Abasore babiri bafashwe n’abaturage kuri uyu wa mbere, mu Murenge wa Rwimiyaga bafite ihene ebyiri bari bibye bacukuye inzu y’umuturage mu Mudugudu wa Nyabyihura Akagari ka Rugarama ya 2, Umurenge wa Musheri bahita bashyikirizwa Polisi.

Aba basore biyemerera ko mu masaha ya sa cyenda z’urukerera ari bwo bacukuye inzu yabagamo ihene bakazitwara bagamije kujya kuzigurisha mu isoko rya Rwimiga rirema buri wa Mbere w’Icyumweru.

Ntibyabahiriye kuko ubwo ba nyiri amatungo babyukaga bagasanga bibwe babimenyesheje abaturanyi hanyuma na bo bagatangatanga bashakisha mu nzira zitandukanye.

Abajura bafatiwe ahitwa Nyendo berekeje mu isoko bahita basubiranwayo n’amatungo bibye kugeza ubwo police yazaga kubatwara.

Abaturage bavuga ko muri iyi minsi hariho ubujura bukomeye bakifuza ko ababifatirwamo bajya babihanirwa by’intangarugero.

Mukwaya Anatole yagize ati:”Abajura b’amatungo baratuzengereje.Bamaze iminsi batwiba yemwe hari n’abasigaye bararana na yo mu nzu.Reba nka ziriya hene bari batwaye ntiziri munsi y’ibihumbi 150 by’amafaranga y’u Rwanda.

Umuturage areba guhomba amafaranga nk’ayo agahitamo kuziraza mu nzu araramo.”

Yongeye ati:”Icyo twifuza ni uko mu gihe hari abafashwe inzego zibishinzwe zikwiye kujya zibibahanira.Ubu ntibigutangaze ejo ubonye barekuwe baje gushaka ahandi biba.Ubuyobozi rwose budufashe ikintu cy’ubujura bw’amatungo gifatirwe ingamba zidasanzwe.”

Nyampundu Oliva na we avuga ko aba bajura badindiza iterambere ry’abaturage.

Ati:”Ibi bintu byo korora itungo hari abandi barekereje bagamije kuritwara bidusubiza inyuma.
Umuntu yorora itungo aritegerejeho kwiteza imbere akaba yarigurisha agatera inzu umucanga,akishyurira umwana ishuri,agashora mu buhinzi n’ibindi.Iyo bakwibye rero baba bagukomye mu nkora mu rugendo rwawe rw’iterambere.”

Bandora Emmanuel Umunyamabanga Nshingwabikorwa w’Umurenge wa Musheri yavuze ko abafatanywe ihene bashyikirijwe polisi, anashima abaturage bafatanije kugira ngo bafatwe.

Ati”Abafashwe bagiye gukurikiranwa.Turashimira abaturage bagize uruhare kugira ngo abajura bafatwe,tunabasaba gukomeza kugira umuco wo gutabarana no kumenyesha ubuyobozi abakekwa mu bujura bw’imitungo y’abaturage.”

Urubyiruko na rwo rwumva ko ruzatungwa no kwigabiza iby’abandi nabagira inama yo kubireka bagakura amaboko mu mufuka bagakora”.

Ikibazo cy’abitwikira ijoro bakajya kwiba amatungo cyane ihene cyumvikana mu Mirenge itandukanye mu Karere ka Nyagatare. Nta gihe gishize abajura nk’aba b’ihene bagabye igitero mu Kagari ka Rutaraka mu Murenge wa Nyagatare bagatwara ihene 8 ndetse bagatema n’abari muri urwo rugo bagera kuri 3 abandi bagakubitwa.

Mu cyumweru gishize kandi muri Rutaraka nanone mu Mudugudu wa Mugali hibwe ihene 3 ebyiri ziteshwa abajura imwe barayitwara.

Umuvugizi wa Polisi mu Ntara y’Iburasirazuba SP Hamdun Twizerimana yavuze ko abishora muri ibi bikorwa batazihanganirwa ndetse asaba abaturage gukora amarondo no gutanga amakuri kuri polisi ku bo bakeka.

Ba uwa mbere mu kumenya amakuru agezweho!!!