Ubuyobozi  bw’igisirikare cya Niger bwavuze ko bwaburijemo umugambi wo gutoroka wa Mohamed Bazoum wahoze ari Perezida w’iki gihugu, wahiritswe ku butegetsi muri Nyakanga 2023.

Umuvugizi w’igisirikare cya Niger Col. Major Amadou Abdramane, ku wa 19 Ukwakira, yatangarije kuri Televiziyoy’Igihugu, ko mugitondo cyo ku wa Kane Perezida Bazoum, umuryango we hamwe n’abashinzwe umutekano babiri bagerageje kubatorokesha aho bari bafungiye.

Yongeyeho ko umugambi wo gushaka gutoroka waburijwemo barafatwa hamwe n’abafatanyacyaha babo. Yavuze ko bateganyaga guhagurukira muri Kajugujugu berekeza muri Nigeria ariko kuri ubu hakaba hatangiye iperereza.

Yavuze kandi ko yamaganye imyitwarire ya Bazoum idahwitse.

Bazoum yahiritswe ku butegetsi n’igisirikare ashinjwa ko yananiwe gukemura ibibazo by’umutekano muke mu gihugu uterwa n’imitwe yitwara gisirikare.

Kuva Perezida Bazoum yahirikwa ku butegetsi n’Abasirikare ku ya 26 Nyakanga, yanze kwegura.

Kugeza ubu, yari afungiye mu rugo rwe mu ngoro ya Perezida hamwe n’umuryango we ariko aho bahise bafungirwa ubu ntiharamenyekana.

Muri Nzeri, abunganira Bazoum mu mategeko bavuze ko batanze ikirego mu Rukiko rw’Umuryango w’Ubukungu bw’Ibihugu by’Afurika y’Iburengerazuba (ECOWAS), ndetse no mu Muryango Ushinzwe kurengera Uburenganzira bwa Muntu basaba ko yarekurwa.

The East African ivuga ko mu ntangiriro z’uku kwezi, Niger yakoze icyunamo cy’iminsi itatu y’icyunamo nyuma yuko abasirikare 29 n’abandi bantu benshi baguye mu gitero bikekwa ko cyagabwe n’imitwe yitwara gisirikare, kikaba ari cyo cyahitanye abantu benshi kuva igisirikare cyafata ubutegetsi.

Niger yagiye ishinja Ingabo z’u Bufaransa guteza b’umutekano muke mu gihugu zifatanyije n’indi mitwe yitwaje intwaro inirukana ingabo zabwo.

Itsinda rya mbere ry’abasirikare b’Abafaransa n’Abayobozi baryo, ryategetswe kuva muri Nijer bageze i N’Djamena mu Murwa Mukuru wa Tchad ku wa Kane.

Umuvugizi w’Ingabo, Pierre Gaudilliere, yatangarije Ibiro Ntaramakuru by’Abafaransa (AFP) ko bageze muri Tchad amahoro.

Aho biteganyijwe ko zizarangiza kuva ku butaka bwa Tchad mu mpera z’Ukuboza.

U Bufaransa bwashyigikiye Perezida Bazoum nyuma yo guhirikwa ku butegetsi kandi busaba ko yarekurwa, ariko ubuyobozi bw’Igisirikare bwamuhiritse ntibubikozwa.

KAMALIZA AGNES