Uwangaga urunuka FPR Inkotanyi arashimira Perezida Kagame wamuhaye inzu
Amakuru

Uwangaga urunuka FPR Inkotanyi arashimira Perezida Kagame wamuhaye inzu

Imvaho Nshya

October 26, 2023

Ntirampeba Jean Pierre wahoze mu Ngabo za Leta y’u Rwanda (FAR) yateguye ikanashyira mu bikorwa Jenoside yakorewe Abatutsi, akaba umucengenzi wafashwe ari mu mugambi kwinjira mu mutwe w’iterabwoba wa FDLR, arashimira Perezida wa Repubulika y’u Rwanda Paul Kagame wamuhaye amahirwe atandukanye atitaye ku hahise he.

Uyu mugabo w’imyaka 52 ni umwe mu bahoze ari abasirikare bashyikirijwe inzu za kijyambere mu Mudugudu wa Bihinga uherereye mu Murenge wa Jenda, Akarere ka Nyabihu mu muhango wabaye ku wa Gatatu tariki ya 25 Ukwakira 2023.

Mu buhamya yahaye Imvaho Nshya, Ntirampeba yavuze ko atigeze yumva ineza ya RPF Inkotanyi kuva yatangira urugamba rwo kubohora Igihugu kugeza batsinzwe mu mwaka wa 1994, ari na ho yahereye akomereza mu Bacengezi bayogoje igice kinini cy’amajyaruguru y’u Rwanda.

Nyuma y’uko Ingabo z’u Rwanda (RDF) zibatsimbuye mu Rwanda bari Ingabo z’Igihugu (FAR), Ntirampeba na we yajyanye na bagenzi be mu mashyamba ya Zaire kuri ubu yaje kuba Repubulika Iharanira Demokarasi ya Congo (RDC).

Yagize ati: “Nari mfitiye urwango RPF Inkotanyi ndetse n’uwo numvaga ko ayishigikiye ntabwo twajyaga imbizi, numvaga nta munsi n’umwe nzashyikirana n’Inkotanyi ngo tube twakwicarana. Twararwanye kugeza zidutsimbuye mu Rwanda nerekeza muri Congo Kinshasa yahoze ari Zaire. RDF rero ni yo yadusenyeho inkambi ndataha ariko ntabwo nanyunzwe ku buryo naje gukora igicengezi.”

Ntirampeba Jean Pierre avuga ko nubwo yagiye mu gicengezi azi neza ko azafatanya na bagenzi be bagafata u Rwanda, na bwo   ntibyamuhiriye kuko Ingabo za RDF zamufashe ari mu mugambi wo gukomereza muri FDLR ariko  zikamusaba kwifatanya na zo.

Yagize ati: “Mu 1999 ni bwo nafashe umugambi wo kujya mu gicengezi ariko na byo ntibyampiriye kuko RDF yamfashe bunyago turi ku rugamba mu Karere ka Musanze munsi y’ibirunga nzi neza ko izi ngabo zigiye kunyica, ariko baramfashe baranganiriza bansaba ko ibyiza nakwifatanya na bo tukarwanya uwo ari we wese ugamije guhungabanya umutekano w’u Rwanda.”

Yakomeje avuga ko banamubwiye ko mu gihe yaba adashaka gukomeza kuba umusirikare yajya mu buzima busanzwe akiteza imbere nk’abandi Banyarwanda, aho gusiragira mu mashyamba nta cyizere cy’ahazaza afite.

Ati: “Nahisemo gukomeza kurwanya umwanzi ariko ndi ku ruhande rwa RDF, twarwanyije umwanzi kandi turatsinda ubu dufite amahoro asesuye ni yo mpamvu ubona twishimye”.

Ubwo yashyikirizwaga inzu yo guturamo n’umuryango we ifite agaciro ka miliyoni 16 z’amafaranga y’u Rwanda, Ntirampeba yavuze ko ibyo Perezida Kagame akorera Abanyarwanda birenze, kandi ko bigoye kubona umuntu umeze nkawe ku Isi.

Ntirambeba n’umugore we bari mu nzu bubakiwe na Perezida Kagame, bakaba bishimiye ko baruhutse ubukode

Yagize ati: “Nta muntu ku Isi ushobora kubona umeze nka Perezida wacu Paul Kagame. Ni we Muntu ushobora kumva ko umugizi wa nabi yavamo umuntu muzima… Ndamushimiye ntabwo nagiraga aho kuba kuko niberaga mu nzu nkodesha na byo bigateza amakimbirane, ndamushimye kandi ndamwizeza ko nzongera kumutora.”

Uyu mugabo wasezerewe mu Ngabo z’u Rwanda RDF mu mwaka wa   2017, avuga ko amafaranga yatangaga mu bukode bw’inzu agiye kujya ayazigama akayikenuzamo agura amatungo n’ibindi bimuteza imbere.

Yijeje ko azafata neza inzu bamuhaye idafite inenge n’imwe ku buryo yaba ikeneye gusanwa, akaba nanone asaba abandi bagifite akayihayiho ko gutera u Rwanda ko babyibagirwa ahubwo bakaza kubaka u Rwanda.

Yagize ati: “Abo bose bari mu mashyamba ya Congo bagamije gutera u Rwanda ibyo bintu ni bababisubike batahe bemye, bave muri ziriya nzu z’imigano zidafite aho zihuriye n’ibiraro by’inka zo mu Rwanda. Baze Kagame abubakire amagorofa, abana babo bige, bivuze batagombye kwihata ibyatsi ngo barivura.”

Kuba Perezida Kagame atita ku byo umuntu yaba yarakosheje ahubwo akaba azi neza ko uwacumuye ashobora guhinduka, bishimangirwa na Perezida wa Komisiyo y’Igihugu yo gusezerera no gusubiza mu buzima busanzwe abahoze ari abasirikare (RDRC), Valerie Nyirahabineza.

Yagize ati: “Turashimira Nyakubahwa Perezida Paul Kagame utekerereza ineza y’Abanyarwanda bose atitaye ku nkomoko cyangwa se ibyo yaba yarakoze bitagenze neza, ahubwo akumva koko ko Umunyarwanda akwiye kubaho mu mahoro. Nka twe abo muri Komisiyo rero turabyishimira iyo umuntu aje avuga ko yahoze muri Nyatura, FDLR, RUD- Urunana, ariko akakubwira ko ntavangura yakorewe. Kuko twebwe iwacu abavuye mu gisirikare tubafata kimwe bapfa kuba ari Abanyarwanda.”

Nyirahabineza akomeza asaba ko abo bose Perezida Kagame agenda yereka ineza na bo birinda icyo ari icyo cyose cyahunhgabanya umutekano w’u Rwanda, kandi bakabungabunhga ibimaze kugerwaho bafata neza impano agenda abaha harimo n’inzu bubakirwa.

Muri uyu Mudugudu wa Bihinga hatujwe imiryango 12 y’abahoze ari abasirikare, muri rusange hakaba harimo imiryango 141 y’abaturage barimo n’abakuwe mu manegeka, abamugariye ku rugamba, abarokotse Jenoside yakorewe Abatutsi n’abandi Banyarwanda batishoboye.

Kugeza ubu Komisiyo y’Igihugu yo gusezerera no gusubiza mu buzima busanzwe abahoze ari abasirikare imaze kubaka inzu  zisaga 1500, aho buri imwe muri zo iba ifite agaciro ka miliyoni zisaga 15 z’amafaranga y’u Rwanda.

Perezida wa RDRC Valerie Nyirahabineza

NGABOYABAHIZI PROTAIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA