Guverinoma y’u Rwanda ifite icyizere cyo kugera ku ntego yo kugabanya impanuka, imfu n’inkomere zikagera nibura kuri kimwe cya kabiri bitarenze mu mwaka wa 2030 nk’uko bikubiye mu Ntego z’Iterambere Rirambye (SDGs).

Mu nama yiga ku gutera inkunga y’Ikigega cy’Ubufatanye mu kubungabunga umutekano wo mu muhanda yateguwe ku bufatanye bw’u Bufaransa na Jamaica, intumwa yihariye y’Umunyamabanga Mukuru wa Loni ishinzwe Umutekano wo mu muhanda ndetse n’Ibiro bya Komisiyo za Loni z’Ututere i New York, u Rwanda rwashimye icyo kigega ku musanzu gitanga mu gushyigikira icyerekezo cyarwo mu kwimakaza umutekano wo mu muhanda. 

Iyo nama yateraniye ku cyicaro gikuru cya Loni guhera ku wa Mbere tariki ya 20 kugeza kuri uyu wa Kabiri tariki ya 21 Nyakanga 2026, ibaye mu gihe habura ukwezi ngo haterane Inama y’Inteko Rusange y’Umuryango w’Abibumbye ku nshuro ya 81 itegerejwe guhera ku wa 8 Nzeri 2026.

Ambasaderi w’u Rwanda mu Muryango w’Abibumbye Martin Ngoga, yashimye Ikigega cy’Umuryango w’Abibumbye cyita ku Mutekano wo mu Muhanda cyashyigikiye imbaraga u Rwanda muri gahunda y’Igihugu yo kwimakaza umutekano wo mu muhanda. Inkunga ya UNRSF mu Rwanda yibanda ku bikorwa remezo by’imbere mu Gihugu bitekanye ndetse n’imishinga ijyanye no kwimakaza umutekano wo mu muhanda.

Mu mishinga UNRSF yateye inkunga harimo uw’ingofero z’abatwara moto wiswe ‘Tuwurinde’  washowemo ibihumbi 299 600 by’amadolari ya Amerika ni ukuvuga miliyoni zisaga 441 z’amafaranga y’u Rwanda. Uyu mushinga watangirijwemo Laboratwari isuzuma ubuziranenge bw’ingofero z’abatwara moto (casques) mu kurushaho guharanira ko abagenda kuri moto barushaho gukoresha ingofero zibarinda zujuje ubuziranenge bukenewe mu ruhando mpuzamahanga.

UNRSF igira n’indi mishinga igamije kongerera ubumenyi abakozi bo mu Kigo cy’Igihugu gitsura Ubuziranenge (RSB), Kaminuza y’u Rwanda na Polisi y’u Rwanda mu kurushaho gukurikirana iyubahirizamategeko n’ubukangurambaga bwo gukumira impanuka. Nanone kandi u Rwanda rwabonye inkunga ya Loni inyuze mu ishami ryayo rishinzwe imiturire binyuze mu mushinga ACRoS washyiriweho gukora ubutabazi bwihuse ahabereye impanuka. 

Mu nama yasoje kuri uyu wa Kabiri, Ambasaderi Ngoga yavuze ko u Rwanda rufite ingamba zihamye zo kubungabunga umutekano wo mu muhanda binyuze mu kwimakaza amategeko ahamye, Inzego z’umutekano, ibikorwa remezo bitekanye mdetse n’ubukangurambaga bukorwa na Leta. 

Yasabye ibihugu gukomeza gushyira amafaranga mu Kigega UNRSF ndetse hanimakazwa ubutwererane bw’amahanga kugira ngo hagerwe ku ntego yo kugabanya kabiri imfu n’inkomere bitarenze mu 2030 aho bizaba bijyanye n’Intego ya 3,6 mu Ntego z’Iterambere Rirambye (SDGs). 

Imibare y’Ishami rya Polisi y’u Rwanda rishinzwe umutekano wo mu Muhanga ishimangira ko mu myaka ine kuva mu mwaka wa 2022 kugeza mu 2025, impanuka zahitanye abasaga 2 900. Imbaraga zikomeke gushyirwa mu bukangurira abakoresha imihanda kurushaho kwigengeserera, bubahiriza amategeko y’umuhanda, bambara imikandara ku bagenda mu modoka n’ibindi bikoresho by’ubwirinzi nka casques n’ibindi.

Ba uwa mbere mu kumenya amakuru agezweho!!!