U Bushinwa bwatangaje ko uhereye ku wa 01 Gicurasi 2026, nta drone izongera kwinjizwa, kugurishwa cyangwa gukodeshwa mu mujyi wa Beijing itabifitiye uburenganzira kubwo impamvu z’umutekano w’uwo mujyi.

Drone zari zisanzwe zigurwa zikanagurishirizwa mu maguriro asanzwe acuruza ibikoresho by’ikoranabuhanga, ariko ubu bizemererwa gusa abafite impamvu zumvikana; nko kurwanya iterabwoba, abakora ubutabazi mu bihe by’ibiza kandi na bo ari uko babanje guhabwa uburenganzira n’ubuyobozi.

Inteko Ishinga Amategeko y’u Bushinwa yagaragaje ko mbere yuko drone isohoka cyangwa yinjizwa muri uwo mujyi izajya ibanza kwandikwa na polisi ndetse abazikoresha bagomba kubanza guhabwa amahugurwa nyuma bakore ibizamini.

U Bushinwa bwagiye bukaza amategeko agenga ikoreshwa rya drone, aho abayobozi bavuga ko ari mu rwego rwo kurinda umutekano w’abaturage. Mu mijyi imwe yo mu Bushinwa, drone zigaragara kenshi zifashishwa mu gutanga ibiribwa, mu buhinzi ndetse no gusukura inyubako.

Mu mwaka ushize na bwo ikirere cyose cya Beijing cyashyizwe mu gace katemerewe drone aho byasabaga uburenganzira butangwa n’inzego zishinzwe kugenzura ingendo zo mu kirere mbere y’uko ziguruka.

Mu 2025, isoko rya drone cyane cyane izikoreshwa n’abaturage ryinjirije hafi miliyari 1.6 z’amadolari icyo gihugu, mu gihe mu rwego rw’ubuhinzi amasosiyete akomeye yo mu Bushinwa akora drone zirenga 100,000 ku mwaka, ndetse izirenga miliyoni 3 zikaba zanditswe.

Ba uwa mbere mu kumenya amakuru agezweho!!!