Visi Perezida wa Mbere w’Umuryango Uharanira Inyungu z’Abarokotse Jenoside yakorewe Abatutsi mu 1994 (IBUKA), Hon. Muhongayire Christine, yasabye inzego z’ubutabera gushyiraho no gukaza amategeko ahana by’umwihariko abapfobya Jenoside ku mbuga nkoranyambaga, agaragaza ko iyi ngengabitekerezo ikomeje gufata indi ntera muri iki gihe.

Yabigarutseho ku wa Kane, tariki ya 24 Mata 2026, mu gikorwa cyo kwibuka ku nshuro ya 32 Jenoside yakorewe Abatutsi, cyabereye ku Rwibutso rwa Jenoside rwa Ntarama mu Karere ka Bugesera, cyitabiriwe n’abakora mu rwego rw’ubutabera bibuka by’umwihariko abakoraga mu rwego rw’ubutabera bishwe.

Hon. Muhongayire yagaragaje ko Jenoside yakorewe Abatutsi itabaye impanuka, ahubwo ko yateguwe igihe kirekire binyuze mu nyigisho z’urwango zakwirakwijwe n’abanyapolitiki babi bo hambere, barimo Gitera Joseph wazanye amategako icumi y’Abahutu yari arimo urwango rukomeye yari afitiye Abatutsi ndetse aya mategeko ubwayo akaba yarashishikarizaga Abahutu kwanga Abatutsi biganisha no kuzabarimbura.

Yagize ati: “Gitera ajya gutangira yaravuze ngo umubano w’Umututsi n’umufunzo ku kuguru, n’umusonga mu rubavu kandi ni umusundwe mu mubiri. Atanga amategeko icumi [y’Abahutu] ajya kuyasoza aravuga ko ngo Abatutsi baragatsindwa i Rwanda.”

Yakomeje ashimangira ko Jenoside idashobora kubaho idaturutse ku magambo n’inyigisho z’urwango zibiba inzangano mu baturage.

Ati: “Ntabwo Habyarimana yari kuzana imihoro, amafuni n’imbunda ngo abantu bahite birara mu Batutsi bice, byatangiriye kuri aya magambo yaba aya Kayibanda, yaba n’aba ba Habyarimana.”

IBUKA igaragaza ko n’uyu munsi ingengabitekerezo ya Jenoside ikigaragara, cyane cyane ku mbuga nkoranyambaga, ari na yo mpamvu yasabye inzego z’ubutabera gufata ingamba zihariye.

Hon. Muhongayire yasabye abari mu rwego rw’ubutabera gukaza ingamba, zirimo no kuvugurura amategeko aho bikenewe, kugira ngo abagaragaza iyi ngengabitekerezo bahanwe by’intangarugero.

Yagize ati: “Mwebwe muri mu nkiko, muri mu butabera, ndagira ngo mbasabe, niba ari amategeko muhindura, niba hari ukundi kuntu mubigenza, murwanye n’iyo ngengabitekerezo ya Jenoside, ihanwe mu buryo bukomeye ku wo iharagayeho wese.”

Yongeyeho ko imbuga nkoranyambaga zahindutse urubuga rukomeye rwo gukwirakwizaho ibitekerezo bipfobya cyangwa bihakana Jenoside.

Ati: “Ku mbuga nkoranyambaga birakaze! Buri wese arajyayo agatangira ibye, agatangira apfobya Jenoside ayihakana n’ibindi byinshi. Rwose kuba umuntu ari kuri izo mbuga nkoranyambaga nta burenganzira na buto afite bwo kudutoneka.”

Yashimye kandi inzego z’ubutabera ku ruhare zimaze kugira mu guhana ibyaha bifitanye isano na Jenoside, haba mu Rwanda no mu mahanga.

Perezida w’Urukiko rw’Ikirenga akaba na Perezida w’Inama Nkuru y’Ubucamanza mu Rwanda, Mukantaganzwa Domitilla, yagaragaje ko icyaha cy’ingengabitekerezo ya Jenoside kidashobora kwihanganirwa, ashimangira ko aho kigaragaye hose kizakurikiranwa kandi inzego z’ubutabera ziteguye guhangana na cyo mu buryo bwose.

Itegeko ryo mu 2013 rishyiraho icyaha cy’ingengabitekerezo ya Jenoside n’ibindi byaha bifitanye isano na yo, rivuga ko guhakana Jenoside bishingiye ku magambo agoreka ukuri kuri Jenoside hagamijwe kuyobya rubanda no kwerekana ko Jenoside yakorewe Abatutsi itateguwe.

Rikomeza rivuga ko gupfobya bigizwe n’amagambo agabanya uburemere cyangwa ingaruka za Jenoside yakorewe Abatutsi no koroshya uburyo Jenoside yakozwemo.

Ni itegeko riteganya ibyaha n’ibihano rigaragaza ko ibyaha by’ingengabitekerezo bihanishwa hagati y’imyaka itanu n’imyaka 15 y’igifungo hiyongereyeho n’ihazabu y’ibihumbi 500 Frw kugeza kuri miliyoni 2 Frw.

Ba uwa mbere mu kumenya amakuru agezweho!!!