Rayon Sports yatsinze Amagaju FC ibitego 2-0 mu mukino w’umunsi wa 28 wa Shampiyona, yongera kwisubiza umwanya wa kane ku rutonde rw’agateganyo rwa Shampiyona y’u Rwanda.

Uyu mukino wabereye kuri Stade ya Kamena yo mu Karere ka Huye, kuri iki Cyumweru, tariki ya 26 Mata 2026.

Ni umukino watangiye amakipe yombi yigana, bituma uburyo bwo kurema ibitego buba buke imbere y’izamu.

Mu minota 15, Amagaju FC yihariye umupira hagati mu kibuga, ariko ikagorwa kurema uburyo bugana mu izamu.

Mu minota 25, Rayon Sports yinjiye mu mukino itangira gusatira izamu ry’Amagaju FC harimo umupira Tambwe Gloire yateye nabi ari mu rubuga rw’amahina, ufatwa neza n’umunyezamu Twagirumukiza Clement.

Ku munota wa 33, Rayon Sports yafunguye amazamu ku gitego cyatsinzwe na Tambwe Gloire n’umutwe ku mupira Nshimiyimana Emmanuel ‘Kabange’ yamuhaye.

Igice cya mbere cyarangiye Rayon Sports itsinze Amagaju FC igitego 1-0.

Mu igice cya kabiri, Rayon Sports yatangiranye impinduka Mugisha Didier asimburwa na Likau Kitoko.

Muri iki gice, Amagaju FC yagarukanye imbaraga atangira gusatira ashaka igitego cyo kwishyura binyuze mu bakinnyi bayo basatira barimo Alanda Destin.

Mu minota 60, iyi kipe y’i Nyamagabe yakomeje gusatira harimo umupira Rachid Mapoli yateye, ku bw’amahirwe ye make ujya hejuru y’izamu.

Mu minota 65, Rayon Sports yongereye imbaraga isatira cyane ishaka igitego cy’umutekano

Ku munota wa 76, Youssou Diagne yatsindiye Rayon Sports igitego cya kabiri n’umutwe, ku mupira uteretse Nshimiyimana Emmanuel ‘Kabange’ yateye awushyira mu rushundura.

Iminota 10 ya nyuma yarazwe no gusatira kwa Amagaju FC harimo umupira iradukunda Daniel yatanze mu rubuga rw’amahina, usanga Nibibona Eddy wawukinnye n’umutwe, ufatwa neza Kwizera Olivier.

Umukino warangiye Rayon Sports yatsinze Amagaju FC ibitego 2-0, yongera kubona intsinzi nyuma y’imikino itandatu yikurikiranya muri Shampiyona.

Iyi kipe yambara umweru n’ubururu yaherukaga intsinzi mu minota 90 y’umukino tariki ya 22 Gashyantare 2026, itsinda Mukura VS ibitego 2-1 mu mukino w’Umunsi wa 19 wa Shampiyona.

Gutsinda uyu mukino byatumye Rayon Sports ifata umwanya wa Kane n’amanota 47, irushwa amanota 14 na Al Hilal SC ya mbere.

Gikundiro kandi irushwa amanota umunani na APR FC zizahura ku wa Gatandatu tariki ya 2 Gicurasi 2026.

Amagaju FC yagumye ku mwanya wa 15 n’amanota 27.

Indi mikino yabaye kuri iki Cyumweru, Al- Merrikh yanyagiye Bugesera FC ibitego 3-0 naho Etincelles inganya na Kiyovu Sports ubusa ku busa.

Ba uwa mbere mu kumenya amakuru agezweho!!!