Zimbabwe yashimye u Rwanda rwanyuze mu bikomeye rukanamba ku bumwe
Amakuru

Zimbabwe yashimye u Rwanda rwanyuze mu bikomeye rukanamba ku bumwe

NTAWITONDA JEAN CLAUDE

July 24, 2023

Guverinoma ya Zimbabwe yashimye Abanyarwanda banyuze mu bikomeye ariko bagakomeza kunamba ku bumwe bwabo, none ubu umusarururo wabwo ukaba ugaragarira mu iterambere Igihugu kigezeho nyuma y’imyaka ikabakaba 30 ishize. 

Byagarutsweho na Minisitiri w’Ububanyi n’Amahanga n’Ubucuruzi Mpuzamahanga w’Agateganyo wa Zimbabwe Prof. Amon Murwira, ubwo yitabiraga ibirori byo kwizihiza isabukuru y’imyaka 29 yo Kwihohora n’iya 61 y’Ubwigenge byabereye i Harare mu mpera z’icyumweru gishize. 

Yavuze ko mu myaka ikabakaba 30 ishize Abanyarwanda bateye intambwe nziza yo kwiyomora ibikomere no kwimakaza ubumwe n’ubwiyunge byajyanye no guharanira iterambere rirambye. 

Yagize ati: “Nubwo baciye mu bikomeye, twishimira ko abavandimwe bacu b’Abanyarwanda bakomeje kunga ubumwe mu gushaka amahoro n’ubwiyunge. 

Uyu ni umurage ukwiye kurindanwa icyubahiro kandi ugahererekanywa mu bisekuru by’ahazaza. Ni umurage w’icyerekezo kimwe, igeno rimwe n’Igihugu kimwe.”

Yavuze kandi ko Zimbabwe itazahwema gufatanya n’u Rwanda mu kurwanya abagerageza kugoreka amateka yarwo no kuyapfobya. 

Yongeyeho ko umubano urangwa hagati y’ibihugu byombi ukomeje kongerwamo ikibatsi, iterambere ryawo rikaba rishingiye ku bushake bwa Politiki bw’Abayobozi basangiye icyerekezo cyo kugera ku iterambere rirambye. 

Minisitiri w’Ububanyi n’Amahanga n’Ubucuruzi Mpuzamahanga w’Agateganyo, Amon Murwira

Yatanze urugero rw’intambwe nziza imaze guterwa agaruka ku masezerano y’ubutwererane agamije guteza imbere urwego rw’ubumenyi n’Ikoranabuhanga, imiturire no kwimakaza iterambere ry’abagore aheruka gusinywa muri Gicurasi 2023. 

Ambasaderi w’u Rwanda muri Zimbabwe James Musoni, yagarutse ku mateka y’u Rwanda kuva rubonye icyiswe ubwigenge, ndetse n’igihe rwabubonye bwuzuye kubera ubwitange bw’Abanyarwanda bemeye gutanga ikiguzi cy’ubuzima bwabo kugira ngo abariho uyu munsi no mu gihe kizaza bazabeho mu mahoro n’iterambere birambye. 

Yagize ati: “Taliki ya 4 Nyakanga itwibutsa ubwitange, gukunda Igihugu no kwihangana by’Abanyarwanda byagejeje ku kubohora Igihugu, gushyira iherezo kuri Jenoside yakorewe Abatutsi, akarengane no kugarura ubumwe n’ubwiyunge, bikajyana no guharanira uburenganzira n’amahirwe angana ku Banyarwanda bose.”

Amb. Musoni yakomoje ku ntambwe ihebuje u Rwanda rwateye mu myaka 29 ishize, agira ati: “Nk’uko Nyakubahwa Perezida Paul Kagame yabivuze mu mwaka ushize, uyu munsi turi Igihugu cyahindutse mu mutima, mu mutwe no ku mubiri. U Rwanda rwahindutse rwiza, bigaragazwa n’umutekano uri mu Gihugu.”

Yagaragaje ko nubwo hari impinduka nziza, Abanyarwanda bataragera aho bifuza kugera, kandi icyo bashyize imbere ngo ni ukubaka ibiramba. 

Yashimiye Guverinoma n’abaturage ba Zimbabwe bifatanyije n’u Rwanda nyuma y’ibiza byatewe n’imyuzure yahitanye abaturage 135 mu Ntara eshatu z’u Rwanda mu ntangiriro za Gicurasi. 

Yaboneyeho no gushima ubushake bwa Politiki bw’Abakuru b’Ibihugu byombi bukomeje gutuma umubano urushaho kwiyongera, n’ubufatanye bushingiye ku masezerano menshi amaze gusinywa.

Ambasaderi w’u Rwanda muri Zimbabwe James Musoni

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA