ahubwo icya mbere Umuyobozi abereyeho, ni ugushaka umukozi mwiza, akamumenyereza akazi, akamumenyereza imyifatire n’imyitwarire mbonezamurimo ariko yakora amakosa agahanurwa akanahanwa”.

Asobanura ko mu guhana umukozi wa Leta hari uburyo buteganywa n’amategeko.

Abayobozi bagirwa inama ko abakozi ari abantu bafatanya nk’abakozi bayobora abandi kugira ngo bagere ku ntego.

Yagize ati: “Ntabwo ari ba bantu ucunganwa na bo, umwe yihisha undi, undi abeshya, undi yiba. Ahubwo ni ba bantu dukorana tukumva intego z’urwego, tukumva aho turimo kuganisha serivisi dutanga ku baturage, ubiteshutseho agahanwa kandi agahanwa hakurikijwe amategeko”.

Ati: “Bijya bitubabaza cyane iyo umuntu akoze amakosa agahanwa hadakurikijwe amategeko ejo, ejobundi akagenda agatsinda urwo rwego”.

Komisiyo y’Igihugu ishinzwe abakozi ba Leta ivuga ko abayobozi bakwiye gukoresha abakozi nk’imbaraga urwego ruba rwahawe ariko umukozi na we agatozwa kugira indangagaciro nziza no gukora kinyamwuga ariko yabiteshukaho agahanwa kandi bikurikije amategeko.

Iyi komisiyo ikomeza ivuga ko iyo umuyobozi akoranye n’umukozi rimwe mu mwaka, ashobora gusanga yarayobye ariko ngo bafite uburyo bwo gukorana n’abakozi umunsi ku wundi ku buryo no kubaha amanota y’imihigo biborohera.

Muganza yagize ati: “Igisabwa nuko buri muntu wese uyobora abakozi akwiye kuba ari kumwe na bo mu iteganyabikorwa no mu gukurikirana ibikorwa ntuzategereze umwaka urangiye.

Iyo umwaka urangiye hari nubwo aba atazi abakozi bakorana na we ahubwo bakaba babazi mu madosiye. 

Ariko iyo ari ba bakozi mushobora guhura rimwe mu cyumweru kugira ngo mukore gahunda y’icyo cyumweru, mukaba mwahura mu kwezi mukareba ibyo mwemeranije muri uko kwezi bigeze hehe.

Iyo bigenze gutyo nta nubwo umutegera mu isuzuma (Evaluation) rikorwa umwaka urangira.

Ahubwo mu kwezi ushobora kumubwira uti ariko gahunda twakoze dore umaze kugera ku bikorwa bitanu ibindi bitanu nturabikora.

Uku kwezi gutaha rero ugomba gukora ibindi icumi biri imbere ndetse n’ibi bitanu ukabyongeraho”.

Yakomoje ku bayobozi badakorera hamwe

Muganza, Umunyamabanga Nshingwabikorwa wa Komisiyo y’Igihugu ishinzwe abakozi ba Leta, atangaza ko abayobozi badakorera hamwe bigira ingaruka zirimo kugabana abakozi, bamwe bakajya ku ruhande rw’umuyobozi umwe abandi bakajya ku rundi ruhande.

Ati: “Iyo babigenjeje gutyo rwa rugamba barimo kurwanya rw’ubukene muri ako Karere, muri uwo Murenge, muri icyo kigo ntabwo bazabigeraho kuko imbaraga nyinshi barazishyira mu kuvuga ngo aba bakozi ni abanjye, aba baranyubaha, aba baransuzugura…”.

Ahamya ko muri ya myitwarire mbonezamurimo iba yapfiriye hejuru mu buyobozi.

Ati: “Ariko niba ikibazo kigiye kuba mugenzi we urumva ko imbaraga zigiye gutatana hagati aho ntabwo intego bazazigeraho”.

Ingaruka z’imikorere mibi

Imikorere mibi igira ingaruka nyinshi ku iterambere ry’umuturage by’umwihariko mu kugarura inyuma iryo terambere ry’umuturage.

Muganza yagize ati: “Niba abantu barimo guhangana mu kazi ni ukuvuga ngo ntabwo murimo gutera imbere.

Iyo hari imihigo mwakoze ntabwo muyigeraho, niba ari gahunda murimo gutegura ntabwo mwayigeraho nukuvuga ngo umunyarwanda ni we uzahahombera.

Umunyarwanda uzahomba si runaka na runaka ni za miliyoni 13, natwe twese turimo.

Nukuvuga ngo niba utarimo gukora inshingano zawe uri umuyobozi, izo nshingano zigera aho nawe zikakugeraho.

Niba urimo kudindiza uburezi, n’abana bawe bazadindira, niba ubuhinzi urimo kubudindiza na we uzasonza, ubirebye ntabwo turimo gukorera abanyarwanda turimo kwikorera twese. 

Mu gihe udakorana na mugenzi wawe neza, mu gihe udakorana n’abakozi ushinzwe cyangwa mufatanije neza za ntego ntabwo muzazigeraho”.

TANGA IGITECYEREZO

  • kabano
    June 27, 2023 at 7:38 am Musubize

    Iyi nyigisho iratwubatse.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA