Urubyiruko ruba mu mahanga rwiyemeje kuba ba ambasaderi b’u Rwanda
Amakuru

Urubyiruko ruba mu mahanga rwiyemeje kuba ba ambasaderi b’u Rwanda

Imvaho Nshya

July 13, 2023

Urubyiruko rw’Abanyarwanda baba mu mahanga rutangaza ko kuba rwasuye umuhora w’amateka yo kubohora igihugu, biyemeje kuba, ba ambasaderi beza b’u Rwanda bahangana n’abakoresha imbuga nkoranyambaga mu kuruharabika, bahinyuza abagoreka amateka yarwo.

Babigarutseho ubwo basuraga umuhora w’amateka yo kubohora igihugu mu Karere ka Nyagatare.

Urwo rubyiruko rugera kuri 63 rugizwe n’abavukiye mu Rwanda hanyuma bakajya mu mahanga ndetse n’abavukiye mu mahanga.

Mu gihe basuraga uwo muhora basobanukiwe impamvu byari ngomba gutangiza urugamba rwo kubohora igihugu ubwo bageraga i Kagitumba, mu Karere ka Nyagatare, aharasiwe isasu rya mbere ryatangije urugamba rwo  kubohora igihugu.

Bashimye ubutwari bwa RPF Inkotanyi n’Umugaba w’Ikirenga wari uzirangaje imbere, Perezida Paul Kagame ubwitange bagize none u Rwanda rukaba rugeze aheza.

Esther Umutoni uba mu Bwongereza yatangaje ko ashimishijwe no kumenya amateka yo kubohora igihugu, akanishimira intsinzi.

Yagize ati: “Dufite amahirwe ndetse twishimiye kuba hano. Icya mbere kureba aho Perezida n’ingabo z’u Rwanda yari ayoboye babohoye gihugu, uko bari bameze ndetse n’aho bari bari, twese aho twagiye tuva mu bihugu bitandukanye, twese twishimiye intsinzi y’igihugu cyacu.

Ikintu cya mbere nzababwira ni iby’u Rwanda ndetse n’amahirwe cyangwa inyungu y’uko u Rwanda rwateye imbere”.

Rumwe muri urwo rubyiruko kandi  rutangaza ko rwumva runyotewe no gukunda u Rwanda nk’igihugu cyarubyaye, nk’umubyeyi rukavuga ko rwumva ruteganya kuzagaruka rukagiteza imbere.

Uwitwa Patrick Manzi utuye muri Norvege yatangaje ko u Rwanda ari  igihugu cye, yumva afite gahunda yo kuza guturamo akagiteza imbere.

Ati: “U Rwanda ni igihugu cyanjye, maze kwiga amateka  y’u Rwanda, nasobanukiwe uburyo Perezida n’ingabo za RPF bashoboye kubohora igihugu, u Rwanda rukaba rurimo gutera imbere. Nanjye nshaka  gutura ahangaha, nshaka gukora aha, nkagira uruhare  ngateza u Rwanda imbere”.

Ibi byanashimangiwe n’uhagarariye urubyiruko rw’Abanyarwanda ruba mu Bubiligi, Bizimana Kenedy asanga gusobanukirwa amateka y’ukuri y’igihugu bikwiye gutuma bahinyuza abayagoreka.

Urubyiruko rw’u Rwanda ruba muri Diaspora rwanyuzwe no gusobanurirwa amateka y’urugamba rwo kubohora Igihugu

Ati: Intambara ku Isi iba kuri ubu ku mbuga nkoranyambaga bishobora kugira impinduka nini cyane kuko  bigera ku bantu benshi kandi mu gihe gito[…..] Imbaraga bakoresha uyu munsi kugira ngo babone ababakurikira. Urubyiruko ruri hano ntabwo bashobora kurwana iyo ntambara mu gihe badafite iby’ingenzi bibafasha kurwana iyo ntambara, ariko iyo bavuye hano bize amateka, iyo bagiye hariya  na bo birabahindura”.

Sandrine Uwimbabazi Maziyateke ushinzwe ibikorwa by’Abanyarwanda baba mu mahanga muri Minisiteri y’Ububanyi n’amahanga na we avuga ko hari gushyirwa imbaraga mu kwereka no kwigisha urubyiruko amateka y’ukuri y’igihugu.

Yagize ati: “Mugiye kuba ba Ambasaderi beza b’u Rwanda, bamwe baravuga bati baratubeshye, noneho turimo turabibona. Kujya ahantu hamwe na hamwe, aho biga amateka uko urugamba rwo kubohora igihugu rwagenze barimo kugenda babyumva, noneho nabo bose no ku bakomeza kubeshya ku mbuga nkoranyambaga, turasaba na bo baze bige, bakomeze bakurikire uko gahunda z’igihugu zimeze bakurikira amateka y’Igihugu cyacu.”

Urubyiruko rwakomeje gushimangira bidasubirwaho ubutwari bw’Inkotanyi, rurasobanukirwa kandi no kumenya amateka ari i Gikoba mu Murenge wa Tabagwe ku ndake yahoze ari iya Perezida wa Repubulika Paul Kagame ari na we wari uyoboye urugamba rwagejeje igihugu ku ntsinzi yo kukibohora.

Runavuga ko ubutwari bw’Inkotanyi mu kubohora Igihugu ari umusingi abakiri bato bakwiye kubakiraho u Rwanda rw’ejo rwiza, rubereye Abanyarwanda bose.

Uru Rubyiruko muri rusange ruvuga ko rwihaye umukoro wo kuba ba ambasaderi b’u Rwanda mu mahanga nubwo bazasubirayo ndetse harimo benshi bifuza kuza gutura mu Rwanda.

 Yanditswe na NYIRANEZA Judith

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA