BAL 2022: REG BBC yitwaye neza itsinda umukino wa mbere  
Siporo

BAL 2022: REG BBC yitwaye neza itsinda umukino wa mbere  

NTAWITONDA JEAN CLAUDE

March 6, 2022

REG BBC 91-87 AS Salé

US Monastir 77-71 CFV Beira

Taliki 08-03-2022

SLAC-US Monastir (Dakar Arena-19h30)

CFV Beira-DUC (Dakar Arena-23h00)

Ikipe ya REG BBC ihagarariye u Rwanda yitwaye neza itsinda umukino wa mbere mu mikino y’amajonjora y’imikino y’Afurika y’amakipe yatwaye ibikombe iwayo muri  Basketball mu bagabo  “Africa Basketball League 2022”.

Nyuma y’umukino w’umunsi wa mbere wahuje ikipe ya DUC yo muri Senegal na SLAC  yo muri Guinea taliki 05 Werurwe 2022,   ikipe ya REG BBC kuri iki Cyumweru  taliki 06  Werurwe 2022  yitwaye neza mu mikino y’umunsi wa kabiri aho yatsinze AS Salé yo muri Maroc amanota 91 kuri 87.

Muri uyu mukino wabereye muri Dakar Arena, ikipe ya REG BBC nta bwo yatangiye neza kuko yatsinzwe agace ka mbere ku manota 27 kuri 25, agace ka kabiri, REG BBC na AS Salé  zanganyije amanota 21 kuri  21 bituma zijya mu karuhuko  AS Salé iyoboye ku manota 48 kuri 46.  Mu gace ka 3, ikipe ya REG BBC yitwaye neza itsinda amanota 26 kuri 22 inatsinda agace ka 4 ku manota 19 kuri 17 ihita yegukana intsinzi.

Umukinnyi wa REG BBC, Cleveland Joseph Thomas ni we witwaye neza muri uyu mukino aho yatsinze amanota 26, atanga imipira 7 yavuyemo amanota anagarura imipira 4 itageze mu nkangara “Rebounds”.

Abandi bakinnyi bitwaye neza ku ruhande rwa REG BBC ni Antony Walker watsinze amanota 21 na Adonis Jovon Filer watsinze amanota 14 akanatanga imipira 14 yavuyemo amanota.

Muri uyu mukino uwatsinze amanota menshi muri rusange ni Terrel De  Von Stoglin ukinira AS Salé  watsinze 32.

Mu wundi mukino wabaye, ikipe ya US Monastir yo muri Tunisia  yatsinze  CFV Beira yo muri Mozambique amanota 77 kuri 71.

Majok Ater James ni we mukinnyi witwaye neza muri uyu mukino aho yatsinze amanota 19 akanagarura imipira 12 itageze mu nkangara “Rebounds”.

Majok Ater James (Foto: Bal)

Imikino y’umunsi wa 3 biteganyijwe ko izaba taliki 08 Werurwe 2022 aho ikipe ya SLAC  yo muri Guinea izakina na US Monastir yo muri Senegal naho  CFV Beira yo muri Mozambique ikine na DUC yo muri Senegal.

Amafoto:

Foto: Shema Innocent

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA